3 Imi anmal Pab-penzhulidgin wismaldo,

Pab e-chunmajadbal nikpa-neg tegin iti-nap opinnis.

Al immalmal-mag-taklegeddin,

immalmal-aku-takleged-akar choblesmal.

4 Imi Abel-patoun kudigusgu Pab-penzhulidgin Caínga pul-pule Pab Tummadga immal-nuegan ukcha.

Al Abel Pab-penzhulidbal,

tegin Pab Abel-ega-immal-ukchadgin yer chunmajadbal,

Pab tule-iskued-nikchulidyob Abel-taknonijun.

Tenal Abeldin purkwis,

tenal Abel-Pab-penzhul-kujadbal,

ampa anmal-ulubgin purpal chunma,

Abel-nanajadyob anmal Pabbak nued naneenabmo.

5 Imi Enoc-patoun Pab-penzhul-kujadbal iti-nap-akar tulachá nad Pab-negzhe.

Tenal Enocdin Pab-tar-chujadbal tulemal tar-pal-kwen-onoszhulmal.

Tenal Enoc sanal tule-purkwed-igal kwen itoszhulbal.

Tenal Enoc ampayo Pab-negzhe needdu,

tulemal mag takchamal Enocdin yer-itogal Pab-Tummad-imas.

6 Imi tule Pab-penel,

keg ku weligwal Pab-imagal,

tenal tule Pab-penzhulil,

kep weligwal Pab-imanoniko.

Tenal meke-ibi-tule Pabzhe omobiel,

keg-chulgu Pabgin-penzhulinab Pabdin mai.

Tenal tule Pabgin-penzhulidgin nuekwa Pab-aminanimalal,

Pabdin keg-chulgu e-wisgugal we tule-imanoniko.

7 Imi Noé-patoun ampayo ka immal kueddu,

Pab-Noéga-chogzhad-penzhul-kujadbal,

Noédin Pab-chogzhad-pallí ul-tummad chobzha e-ome tegin e-nuskanmal abonogal.

Tenal teun Noé-Pab-penzhulidbal,

mag taklenonijun tule-iti-napkin-pukmalad Pabzhe sapejul oturdaleged-wilubmal.

Tenal Noé Pab-penzhulidbal tule-chwilidikidga kunonijun.

8 Imi Pab Tummad Abrahamzhe kolnonigu Abrahamga neg-uklegoedzhe negal,

Abraham teun wichul pia nao.

Tenal Abraham Pab-penzhul-kujadbal yabli nad.

9 Tenal Abraham Pabgin-penzhul-kujadbal Pab-ega-kaka-ukchad-napkin megwis,

tule-pid pinche iche napa-pidgin maidyob.

Tenal teun Abraham mol-neggin megwis.

Tenal Pab Tummad Isaacga,

tegin Jacobga ampa we kaka-ukchamalmo.

Tenal we tulemal Abrahamyob mol-neggin megwismalmo.

10 Tenal Abraham abintadi-kujan neg-kwebur-chunchunnad-chobaledgin meggal.

Tenal Pab Tummad we neg-kweburga iktualeba neg-urpileged wilub-imas neg choblegal.

Tegin Pab Tummad we neg-kwebur chobbalo.

11 Imi teun Sara kusgu-keg-nuchu-nikuedbal tegin yer chelgujadbal,

nuchu-kwen-nikued-wilubzhulin.

Tenal Sara chogzhagusdo:

“Pab keg-chulgu e-kaka-ukchadbal immal ima.”

Al Sara Pab-penzhul-kujadbal nuchu-nikuszhun.

12 Tenal teun takalgu,

Abraham seredgujadbal,

pato purkwed omos.

Tenal Abrahambal e-wagwagan yabli íchejul ampagunonimal,

nikpa iskwa-takedyob,

tegin termal-kakpal ukub midedyobbal,

pél unnijul episgal.

13 Tenal we tulemal-pel-kwapa e-purkwijadzhe ampa Pab-kwen-penguszhulmal.

Tenal we tulemal Pab-ega-kaka-ukchadgin,

yabli immal kwen abingaszhulmal.

Tenal we tulemal yabli immal-kuoed itosmal,

tegin immal-kuoedgin welgusmal.

Tenal we tulemal-Pab-Tummadgin-penguszhulmalad aga tukin chogzhamal,

emalde iti-napkin tule-pidyob kudimal,

tegin tule-iche-iche-kudiidyob kudimalbal.

14 Tenal we tulemal-weob-chogzhamalad pato oyonanimal,

emalde aga neg-chunchunnad aminanimal ilgwen meggal.

15 Tenal tulemal-Pab-penzhulmalad e-neg-kwebur-aknijadgin pinzhedimalalen,

aga e-itolegedbal kannan e-neg-kweburzhe akpirismalbalin.

Tenal imidin we tulemal teob kwen kuszhulmal.

16 Tenal we tulemal-Pab-Tummadgin-penguszhulmalad pul neg-kwebur-nuedgin pinzhedi-kusmal,

tenal we neg-kweburdin,

nikpad-neg.

Al Pab Tummad kwen pinkejul we tulemal eje kolmalgal,

“Pab Tummad.”

Tenal Pabdin we tulemalga pato neg-kwebur-chunchunnad urpis.

17-18 Tenal teun Pabdin Abrahamga kaka-ukchado:

Tenal Abraham e-wilub-taklenonikidgin,

Pab-penzhul-kujadbal Pab Tummadga e-machi-walkwénnagwad-Isaac-ukchogalin,

Pabga-immal-kugedgin-immal-ukedyob ukegal.

19 Tenal Abraham ebinzhasdo,

Pab Tummaddin kannaleged nika purkwijad-akar kannan Isaac-otulogal.

Tenal Abraham-e-machi purpaldin pato purkwis.

Al Abraham purkwed-akar aga e-machi abingas.

20 Imi teun Isaac Pab-penzhul-kujadbal aga e-machimal-Jacobga tegin Esaúga chogzhagusdo:

“Imi Pabdin pega immal-nuegan imakelen,

nabirin.”

21 Tenal Jacob pato purkwedanikidgin Pab-penzhul-kujadbal José-machimalga chogzha:

“Imi Pab Tummaddin pemalga immal-nuegan imakelen,

nabirin.”

Tenal Jacob kabastongin-kwichi tullu-imasgu,

Pab-Tummad-otummosbal.

22 Tenal José pato purkwedanikidgin Pab-penzhul-kujadbal chogzhamodo:

“Imi anmal-tulemal Egipto-akar kannan aknimalo.”

Tegin José chogzhabal:

“Pemal Egipto-akar aknidmalal,

an-kal chedmalmogo.”

23 Imi Moisés-patoun mimmilesgu,

e-pabgan Pab-penzhul-kujadbal ni-walapá Moisés-otusmal.

Tenal Moisés-e-pabgan takchado,

we machidin,

machi-nued.

Tenal Moisés-e-pabgan errey-igal-mezhijad kwen tobguszhul-kusmal.

24 Tenal Moisés nued chapingusgu,

Pab-penzhul-kujadbal yapa nugzhale-kus Faraón-e-chiskwa-e-machiga kugal.

25 Tenal Moisés aga tukin chogzhagus,

ede pul akalzhul Pab-Tummad-e-tulemalbak mes wilego,

pul iskuedbal immalmalgin íche yer wis itodi-kugal.

26 Tenal Moisés kujal Pab-neggin-immalmal-nuegan-nikuoedgin pul pinzhedii-choggu,

al Moisés tulemal-wagin Cristoga-pinkegued-igal pul nued takcha,

pul Egiptogin pela-pela immalmal-nuegan-nikugal.

27 Tenal Moisés Pab-penzhul-kujadbal Egipto-akar Faraón-ulujad kwen tobzhulidgin nad.

Imi tulemaldin aku Pab-Tummad-takmal.

Tenal Moisésdin purpal Pab-takchadyob unnigunoni.

28 Tenal Moisés Pab-penzhul-kujadbal Pab-Najad-Itoged itos,

tegin wanagakkin abe-nazhis,

Pab Tummad Israel-tulemal-abalgin melle machi-kepegined-mesgal.

29 Tenal Israel-tulemal Pab-penzhul-kujadbal Termal-Kinnid-abalgin neg-tinnagwadgin opasmal.

Tenal Egipto-tulemaldin Israel-tulemalyob Termal-Kinnid-neg-tinnagwadgin opaktemogan,

tenal Egipto-tulemaldin yabli pél ogangusmal.

30 Tenal Israel-tulemal Pab-penzhul-kujadbal ibakugle kannan-kannan Jericó-neg-kwebur ebirismalgu,

Jericó-neg-kwebur-emakal-chiid a-ito aglad.

31 Tenal ome-macherganbi-wijiid-Rahabdin Pab-penzhul-kujadbal,

tule-neg-algemalad-abingajadbal,

tule-Pabgin-kwen-ibzhaszhulmaladbak mes kwen purkwiszhul.

32 Imi an pemalga keg kwénna ukin palchogel,

tule-Pab-penzhulmalad igi kusmal.

Tenal an kwen unnijulbal pemalga pél palchoggal.

Imi an pemalga ampa-napi chunmagal:

Gedeóngin,

Baracgin,

Sansóngin,

Jeftégin,

Davidgin,

Samuelgin tegin Pab-kaka-palchogmaladgin.

33 Tenal we tulemaldin Pab-penzhul-kujadbal napa-pidgin nakwismal,

tegin tulemalga nuekwa igal-itosmal,

tegin Pab-ega-kaka-ukchadbal immal nikunonimal,

tegin achu-kinnidgin igal-kasmal melle e-kunmalgal.

34 Tenal we tule-Pab-penguszhulmalad cho-turmagwichidgin kwen kummaszhul-kusmal,

tegin we tulemal abonolesmalbal melle esgin-eyural purkwemalgal.

Tenal we tule-Pab-penguszhulmalad kal-nikchul-kudiidbal kal nikunonimal,

tegin we tulemal kal-nikunonikidgin pila-chenaidgin e-aichulmaladgin nakwismal.

35 Tegin omegan Pab-penzhul-kusmaladbal kannan tulachá e-kwenadgan-purkwismalad-abingasmal.

Tenal tule-Pab-penzhulmalad-pimaladdin chabzhul imalenonimalgu,

wileged-akar yapa nogusmal.

Al we tulemaldin kannan-tullejad-cholbal pul-ichejul immal-nuegan nikunonimalo.

36 Imi tule-Pab-penguszhulmalad-wal-walgwen,

tulemal targin istar todosmal,

tegin tulemal sapejul tar-sakismalbal.

Tenal tule-Pab-penguszhulmalad-pimalad ezha-tubgin etilesmal,

tegin oturdaleged-neggin oturdalesmalbal.

37 Tenal kwéntin akwagin sagyeal purkwismal.

Tenal kwéntin abal-chikal purkwismal.

Tenal kwéntin esgin-eyural purkwismalbal.

Tenal tule-Pab-penguszhulmalad-wilediidbal,

molyob oveja-uka tegin cabra-uka yosmal.

Tenal we tulemal immal-kwen-nikchul kudimal.

Tenal tulemal tar-ekindi-kusmal tegin chabzhul tar-imasmalbal.

38 Imi tule-Pab-penguszhulmalad,

tule-nuegan.

Al tule-iti-napkin-pukmalad,

istar tule-Pab-penguszhulmalad-takedbal,

tule-Pab-penguszhulmalad emal-abalgin ampagued-wilubzhulmalan.

Imi tule-Pab-penguszhulmaladdin neg-nikchulidbal tegin yalaganbal pipirmadimal,

tegin akwa-yabal tegin nap-ologana-yabal meggwisgusmalbal.

39 Imi we tulemal Pab-penzhul-kujadbal otummoledi-kusmal,

tenal we tulemal yabli Pab-ega-chogzhad-immal-uklegoed kwen abingaszhulmal.

40 Tenal Pab Tummad iktualeba anmalga pul igal-nued amis.

Al we tule-Pab-penguszhulmalad kep anmalbalbi Pab-peigujiidyob kunonimalo.