¿Tenal pe ebinzhemalbal,

anmalde pemal-karta napimalbal choggal,

anmal Pabga-nued-arpamalad?

Chulá.

Tenal anmal karta kwen napijulmal.

2 Imi pemaldin anmalga-karta-nermakaledyob kumal.

Al anmal-naga-ulubgin pemalgin-yer-itogedbal,

unnikúaledzhe oyonai,

anmal Pabga-nued-arpamalad.

Imi tulemal-pel-kwapa nabir pe-takedbal pemal-wismal,

pemal nued nanedimal.

3 Imi anmal-Pabga-arpagedbal,

pemal Cristobal naigunonimal.

Al pemaldin pe-Cristo-abingajadbal chunchunnad oyonanimal Cristo anmal-palmis,

Cristo kartabal anmalgin kaka-palmijadyob.

Tenal pemal kartayob tintagin kwen nermaleszhulmal,

tegin Moisés-igal akwa-mataragwadgin nermakal-maidyob kwen nermaleszhulmalbal.

Tenal pemal aga ulubgin Pab-Tummad-Tulad-Purpa-Nuedgin nermalesmal.

4 Tenal an-pemalga-chogzhad an Pab-wagin Cristobal kwen penzhul,

wedin ib-chunchunnad.

5 Tenal anmal aga tukin keg chogel,

anmal unni immal imagal.

Tenal Pab anmal-pentakedbal,

kep anmal unnio pél immal imagal.

6 Tenal Pabdin anmal-pentadii e-igal-pin-mezhijadgin arpamalgal.

Tenal we igal-pin pinche sanal kwen nermaleszhul,

we igaldin purpal.

Tenal Moisésbal-igal-sanal-nermalejad tule-opurkwe,

tenal Pab Purpa Nueddin tule-otulo.

7 Imi akpene Pab Tummad akwa-mataragwadgin Moisésbal-igal-mezhijad purkwegal tule-imas.

Tenal Moisés-igal pela-pela yer-taklegedgin noni.

Al Moisés-wagal pi-pi-pip-kaedbal,

Israel-tulemal kwen unniguszhulmal nuu Moisés-takegal.

Tenal te-cholbal Moisés-wagal-pi-pi-pip-kaed pinna-pinna pelgumai-kus.

8 ¿Tenal Pab-E-Purpa-Nuedbal-igal-pin-mezhijad,

pul yer-taklegedgin-nonijulzhí?

Teobdo.

9 Tenal Moisésbal-igal-nonikidbal tule Pabbak poni onononimal.

Tenal Moisés-igal ib-nued.

Tenal tule-Pabbak-igal-nudanonikoed Moisés-igalga pul-pule ib-nued.

10 Imi kepegin Moisés-igal ib-nuedga main.

Tenal Pab-igal-chunchunnad nonigu,

Pab-igal Moisés-igalga pul ib-nuedga-maidbal,

Moisés-igal kep ib-keg-kuedga kunonijun.

11 Imi Moisés-igal-pelgudanikid ib-nued taklegendo,

tenal Pab-igal-keg-pelgueddin pul-pule ib-nueddo.

12 Imi anmal nued wismal-choggu Pab-igal-pin-mezhijadbal anmalga ib-nuedga kunoniko,

al anmal tobzhulidgin Pabga arpananimal.

13 Imi Moisés Israel-tulemaldu,

e-wagal-pi-pi-pip-kaed melle ebi takegal wagal chaktigedyob,

anmal otukal kwen chunmadijulmal,

anmal pakal-pud-pud chunmadimal.

14 Tenal Israel-tulemal Moisés-igal aku-itononimal.

Tenal imisgwadzhe Israel-tulemal Pab-akpene-Moisésbal-igal-mezhijad apchosmalal,

ampa aku-itomal,

immal molgin chaktigaledyob.

Tenal tulemal wagal-irwal-mol-naid-chujadyob,

kep Cristobal mag itononimal,

Pab Tummad akpene igi chogzhagujad.

15 Tenal Israel-tulemal ampa imisgwadzhe Moisés-igal-maid apchogalmalal,

ampa yapadbal keg ibzhemal,

immal molgin chaktilegedyob.

16 Tenal tule-walgwen Pabzhik akpirijal,

mag Pab-itononiko,

immal molgin chaktilejiid midedyob.

17 Tenal Pabdin,

Purpa-Nued-choggu,

al Pab Purpa Nued meke-pia mail,

tulemal olol irmamal.

18 Tenal anmal-pel-kwapa wagal-kagi-irmakedbal,

tulemal anmalbal Pab-e-taed-yer-takleged taknonimalo.

Tenal anmal-pel-kwapa naga taedbal ogwaledanimal,

Pab-e-taed-yer-taklegedzhe.

Tenal anmal pane-pane pul-pule Pab-e-taed-yer-taklegedzhe ogwalemai.

Tenal anmal-taed-yer-takleged Pab-akar tani.

Tenal Pabdin Purpa-Nued.