Tenal anmal wismaldo,

anmal-pel-kwapa Pab-Jesús-igal wismal.

Tenal tule pirkin-igal-wijiil,

tummarba tule-ima.

Tenal tule pilaledgin naneel,

tule-penta Pab-Jesúsgin tunkugal.

2 Tenal tule-walgwen chogel ede pél immal wiis,

we tule ampa immal kwen wichul,

ampa peyedzhe napi.

3 Tenal tule Pab-nued-pilalel,

Pabdin mag we tule-takmogo.

4 Tenal tule-chowal-mimmiganga-immal-chan-ukchadbal an immal-chan-kunmalad-igalgin,

an chunmanejun.

Imi anmal nued wismaldo,

chowal-mimmigan iti-napkin ibga keg pel ku,

tenal Pab Tummadbi,

Pab Tummadga walkwénna mai.

5 Tenal tulemal chogmal,

pab-tummagan ichejul nika-ne,

tegin tule-tummagan-purpalmalad ichejul nika-nemalbal.

Tenal tule weob chogzhad ib-chunchunnadzhul.

6 Tenal chowal-mimmigan nikpa-neggin o iti-napkin pab-tummaganga mamimalalen,

tenal anmalgadin ampa Pab-Tummad-Tuladbi walkwénna maido.

Tegin Jesucristobi walkwénna tule-tummadga maibaldo.

Tenal immalmal-pel-kwapa Jesucristobal Pab-Tummad-akar tani.

Tegin anmal Jesucristobal tula-kudimalbal Pab Tummadga pél immal imagal.

7 Tenal tulemal ampa kwénna-kwénna we igal kwen wichulmal-choggu,

al kusgu chowal-mimmiganga chan-uked-igalgin ampa pinzhealdamal.

Al tulemal chowal-mimmiganga-chan-ukchad kunnalil,

ampa chowal-mimmigangin pinzhealdamalbal.

Tenal tulemal pab-tummad-pidyob ampa chowal-mimmigan-tak-choggu,

al tulemal ampa tobe-tobe we chan kunmal.

Al we tulemal Pab Tummadbak iskusmalzhun.

8 Tenal mas-kunned tule-kwen-pentajul,

Pab Tummadbak ai-nuedga kugal.

Tenal anmal mas kuchal,

Pab-wagin anmal-kwen-nudajul.

Tenal anmal mas kunchulbalil,

Pab-wagin ampa anmal-kwen-izhojulbal.

Al we igal ampa pog-pel yopígwadbi.

9 Imi pemal-Pab-nued-wismalad,

pe nuekwa pinzhemalo,

akpenegwad-igalgin-kalesgudiid-akar pe nojadbal,

pe melle iskuedgin kwenad-nue-Pab-Jesús-wichulmalad-egwano.

10 ¿Ibiga an pemalga weob chog?

Imi pe pirkin Pab-igal wiis-choggu,

al tule-nue-Pab-Jesús-wichulid chowal-mimmiganzhe-koled-neggin mas-kunchii pe takalil,

¿ampa penedgin chowal-mimmiganga-chan-ukchad kunmogojulzhí?

Teobdo.

11 Tenal Cristo nakrusgin ampa we kwenadga purkwismo-choggu,

¿tede,

pe ibiga Pab-Jesús-igal-wijiidbal we kwenad-nue-Pab-Jesús-wichulid-izhomal?

Pemal weob kwenad-imaked-wilub-chul.

12 Tenal pe Cristogin-kwenad izhononikil,

pe pukib kwenad-opinzhenaidbal,

pe Cristogin walmanaimo.

13 Al an chogzhundo,

an takel,

an chan-kunnoedbal iskuedgin Jesúsgin-kwenad-egwano,

antin chan pal kwen kunnojul,

melle iskuedgin Jesúsgin-kwenad-egwangal.