2 Ne seini ka me lukes ne anak ni Hapit—si Gumir, si Magug, si Madai, si Haban, si Tubal, si Misik, wey si Tiras. 3 Seini ka me kabuhalan man-e ni Gumir—si Askinas, si Ripat, wey si Tuggarma. 4 Seini ka me kabuhalan ni Haban—si Ilisa, si Tarsis, si Kitim, wey si Dudanim. 5 Sikandan ka me kaapuan te me etew ne nekeempet nangugpe diye te ilis te dahat wey diye te me pulu te dahat. Sikandan langun ka me kabuhalan ni Hapit ne nangugpe diye te nalein-lein ne me inged, wey nalein-lein e degma ka me tribu wey linalahan dan.

6 Ne seini ka me lukes ne anak ni Ham—si Kus, si Ihiptu, si Put, wey si Kanaan. 7 Seini ka me kabuhalan man-e ni Kus—si Siba, si Habila, si Sabata, si Raama, wey si Sabtika. Ne seini degma ka kabuhalan ni Raama—si Saba wey si Dadan. 8 Ne duen pad man-e anak ni Kus ne egngaranan ki Nimrud, ne iyan an-anayan ne bahani kayi te ampew te tane 9 wey subla ne meinges ne mannitingen. Purisu, ke due meinges ne mannitingen, due degma lalahen ne eggenendue, “Egpekeiling seini ne etew ki Nimrud te meinges ne mannitingen.” 10 Ka an-anayan ne me siyudad ne migmanduan ni Nimrud iyan sika se Babil, Irak, wey Akad. Seini se tatelu ne siyudad sakup te inged ne egngaranan te Sinar. 11 Puun te seeye ne inged, miggendiye si Nimrud te Asiriya wey migpasasindeg sikandin te me siyudad ne Ninibi, Rihubut-ir, Kala, 12 wey Risin ne diye te eletanan te Ninibi wey te Kala, ka dakel ne siyudad.

13 Ne si Ihiptu, sikandin ka migligkatan te me etew ne matig-Ludim, matig-Anamim, matig-Lahabim, matig-Niptuhim, 14 matig-Pitrusim, matig-Kasiluhim, wey matig-Kapturim (ne migligkatan te me Pilistihanun).

15 Seini ka me anak ni Kanaan, si Sidun ka panganey ne anak din, wey si Hit. 16 Si Kanaan ka migligkatan man-e te me Hibusihanun, me Amurihanun, me Girgasihanun, 17 me Hibihanun, me Arkihanun, me Sinihanun, 18 me Arbadihanun, me Simarihanun, wey me Hamatihanun. Nataman, natalagtag e ka me tribu ne kabuhalan ni Kanaan, 19 wey nekeempet e sikandan nangugpe puun te Sidun, peendiye te Girara taman te Gasa, peendiye man-e te Suduma, Gumura, Adma wey Sibuwim taman te Lasa. 20 Sikandan langun ka me kabuhalan ni Ham. Ne nalein-lein ne me inged ka nangugpaan dan wey nalein-lein degma ka me tribu wey linalahan dan.

21 Ne ka kakey ni Hapit ne si Sim, iyan migligkatan te langun ne me Hibruwanen. 22 Seini ka me anak din ne lukes—si Ilam, si Asur, si Arpaksad, si Lud, wey si Aram. 23 Seini ka me kabuhalan man-e ni Aram—si Us, si Hul, si Gitir, wey si Mas. 24 Ne si Arpaksad, nakaanak ki Sila. Ne si Sila, nakaanak ki Ibir. 25 Daruwa ka lukes ne anak ni Ibir—ka sabeka egngaranan ki Pilig su nabaad ka me etew kayi te ampew te tane te seeye ne timpu. Ne si Huktan ka ngaran te suled din. 26 Ne si Huktan ka migligkatan enni Almudad, ni Silap, ni Hasarmabit, ni Hira, 27 ni Haduram, ni Usal, ni Dikla, 28 ni Ubal, ni Abimail, ni Siba, 29 ni Upir, ni Habila, wey ni Hubab. Sikandan langun ka me anak ni Huktan. 30 Diye sikandan nangugpe te inged ligkat te Misa taman te Sipar ne diye te me bubungan ne dapit te igsile. 31 Sikandan langun ka me kabuhalan ni Sim. Ne nalein-lein ne me inged ka nangugpaan dan wey nalein-lein e degma ka me tribu wey linalahan dan.

32 Sikandan langun ka me kabuhalan te me anak ni Nuwi ne neyimu ne nalein-lein ne me nasud sumale te me kaap-apuan dan. Te pegkeimpus te pegsipuk te weyig, natalagtag e sikandan minsan hendei.