Pab Purpa Nuedbal kurkin-purpaled uklegoed
12
Kwenadgan,
imi antin peichuldo,
pemal wichul-kumal,
kurkin-purpaledde,
ibi chogle-wede.
2 Tenal pemal nued wismaldo,
pe ampayo Pab-Jesús-abingeeddu,
pe kusgu chowal-mimmi-keg-chunmakedzhe pinzheed-kaledimalan.
3 Al an pemalga chogzhundo,
tule Pab Purpa Nuedbal chunmadiil,
tule keg Jesúsgin chogel:
“Jesús Pab-wagin-tule-iskujad.”
Tenal tule Pab Purpa Nuedbalbi nabir chogo:
“Jesús egmal-tummaganga Pul-Tule-Tummad.”
4 Imi kurkin-purpaled akal-akal nika-ne,
tenal Pab-Purpa-Nued-kwénnagwad-akar tani.
5 Tenal Pabga-arpaged akal-akal nika-nebal,
tenal ampa Pab-Jesús-kwénnagwad-akar tanibal.
6 Tenal kannaleged akal-akal nika-nebal immal imagal,
tenal Pab-Tummad-kwénnagwad pel-kwapa tulemalgin immal ima.
7 Imi kwenadgan-ilbal Pab Purpa Nued kurkin-purpaledbal mag taklenoni kwenamaladga pel-kwapa ib-nuedga kugal.
8 Tenal Pab Purpa Nuedbal kwénna-kwénna Pabbal-nanimaladga igal-ukles-ne napírra pinzheed-nikadbal chunmagal.
Tenal Pab Purpa Nuedbal,
Pabbal-nanimalad-pimaladga igal-ukles-nebal,
pirkin immal-wijiidbal chunmagal.
9 Tenal Pab Purpa Nuedbal Pabbal-nanimalad-pimaladga igal-ukles-nebal pela-pela Pab-penzhulidgin nanegal.
Tegin Pab Purpa Nuedbal Pabbal-nanimalad-pimaladga igal-ukles-nebal tule-yemalad-nudagal.
10 Tegin Pab Purpa Nuedbal Pabbal-nanimalad-pimaladga igal-ukles-nebal immal-taktijulmalad imagal.
Tegin Pab Purpa Nuedbal Pabbal-nanimalad-pimaladga igal-ukles-nebal Pab-kaka palchoggal.
Tegin Pab Purpa Nuedbal Pabbal-nanimalad-pimaladga igal-ukles-nebal purpal mag immal takegal,
Pabgad-dewa o niagad-dewa.
Tegin Pab Purpa Nuedbal Pabbal-nanimalad-pimaladga igal-ukles-nebal kaka-pimaladgin chunmagal.
Tegin Pab Purpa Nuedbal Pabbal-nanimalad-pimaladga igal-ukles-nebal kaka-pimalad-chunmalejad pal ogwagal.
11 Tenal we kurkin-purpalmalad pel-kwapa choglejad Pab-Purpa-Nued-choggwénnagwad-akar tani.
Tenal Pab Purpa Nued aga itolegedbal,
Pabbal-nanimalad-ilbal kurkin-purpalmalad ukta.
Pab-Jesúsbal-nanimaladga kurkin-purpaled akal-akal ukleged
12 Tenal tule-chan walkwénnagwando,
tenal chan akal-akal nika-ne,
kaka,
azhu,
imia tegin chuchu.
Tenal anmal-chan akal-akal nikando,
tenal ampa chan-walkwénna.
Tenal Cristo ampa anmal-chan walkwénnagwadyobmo.
13 Imi Pab-Purpa-Nued-walkwénnagwadbal anmal-tigin-oglejadbal tule-chan-walkwénnagwadyob kunonimal.
Tenal anmal Pab-Purpa-Nued-walkwénnagwadgin ukpononimal,
meke Judiomal,
meke Judiojulmalad,
meke tule-pinche-arpamalad,
meke tule-ololchalmalad,
pel-kwapa.
Tenal anmal-pel-kwapa Pab-Purpa-Nued-walgwénnagwad-abingasmal,
tulemal kobed-choggwénnagwad kobedyob.
14 Al an pemalga chogzhundo,
tule-chan walkwénnajul,
anmal chan-ichéjul nika.
15 Imi nag chogelen:
“An chunkal chul-choggu,
al antin tule-chan-e-pakad-chul.”
Tenal nagdin,
ampa tule-chan-e-pakadmo.
16 Tenal chuchu chogelen:
“An imiajul-choggu,
al antin tule-chan-e-pakad-chul.”
Tenal chuchu,
ampa tule-chan-e-pakadmo.
17 Imi tule-chan pel-kwapa imiabi taklegelen,
¿tede tule igi itogo?
Keg kue.
Teginbal,
tule-chan pel-kwapa chuchubi taklegelen,
¿tede tule igi immal-yapaned itogo?
Keg kue.
18 Tenal Pab Tummad e-peigujadyob inniki-inniki tule-chan urpis-ne.
19 ¿Imi tule tuwabi taklegelen,
tegin imiabi taklebalilen,
e-chande pia nadzhun?
20 Tenal anmal-chan-koagan ichejulindo,
tenal anmal-chan ampa walkwénna.
21 Imi imia chunkalga chogelen:
“An pe-kwen-napijul.”
Tegin nonode nagga chogmogalen:
“An pe-kwen-napijulmo.”
¿Tede chanmalde igi aga pentamalo?
Keg kue.
22 Tenal chanmal pul-pule aga pentamalgalan.
Tenal anmal-chan-pul-pollé-takleged,
pul-chunchoged.
23 Tegin chan pul-pollé-takleged,
tule pul yer akwemal.
Tegin chan tule-opinkezheed,
anmal pul yer molgin chabomalbal.
24 Tenal tule-chan-pul-akalzhul-oyolegeddin,
pul-chunchoged-chul.
Tenal Pab Tummad tule-chan imas,
chan-akue-oyoleged pul-nuekwá chabogal,
25 we chanmal,
melle aga noal takmalgal,
tenal chanmal aga yopí-yopí akwemalgal.
26 Imi tule-chan-choggwénnagwad nunmakel,
pel-kwapa tule-chan nunma.
Teginbal,
tule-chan-choggwénnagwad yer itogel,
pel-kwapa tule-chan yer itomo.
27 Imi pemal Cristo-e-chanyob-choggu,
al pemal-ilbal,
e-chan choggwénnagwadyobmo.
28 Tenal Pab Tummad iglesiagin pul-tummadga Jesús-nuggin-palmilegalmalad-urpis,
tegin te-cholbal Pab-kaka-palchogmalad,
tegin te-cholbal tulemal-oturdamalad,
tegin te-cholbal tule-immal-kwen-taktijulmalad-imamalad,
tegin tule-kurkin-purpaled-nikmalad tule-yemalad-nudagal,
tegin tule-pentamalad,
tegin tule-iglesiagin-immal-takmalad,
tegin tule kaka-pimaladgin-chunmamalad-urpisbal.
29 ¿Imi tule-pel-kwapa Pab-Jesús-nuggin-palmilegalmaladga urpilesmal?
Chulá.
¿Tegil tule-pel-kwapa Pab-kaka-palchogmaladga urpilesmal?
Chulá.
¿Tegil tule-pel-kwapa tule-oturdamaladga urpiles?
Chulá.
¿Tegil tule-pel-kwapa immal-kwen-taktijulmalad-imamaladga urpiles?
Chulá.
30 ¿Tegil tule-pel-kwapa kurkin-purpaled-nikadbal tule-yemalad-nudamaladga urpiles?
Chulá.
¿Tegil tule-pel-kwapa kaka-pimaladgin-chunmamaladga urpiles?
Chulá.
¿Tegil tule-pel-kwapa kaka-pimalad-ogwamaladga urpilesbal?
Chulá.
Tenal Pab-Purpa-Nued-peigujiidbal anmal-ilbal urpiles Pabga arpagal.
31 Tenal pemal Pabgin pela-pela kurkin-purpalmalad-pul-chunchoged amimalo.
Kwenadgan pilaledgin-immal-imaked, pul-ib-chunchoged
Imi pemal wismalgal,
an pemalga pul igal-nued chogne.