1 KIŊI
Isaraele wambunya kiŋi dupwana monaki lenge dokona arome pii buku Samyuele dolapona lenge dokonako ingyuo wambo lao dakena opetae lao pyasi palamo. Buku dake mendaki dokona pii rema liti pyuo pyasi palamo.
1. Rombo 1–2 Dapiti kumuyamo dokopa banya Isaraele Jutape wambu dupwana kiŋi ingyuo panda doko banya ikinyingi Solomone lenge dokome nyiya.
2. Rombo 3–11 Liti dakena Solomonena iso kareyamo dokonape banya yulu andake piyamopape dupwana pyasi palamo. Yulu mupwa mende doko Anatunya tembole anda yuu Jerusaleme dokona piya.
3. Rombo 12–22 Dapiti Solomonepana isingi yuu mendaki ingiyamopape arome pii dakena isingi yuu lama ingiya doko palamo. Yuu gii dokopa piso kiŋi dupwame iso karo kumapa pyuo Yesu epara doko ee kana 850 ene paleyamo dokopa kaeyami. Make dokome ee kana dusipa Yesu isa epara doko ene paleyamopa mende piya doko lasaka pira 850 W.K. W.K. wambo Koraisa lao palipyamo pilyamo.
Buku Kiŋi lenge dolapona Isaraelena kiŋi mendaki mendaki lao baa apa pyuo Anatu leyamuli pyuo kareyamo dokona lao yapalyuo pyasi palamo. Kiŋi dupwame Anatu leyamuli pyuo kareyami ramo dokopa isingi yuu peparae kapa ingyuo peya. Dee Anatumi leyamuli pyuo pii nao Anatu kaepala bange wakale dupwa anatu ingyuo kingi leyaminyi dokopa yuu doko kwaeyo peya.
Yuu Isaraele lenge dorena isiyaminyi kiŋi dupwa peparaeme Anatunya pii kamba lao kareyami. Dopa piyaminyipa yuu Juta dorena isingi kiŋi dupwana lapome Anatunya pii au pyuo warombo soo kareyaminyi lapome Anatunya pii kamba lapala mee bange lapo Anatu lao lakando kareyami.
Buku 1 Kiŋi dokona Anatunya poropeta akali dusipa mupwa ingyuo kareyami. Karapala dokopa Anatunya pii lao karenge akali dasipa akali porai ingyuo karo wambu dupwa Anatu kaepala bange wakale dupwa ketae pyambwa nana lao Anatu pii letamuli pyuo pinya lao repe repe lamaiyuo kareyami. Poropeta akali mupwa Ilainja lenge dokome mee bange kingimi wasisi Bealo lenge dokona purisi akali dupwa nyuo anamasi minyuo kareyamo arome pii doko rombo 18 dokona pyasi palamo.