Ka pegpasuwayey ni Abram ki Lut
13
Sikan naa ka miglibed e man-e ensi Abram diye te inged te Nigib duma ka asawa rin wey ki Lut wey ka langun ne kandin. 2 Meyaman ne subla si Abram. Masalig e ka me karniru rin, me kambing, me baka, me seleppi, wey me bulawan. 3 Puun te Nigib, miggalin-halin e man-e sikandan ka eg-ugpe taman te nekeuma sikandan diye te intagtaheeran dan dengan te eg-ugpe ne elat-elat te Bitil wey Ay. 4 Seeye ka inged ne miggimuwan din dengan te altar. Diye man-e mig-ampu si Abram te Magbebaye ne Manama.5 Ne si Lut, ka migduma ki Abram, duen e degma pamilya rin wey me uripen din. Due degma me karniru rin, me kambing, wey me baka. 6 Tenged te suble e ne masalig ka me ayam ni Abram ki Lut, kenad e ne eleg te me ayam dan ka palayuranan ke egpekegdani sikandan ka eg-ugpe. 7 Sikan naa ka migpeehetey ka me talagtameng te me ayam ni Abram wey ka me talagtameng te me ayam ni Lut. Kenad ne eleg ka palayuranan te me ayam dan su te seeye ne timpu diye pad degma nangugpe ka me matig-Kanaan wey me Pirisihanun.
8 Purisu, migkahiyan ni Abram si Lut, “Kene ne meupiya ne egpeeg-ehetey ka me etew nu wey ka etew ku tenged su anaken ku sikeykew. 9 Meupiya pad ke egpasuwayey ki tenged su maluag pad seini se tane ne egkaayun ne eg-ugpaan. Na, alam ka te inged ne igkeupii nu te eg-ugpe, ke igkahibang naa wey ke igkakawanan. Ke eggendiye ka te igkakawan, eggendiya a degma te igkahibang.” 10 a Sikan naa ka migpamantew si Lut wey nakita rin ne masalig ka me weyig diye te napu te Hurdan taman te Suar, ne nekeiling te pinamulaan te Idin wey nekeiling degma te inged ne Ihiptu. (Te seeye ne timpu, ware pad dereeti te Magbebaye ne Manama ka Suduma wey Gumura). 11 Purisu in-alam ni Lut ka langun ne napu te Hurdan wey miggipanew e sikandin ka egpeendiye te igsile. Iling due ne paahi ne nekegsuwey si Lut ki Abram. 12 Si Abram, diye mig-ugpe te inged te Kanaan wey si Lut, diye mig-ugpe te marani te Suduma ne diye te me siyudad ne diye te napu. 13 Ne ka me etew ne nangugpe diye te Suduma, amana ne maddeet wey makasesale diye te Magbebaye ne Manama.
Ka peggalin ni Abram diye te Hibrun
14 Te nakaligkat e si Lut, migkahiyan te Magbebaye ne Manama si Abram, “Pamantawa nu ay-ayari ka langun ne inged. 15 b Ka langun ne tane ne egkeumaan nu te egtengteng, igbehey kud keykew wey te me kabuhalan nu wey kaniyud e te ware egtamanan. 16 Egpamasalihen ku ka kabuhalan nu iling kasalig te alinepung kayi te ampew te tane ne kene egkaseel. 17 Ne hipanew kad, panleuya nu ka langun ne tane su igbehey ku keykew seini se langun.” 18 Nataman, miggalin e man-e si Abram ne diyad e mig-ugpe te marani te matulus ne me kayu ni Mamri diye te inged te Hibrun. Ne miggimu e man-e sikandin te altar ne eg-unturan te egtutungen ne igbehey diye te Magbebaye ne Manama.