2 Nabelu si Hakub ki Rakil ne migkahi, “Manama a? Sikandin ka ware migpaanak keykew!”

3 Ne migkahi si Rakil, “Seini red ka uripen ku ne si Bilha. Huliri nu sikandin su eyew ligkat kandin duen ded anak ku.” 4 Sikan naa ka impaasawe e ni Rakil si Bilha ki Hakub wey ingguliran e din e si Bilha. 5 Ne naberes si Bilha wey nakaanak sikandin te lukes ne anak dan ki Hakub. 6 Ne migngaranan ni Rakil ka bate ki Dan^a su migkahi sikandin, “Neyid-u red ka Manama keddiey! Narineg din ka peg-ampu ku su imbehayan a nikandin te lukes ne anak.” 7 Nataman, naberes e man-e si Bilha wey nakaanak ded man-e te igkarangeb ne lukes ne anak dan ki Hakub. 8 Ne migngaranan ni Rakil ka bate ki Naptali^b su migkahi sikandin, “Nekeg-ehet key amana te kakey ku piru migpanalu a.”

9 Te pegkanengnengi ni Liya ne kene pad man-e sikandin eg-anak, impaasawa rin e degma ka uripen din ne si Silpa ki Hakub. 10 Nataman, nakaanak si Silpa te lukes ne anak dan ki Hakub. 11 Ne migngaranan ni Liya ka bate ki Gad^c su migkahi sikandin, “Meupiya se kulis ku.” 12 Nataman, nakaanak e man-e si Silpa te igkarangeb ne lukes ne anak dan ki Hakub. 13 Ne migngaranan ni Liya ka bate ki Asir^d su migkahi sikandin, “Subla a ne nahale! Kuntee, egngengaranan a te me malitan te mahale.”

14 Te tinggaani e te trigu, miggendiye si Rubin te kamet wey nakakita rin te palisel ne hilamunen ne egngaranan te “mandragura” diye, wey in-uyan din e seini diye te iney rin ne si Liya. Te pegkakita dutu ni Rakil migkahiyan din e si Liya, “Egbuyu a te mandragura te anak nu.”

15 Piru migtabak si Liya, “Kene bes pad ne eleg ka peg-ahew nu te asawa ku? Kuntee egkuen nud e man-e ka mandragura te anak ku?”

Ne migkahi si Rakil, “Ke egbehayan a nikeykew te mandragura, egkaayun ne egpekewulid ka ki Hakub kangkuwa ne karusileman.” 16 Te maapun e, insinug-ung de ni Liya si Hakub te peg-uli din puun te kamet. Ne migkahiyan ni Liya si Hakub, “Keilangan ne diye ka eggirehe te keddi te seini ne karusileman su migbayaran kud e sikeykew te mandragura ne nakita te anak ku.” Purisu, si Liya ka migguliran ni Hakub te seeye ne karusileman.

17 Ne intabak te Manama ka peg-ampu ni Liya wey naberes e man-e sikandin wey nakaanak e te igkalimma ne lukes ne anak dan ki Hakub. 18 Ne migngaranan ni Liya ka bate ki Isakar^e su migkahi sikandin, “In-unahan a te Manama su imbehey ku ma ka uripen ku diye te asawa ku.” 19 Nataman, naberes e man-e si Liya wey miglesutan e te igkeen-em ne lukes ne anak dan ki Hakub. 20 Ne migngaranan ni Liya ka bate ki Sabulun^f su migkahi sikandin, “Imbehayan a te Manama te meupiya ne dasag. Kuntee eggeyinawaan ad e te asawa ku su hen-em man-e ka anak ney ne neelin ne me lukes.” 21 Nataman, nakaanak e si Liya te malitan ne migngaranan din ki Dina.

22 Ne ware nalingawi te Manama si Rakil. Purisu, intabak din ka peg-ampu ni Rakil wey nakaanak e sikandin. 23 Nataman, naberes e sikandin wey nakaanak sikandin te lukes ne migkahi, “In-awe e te Manama ka pegkeyilew ku.” 24 Ne migngaranan din ka bate ki Husi^g su migkahi sikandin, “Egbehayan e pad perem te Magbebaye ne Manama te duma ne anak ne lukes.”

25 Te ware pad naluhey si Rakil ka miglesutan ki Husi, migkahiyan e ni Hakub si Laban, “Peulia ad nikeykew diye te keddi ne inged. 26 Ibehey nud keddi ka me asawa ku wey me anak ku ne nabayaran kud te pegpanganuhang ku keykew su eg-uli ad e. Su nakanengneng ka ke immenu ku te pegtrabahu kayi te keykew.”

27 Piru migtabak si Laban, “Ke egkaayun ne kene ke pa ubag awe kayi te keddi, su naantukan ku ne impanalanginan a te Magbebaye ne Manama tenged keykew. 28 Na, buyu ke re te igkeupii nu ne bayad su igbehey ku keykew.”

29 Ne migtabak si Hakub, “Nakanengneng ka ke immenu ku te peggimu kayi te keykew wey nabuhal ka me ayam nu tenged te pegtanggu ku. 30 Su dengan, te ware e pad miggendini, deisek de ka karatuan nu, ne kuntee, migdakel e ne subla. Su impanalanginan ka te Manama pinaahi te langun ne neyimu ku. Piru kuntee, keilangan ne iyan kud egtangguwen ka me asawa ku wey ka me anak ney.”

31 Ne mig-inse man-e si Laban, “Nekey-a ka igbayad ku keykew?”

Ne migtabak si Hakub, “Kene ne seleppi. Wey e re egpabulus ne egtanggu te ayam nu ke egkabennalan ka te igkahi ku keykew. 32 Peendiyaa a nikeykew te me ayam nu kuntee eyew igsuwey kud ka langun ne me kambing ne balangbangan wey ka langun ne me karniru ne meitem. Sikan e ka ibayad nu keddi. 33 Te mewuri ne me aldew, egkanengnengan nu ke egkasalihan e naa wey se kene. Ke due egkiteen nu diye te me kambing ku ne kene ne balangbangan, wey ke due karniru ne kene ne meitem, egpakakahi ke naa te intakew ku sika diye te keykew.”

34 Ne migtabak si Laban, “Uya. Eg-uyun a te ingkahi nu.” 35 Piru te seeye ded ne aldew, insuwey ni Laban ka tagse kambing ne balangbangan ne lukes wey beyan, lagkes ka me karniru ne meitem. Ne impatamengan din e seeye te me anak din ne lukes. 36 Impanguyan dan seeye te kariyuan ne tatelu ne aldew ka peggipanew ligkat te ki Hakub. Ne si Hakub ka migtanggu te duma ne me ayam ni Laban ne nasame.

37 Ne migkuwa si Hakub te meyilew ne me sugpang te kayu ne egngaranan te alamu, almindras, wey platanu, wey impanluwitan din ka kiliran te me sugpang eyew due egpekeepus ne me maangkag diye te me sugpang. 38 Ne diye din itahu ka me sugpang ne inluwitan din te lenged te me tahuanan te igpeinum te me ayam eyew egkiteen te me ayam ni Laban. Su egpaaharey ma sikandan ke eg-inum. 39 Sikan naa, ka me ayam ne naaharan diye te lenged te me sugpang ne due nekeepus ne maangkag, nakaanak sikandan te me balangbangan.

40 Te pegpaaharey te me karniru, insuwey ni Hakub ka me maangkag wey diye din ipatangke te me balangbangan wey me meitem ne ayam ni Laban. Sikan naa ka migmasalig ka ayam ni Hakub wey insuwey rin diye te me ayam ni Laban.

41 Ne emun egmaaharey e ka me manekal-nekal ne me ayam, egkuen ni Hakub ka me sugpang ne diye igtahu te tangkaan dan eyew egkiteen dan. 42 Piru ware din tahui te me sugpang ka tangkaan te mahuye-guye ne me ayam. Te ware naluhey, neelin e ne mahuye-guye ka me ayam ni Laban, piru ka me ayam ni Hakub, neelin ne manekal-nekal. 43 Purisu, naratu e ne subla si Hakub. Migmasalig amana ka me uripen din, me karniru, me kambing, me kamilyu, wey me asnu.