ISIKIOLO
Poropeta akali Isikiolo doko yuu Jerusaleme ee kana 586 W.K. dokopa Bapilone wambu dupwame pyao lalyuo kokwa sepa nayaminyipa karo dee enakana dopa pipiyaminyi karoko piya. Banya waili pii doko Juu wambu Bapilone puu maiyuo lanyuo peyami dupwame sooko dee Jerusaleme mee kareyami dupwame sooko pinya lao lamaiya.
Pii liti kisima wakale wakale ingyuo pyasi palamo.
1. Rombo 1–24 Koo piyami dokona Anatumi randa maiyuo yuu Jerusaleme doko pyao lalyuo kokwa sela epelyaminyi lao repe repe lamaiya.
2. Rombo 25–32 Wambu rara wakale wakale dupwame Juu wambu dupwa randa maiyuo keta koo lasaka pyuo piyamisa Anatumi wambu rara wakale dupwa kote lao randa maira dupwana pii palamo.
3. Rombo 33–39 Yuu taone Jerusaleme pyao kwaeyanyi nembeyaminyi yuu Bapilone kareyami dupwa rengya kapa ingyara lyamo mona kyuu lao seramo karena lao lamaiya.
4. Rombo 40–48 Tembole anda yuu Jerusaleme doko kamba pyuo elya pirami lao Isikiolo baame pii nolako leya.
Isikiolo baa poraiyuo Anatu keta kapa ingingi lao suu pyao nolako pii lenge dokome kongwalu pii renge soo gisapala polo lamaiya. Banya pii soo giso leya dupwa pii repa repa pyuo maiyamo pii dupwa kando sinya lao pano makande yulu lapo pipala lasaka pyuo kareya. Kongwalu pyuo makande yulu piya dupwa dee polo lamaiyuo kareya. Isikiolo baame pii poraiyuo leya doko wambu dupwa mona kokorenape imambupi dolapo enenge ingyuo elya pyuo karena leya. Mende doko wambu emba mendaki mendaki lao embena koo doko emba range keta karara, leya. Baame wambu dupwa alowa pyuo mona enenge palyuo karaminyi kandapuli yaka lao suu piya doko lamaiya. Isikiolo baa poropeta ingyuo purisi ingyuo kareya doko tembole anda doko rungi rungi pyapala wambu dupwa poo pyasi ingyuo karamili lao soo nyiya.