2
Isonga, kagol a gwariy badon biyag jo, benegi yoy emiin a ngaaw tan emiin a itek tan dinodoho. Isalcheng jon mengibili-biling i maronong kayo iy ngaaw gayam i pangkep jo. Enog i apal tan enog i omang. 2 Inges jo komiy ngoyat a piyan to na olay a mansoso. Tep ma-kow kayo koma na aispiritoan a kathas a podnon esel Afo Chiyos say onkedkedsang pay i pamati yo ingkathod metongpal i kaysalakanan jo. 3 Tep pichasan jo wiy kinamapteng Criston Afo thayo.Si Cristo Tan Sema Iren Naematid Si-katho, May-arig Ired Sibibiyag A Batho
4 Esofi yos Criston may-arig cha sibibiyag a batho. Binekan ira na too ma batho, nem pinispis Afo Chiyos et inbilang ton epateg a pasiya. 5 Si-kayo ngo, in-i-kanan to kayon Cristo na badon biyag, isonga inges jo komay sibibiyag a bathon naaosal a maytetgwen na aispiritoan a baliy. Panbalin to kayo ngon Afo Chiyos a singen esantoan a parin mengitangdal cha si-katho. Sema itangdal jo, si-kathoy pansilbi yo tan panchejaw jon egwathen Afo Chiyos kagol na imag Jesu Cristo. 6 Amta thayo i podno ira jay tep kigwan Afo Chiyos chiwa esel to maypangkep Cristo i:
“Si-neng jo, emispisak na epateg a bathon iamag kod Zion. a
Si-kathoy bathon mengibahed a chili na baliy a
itegwen kod man.
Sema naematid si-katho, nat mebaingan.” b
7 Niman si-kathayon naemati, ebanol a chilid si-kathayo ma bathon si Cristo. Nem sema iren nat naemati, amtaan chiy podnon iyaysolat chiwa esel Afo Chiyos a kigwan to i:
“Sema bathon kigwan iren ma naengamag i
nagwariy silbi tho,
si-kathoy iyanbalin a kapategan a bathon
naengibahed na baliy.” c
8 Sema iren nat naemati, nemnemnemen cha koma ngo ma iyaysolat maypangkep Criston kigwan to i:
“Si-kathoy bathon mengisokbab na tothoon mengi-kas cha si-kara.” d
Iyaysokbab tan iya-kas ira ma too tep eg cha iyonoran i esel Afo Chiyos maypangkep na kaysalakanan. Tep si-kathoy planon Afo Chiyos para cha si-kara.
9 Nem si-kayoy pinispis Afo Chiyos say manbalin kayon pamilja tho tan pari thon mansilbid si-kathon Ari thayo. Si-kayo ngo iriy naintorayan to tep kegwen to kayo. Si-kayoy pinispis to say manbalin kayon too tho. Inpanbalin to kayon Afo Chiyos na emiin iren jay say ipaamta yoy mapteng a pasiyen ima-imag to. Tep si-kathoy ena-gway cha si-kayo say onbo-day kayod kawad-an na enbolinget et say onsekep kayod kawad-an na kaskasdaaw a silow to. 10 Nontan da nat too tho kayon Afo Chiyos, nem niman too tho kayo. Nontan da nat diya-kaman joy kaasi tho, nem niman diya-kaman jo.
Mesepol A Ipatoray Tayoy Angel Tayo Ired Ma Gwariy Karebengan To
11 Si-kayon ensemek ko, bisita kayo bengat chiya dobong, tan magenoy timpo yon pan-iyan chiyay. Isonga, iadok kod si-kayo i bebnekan joy ngaaw a kamkam na angel jo tep naiyaykontra ira ma kamkam cha pengemag jo na piyan Afo Chiyos. 12 Pansingsingpet kayo say mapteng na olay i panbiya-biyag jo tep sema iren nat naemati, nabiyantayan chiy naimag jo. Et angken ibasolan cha kayo i ngaaw i naima-imag jo, si-nengen chiy mapteng a ogadi yo, et chejawen ches Afo Chiyos no akow alin ikowan to di.
13 Kagol na chayaw Jesu Criston Afo thayo, ipatoray joy angel jod emiin a toon gwariy karebengan to. Ipatoray joy angel jod Impirador a kahejangan i karebengan to. e 14 Tan ipatoray jo ngoy angel jod gogobirnador a into-no na Impirador a menosa iren ma naengamag na ngaaw tan mengapolbar iren ma naengamag na mapteng. 15 Tep say piyan Afo Chiyos, a-magen joy mapteng say isalcheng joy toon naengowan na ngaaw maypangkep cha si-kayo tep eg cha amtes Afo Chiyos tan eg cha naiyosal i nemnem cha. 16 Babaen na naima-imag jo, ibiybiy jo i too kayon iyaydibchi nowan. Nem enog i iyosal i ingkaydibchi yon kagol na pengemagan na ngaaw, no diket osal jo ma ingkaydibchi yod pansilbid Afo Chiyos. 17 Rispiktar joy emiin a too, semek joy aahi yod pamati, tahoti yos Afo Chiyos, tan rispiktar joy Impirador.
Sema Bilin Ired Ma Bagaen
18 Si-kayon bagaen, ipatoray joy angel jod afo yo, tan rispiktar jon podno ira. Amag jo ira jay cha afo yon mapteng tan aanos, pati afo yon istrikto. 19 Tep no anosan joy diga-digat jon nagwariy kagol to babaen na naniyemnem jo na olay i piyan Afo Chiyos, apolbaran to kayon Afo Chiyos. 20 Tep no bechasen cha kayo kagol na engamagan jo na ngaaw et anosan joy chosa yo, nagwariy mengapolbar cha si-kayo kagol nithan. Nem no pedigathan cha kayo kagol na engamagan jo na mapteng et anosan jo, seman i apolbaran Afo Chiyos.
21 Tep nonta pinispis to kayon Afo Chiyos, plano tho i man-anos kayo no mepedigat kayo kagol na nainpangamag jo na mapteng. Tep iyandigat si Cristo kagol cha si-kathayo, et iyanbalin na arig say maonoran i naimag to. 22 “Nagwaren polos i basol Cristo tan nat iyan-ite-itek.” f 23 Nonta iyoma-omang cha, nat simongbat na ngaaw a esel. Nonta inpandiga-digat cha, nat tiya-kot to ira i mechosa ira, no diket inpiya-piyal to ira man cha Afo Chiyos a mengowis na kosto. 24 Si Criston mismoy engikaro na chosa na basol tayo nonta iyaydansiy angel tod koros. In-i-kan toy angel ton metiy say onsalcheng kiyen manbesol et say onoran tayoy esantoan a panbiyag. Kagol na sogat to, mimapteng kiya ngo. 25 Nontan da singen kalniro kayon nat amta yoy konan jo, nem niman ma iyan-oli kayod ma Naengajo tan Naemantay cha si-kayo.