Pabloga pela-pela immal-oyolenonikidbal Pabloga poni nononigujad
12
Imi an naga tukin nug okannogel,
wedin ibga keg pel ku.
Tenal antin naga nug okannonemo.
Al antin purpal-immal-takchadgin,
tegin Pab-anka-immal-oyojadgin pemalga chunmanejun.
2 Imi an tule-kwen-taktido,
pirkaambe-kakabakegus Pab-neg-agla-páje arpigus.
Tenal an wichuldo,
we tule igi arpi,
sanal o purpal.
Tenal tule kwen wichul,
tenal Pab Tummaddin wisdo we tule igi arpigus.
3 Tenal an wisbaldo,
we tule Pab-neg-nued-negzhe nakwiap.
(Tenal an wichulbaldo,
we tule igi arpi,
sanal o purpal.
Tenal tule kwen wichul,
tenal Pab Tummaddin wisdo we tule igi arpigus.)
4 Tenal we tule immal-keg-choglemalad itos.
Imi we immal-choglejad igal-nikchul,
tule-pimaladga choglegal;
wedin izhe.
5 Tenal antin akalzhul wegiid-tule-nug okannogo,
tenal antin naga tukin an-immal-unnijulidginbi naga nug okannonemo.
6 ¿Ibiga an naga nug okannogo pe ebinzhe?
Nabir.
Tenal an naga nug okannobielen,
an akalzhul nug okannogoen.
Tenal an-chogzhiidyob an imakelen,
an-ib-chunchunnadgin-chunmadiidbal an tule-immal-kwen-wichulidyob kwen kunonikojulin.
Tenal an-chogzhadyob an kwen nanejul tulemal melle wilub-okpis ankin atamalgal,
tenal tulemal an-chunmakedbalbi tegin an-immal-imakedbalbi ankin atamalgal.
7 Tenal anka twagdar-peyedzhe immal oyolenoni-choggu,
al Pab anka sanal poni onos,
tule-changin iko yoyowidyob.
Imi we poni nia-Satanás-akar tani an-owiogal,
an melle twagdar tummarba-itogal.
8 Imi an ilapá Pabzhe wilesdo,
anka we poni ochulogal.
9 Tenal Pabdin anka chogzhado:
“An pe-pilaledbal tegin an pe-pentakedbal,
pedin unniguo we poni melle pegin nakwegal.
Tenal tule-unnijulidbal immal-imakel,
an-kannaleged we tulebal pela-pela oyolenoniko.”
Al antin-Pablo,
an yer-itodo,
an-unnijulidgin-immal-imakedgin an pul-pule chunmagal,
Cristo-kannaleged anpal pul-pule oyolenonigal.
10 Al an naga tukin unnijulidgin Cristoga immal imagal,
tegin tulemal istar ankin chunmakedgin,
tegin an wilegedgin,
tegin tulemal sapejul an-imadimaladgin,
tegin an poni-abalgin kudiidgin,
an yer itodo.
Tenal an walgwen kwen unnijul-kuo immal imagal,
tenal an kep Cristobal unniguo immal imagal.
Pablo kwenadgan-Corintogin-pukmaladgin pinzhedi-kujad.
11 An-imis-pemalga-chogzhadbal,
an tule-kegeyob kunoni.
Tenal pemal an-tikal-chognaidbal an weob chunmanonijun.
Tenal pemal an-nug okannoed-wilubmalan.
Tenal antin,
an tule-tummad chul,
tenal pemal keg ankin chogmalal,
antin tule-Pab-nuggin-palmilegalmalad-pul-nueganga,
pul tule-impaginegwad.
Tenal an tule-tummad chul.
12 Tenal pemal nued takchamal,
antin Jesús-nuggin-palmilegalid-chunchunnad.
Tenal antin pemal-abalgin-alamanaidbal an immal-taktijulmalad imas,
tegin an immal-tule-keger-taked imasbal oyogal an-chunmaked ib-chunchunnad.
13 Tede,
¿ibiga pe chogmaldé:
“Iglesia-pimalad pul iglesia-nued?”
¿An pemalga arpaged kwen onoszhulidbal an-akwegal,
al pe weob chogmaldé?
Imi an-pemalgin-walmajad naga igemalzhunno.
14 Imi antin ilabogus pato pemalzhe nane.
Imi an pemalzhe kannan nejogalbal.
Tenal an pemalzhe kannan nadbalil,
an pemalga arpaged kwen onogojulbal an-akwegal.
Imi an pemalzhe nanegwis,
pemalgin immal amigal chul,
tenal an pemal-pentabi-kunai.
Imi nuskan aga pabganga mani-chaboged-wilubzhul,
tenal pabgan aga nuskanga mani-chaboged-wilubmal.
Tenal pemal purpal an-nuskan-chunnad.
Al an pemal-pentaked-wilubmo.
15 Tenal an kuakwa kudido,
pemalgin pel-kwapa an-mani migal.
Tenal antin kuakwa kudibal,
pemal-anal pela-pela immal imagal.
¿Imi an-pemalgin-chogzhadyob,
an pela-pela pemal-pilaledbal,
pemal ampa an-kwen-pilal-chuldé?
Antin chog chul.
16 Tenal pemal keg ankin chogmalal,
antin pemalga arpaged onos an-akwegal.
Tenal tulemal-kwénna-kwénna yabli ankin chogmal,
antin pirkin-immal-wijiidbal tulemal-yardas.
17 ¿Tenal an pemalzhe tulemal-palmijadbal,
an pemal-yardagedgin pemalgin mani wes pe ebinzhe?
Chulá.
18 Tenal antin melu Titogin wiles pemalzhe negal.
Tegin an Titobak mes kwenad-pid-palmismo.
Imi teun Tito yardagedgin pemalgin mani kwen weszhul.
¿Tenal antin Titobak aga yopí pinzhemalzhulzhí immal imagal?
Teobdo.
¿Tegin anmal ampa yopí nanemalbalzhulzhí?
Teobdo.
19 ¿Tenal pemalde ebinzhemal,
anmalde naga-irwal chunmananimal?
Chulá.
Tenal antin Pab-Tummad-wagin chunchunnad Cristobal-naidgin pemalga chunmajii.
Kwenadgan-pilalmalad,
imi anmal pél immal-imamal purpal pemal-okannomalgal,
pemal nuekwa Pab-Jesúsbak nanegal.
20 Tenal an pukib-itobaldo an pemal-omojal,
an-pemal-takpiedyob an pemal-kwen-takojul.
Tegin pemal-an-takpiedyob pemal an-kwen-takojulmo.
Tenal an pukib-itobaldo,
an pemal-omojal,
pemal aga emal-emal imananimal,
pemal aga nobgunanimal,
pemal aga urwenanimal,
pemal aga nallegunanimal,
pemal aga emal-emal istar chunmananimal,
pemal aga emal-emal tikalbal chunmananimal,
pemal aga tummarba itonanimal,
tegin pemal aga nuekwa-nane-pukchulmal.
21 Tegin an pukib-itobaldo,
an pemal-omojal,
Pab Tummad pemal-assapin an-opinkegugwis.
Tenal an-chogzhiidyob melle kuelen,
nabirin.
Tenal an pemal-omojal,
an pukib-itobalo pemal-kwénna-kwénna nuekwa nanedijulidbal,
tegin pe omeganbak-yosgu-kudiidbal,
tegin pe kalagwenzhul kudiidbal,
pemal aga iskuedgin pukib-kwen-itogojulmal Pabbak igal-nudagal.
Al an pemalga pukib-itononikoedgin,
an pemalga podago.