2 Imi an nued wisdo,

pemal pela-pela kwenadgan-pentabimal.

Al an kwenamalad-Macedoniagin-pukmaladga pemal-nug-okannodi-kus.

An pemalgin chogdido,

pemal-Provincia-Acayagin-pukmalad pato pirkagwengus kuakwa pukwamal mani ukegal.

Tenal pemal pela-pela mani ukpi-kubuk-choggu,

al pemal kwenamalad-Macedoniagin-pukmalad-okannosmal mani ukegalmo.

3 Tenal anmal pemalga kwenamalad-palmine,

anmal pemal-nug-okannodiid melle ib-pinchegadga kugal,

tenal an-chogzhadyob,

mani-welejad kuakwa pato pukwagal.

4 Imi kwenadgan-Macedoniaginmalad anpak mes pemalzhe nadel,

tenal pemal arpak mani-ukchajulil,

an pe-nug-okannodiidbal an peyedzhe pinkegunonikoen,

tegin pemal pinkegunonimalmogoen.

5 Al an pinzhealzhun,

an pul-kwenadganga chogo pemalzhe negal.

Tenal pemal aga mes igal-nudamalo pe-akpene-kaka-ukchadyob yer-itogedbal mani-weigal.

Tenal an-pemalga-chogzhiidyob kunonikil an pemalzhe omojal,

mani pato kuakwa chio.

Tenal mani-kuakwa-weial-chii an takel,

wedin choglejun,

pemal aga ulubgin-yer-itogedgin mani ukchamal.

Tenal an takel mani-kuakwa-weial-chijul,

wedin choglejun,

pemal yapadgin mani ukmal.

6 Tenal pe immal-tigedgin pe nue pinzhao:

imi tule iché immal-tigel,

iché immal-weio;

tenal tule íchejul immal-tigel,

íchejul immal-weimogo.

Tenal pe immalmal-ukel,

pe immal-tigedyob pega kunonimogo.

7 Tenal pemalgin chiji pe melu immal ukpi.

Al pe aga ulubgin immal-ukedgin pinzhediidbal pe immal uked-wilubmal.

Tenal pe melle yapadgin immal uko.

Tegin tule-pid pe-cholpalmakedgin pe melle immal ukpalo.

Tenal tule weligwal-itogedgin immal ukel,

Pab Tummad yer tar-taknonimogo.

8 Tenal Pab Tummad unnio wilub-okpinal pemalga immalmal ukegalmo.

Al Pab Tummad pemalga immalmal ukchal,

pemal-immalmal-nikadbal pemal meke-ibi-ibegin,

tenal meke-ibimalagin kuakwa pukwamalo pela-pela tulemal-pentagal.

9 Tenal akpene Pab Tummad e-kartagin chogzhado:

10 Imi Pab Tummad tule-immal-tigmaladga,

immal-kwa uk tiggal,

tegin mas-kunned ukpal kunkal.

Tenal Pab tule-immal-tigmaladga immal-ukedyob pemalga immal-nuegan omelogo,

tule-pimaladga ukegal.

Al pemal pul-pule immal-nuegan-imakedgin nanemalo.

11 Al pemal pela-pela immal-nikunonikidbal,

pemal unnio,

pane-pane tulemalga immal ukegal.

Imi an-pemalga-chogzhadyob kunonikil,

Pabdin anmalbal otummoledi-kuo.

12 Imi pemal-tule-Pabzhikmaladga-immal-ukedbal tule-Pabzhikmalad immal kwen napijul-kumalo.

Tenal tulemal Pab Tummadga pela-pela tog-nuedi chognonimalbalo.

13 Imi pemal tulemal-pentakedbal oyolenanimal,

pemal chunchunnad Pab-Jesús-kaka-nueganbal naigusmal.

Tenal pe Jesús-igal-mezhijadbal pe nanedimalal,

tule-yer-pe-itosmaladga tegin tule-pimaladga pe yer-itogedgin immal-ukedbal,

tulemal Pab-Tummad-otummononimalo.

14 Imi Pab-pemalgin-nugu-pinzheed-wilubzhulinadbal,

Pab pemalga immal-imajadbal pe pela-pela tulemal-pentadimal.

Al tule-pentaklenonimalad pela-pela pemal-pilaledgin,

pemalga Pabzhe kolnonimalo.

15 Tenal antin Pab Tummadga tog-nuedi chog,

Pab pinche anka Jesucristo-ukchadbal,

an wichul Pab Tummadga igi chogel nabir.

Antin,

an kakamakal-pes.