2 Tenal pe machergan-cheleganga pe chogo:

“Pe melle twagdar wilub-okpid-okpid immal imamalo.

Tenal pe nuekwa naneenabmal tulemal pegin atamalgal,

tegin pe pinzheed-nikadgin immal imakenabmalbal.

Tenal pemal napírra Pabgin penzhulinabmalbal,

tegin pe napírra Pab-pilalguenabmalbal.

Tenal pe Pab-igalgin abin-purtigenabmalbal.

Tenal pemal-chelegan an-chogzhadyob naneenabmal.”

3 Tito,

imi pedin omegan-cheleganga pe chogmogo:

“Pemal Pabgin-atakallé naneenabmal,

tegin pe melle tule-pidgin kakanzhaal nanao,

tegin pe melle mumurguo.

Tenal pe igal-nuegangin pe ome-pimalad-oturdakenabmalbal.”

4 Tenal omegan-chelegan an-chogzhadyob naneel,

kep unnigumalo omegan-nuchu-wal-walgwenad-oturdagal aga e-machered-pilalgugal tegin aga e-nuskan-pilalgugalbal.

5 Tenal omegan-chelegan ampa ukin omegan-pimalad-oturdakenabmalbal pinzheed-nikadgin immal imagal,

tenal we omegan melle kwinni-kwinni nanemalgal tenal nuekwa aga neg-takegal,

tegin tulemalbak yer nanemalgal,

tegin machered-ulpallí aga nanemalgalbal.

Al tulemal we omeganbal Pab-kakagin istar kwen chunmanonikojulmal.

6 Tito,

tenal pe machergan-chapinganaga pe chogmogo:

“Imi pemal pinzheed-nikadgin immal imakenabmal.”

7 Tenal pe pél immal-nued-imakedgin pe machergan-chapinganaga chagla-chienab nuedgin nanegal.

Tenal pe ulubgin akala-kwen-pinzhejulidgin tulemal-oturdako,

tenal pe melle todoed-kakagin tulemal-oturdabalo.

8 Tenal pe napírragwadgin tulemalga chunmakel,

tule keg pegin chogel pe noal chunma.

Tenal an-pega-chogzhadyob pe naneel,

tule-istar-pe-takmalad pegin pinkegumalo,

tegin tulemal pegin ib-choged nikchul-kunonimalo.

9 Tito,

imi pe tule-pinche-arpamaladga pe chogmogo:

“Pemal aga ibed-ulpallí pe naneenabmal,

meke-ibi-immal-imanaidgin yer pe aga ibed-imagal.

Tenal pemal melle aga ibedbak abin-abin-kumalo.

10 Tegin pemal melle ibedbi-immalmal aturzhao.

Tenal pemal aga pela-pela oyogenab pedin ibedga nuekwa pél immalmal takchii.

Al pemal meke-ibigin tulemalga oyogo Pab-anmal-abonoged-igaldin,

ib-nued.”

11 Imi Pab-wilejakwa-tule-taked-wilubzhulinadbal mag taklenoni,

tulemal-pel-kwapa nabir abonolenoniko.

12 Tenal Pab-tule-abonoged-igal anmal-oturdado,

anmal istar-naneed-igal ebegal tegin anmal iti-napkined-pinzheed-igal ebegalbal.

Tenal we igal anmal-oturdabal anmal imisgwadzhe pinzheed-nikadgin immal imagal,

tegin anmal napírragwadgin nanegal,

tegin Pabgin-atakallé-nanegalbal.

13 Tenal anmal abintabukmal anmal-Pab-kannaleged-nikad tegin anmal-abonoged-Jesucristo pela-pela nugu-taklegedgin tanikoedzhe.

14 Tenal Jesucristo purkwegal,

aga chan ukcha iskued-akar anmal-abonogal,

tegin chwilidik anmal-imagalbal tegin anmal egadga kugalbal.

Tegin Cristo-purkwisbal pe immal-nuegan-imakedginbi pinzhegal.

15 Imi an-pega-chogzhad-igalmalgin,

pel-kwapa pe tulemal-oturdako.

Tenal pe igal-nikadgin pe nuekwa tulemal-okannogo Pabbak-nanegal.

Tenal pe igal-nikadbal pe tulemalgin igal-kabalo melle iskuedgin nanegal.

Tenal pe melle tulemalga igal-ukpalo tule-pinchegadyob pe-takegalmal.