Pablo chogzhagujad: “Pe melle kwenadgin istar chunmako we tule nued nanedii o chul”
14
Imi kwenadgan-wal-walgwen-ampa-Pab-wis-penmaladdin,
pe nuekwa tar-abingemalo.
Tenal pe melle e-igal-naneedgin pe akal-akal chunmamalo pe melle aga abin-abin imamalgal.
2 Imi tule-wal-walgwen-Pab-kwen-penzhulmalad akalzhul meke-ibi-immala kunmalo.
Tenal tule-wal-walgwen-Pab-wis-penmalad keg chan kunmal,
pinche immal-turpabi kunmal.
3 Imi pedin meke-ibi-mas pél nabir kunnel,
pe melle tule-kegeyob pe tule-wichul-immalmal-kunned-takmalo.
Tenal tule-wichul-immalmal-kunmaladdin,
melle istar tule-meke-ibi-mas-nabir-kunned takmogo.
Tenal pe istar tulegin chogel,
pedin pato nosmo.
Tenal Pab Tummad pel-kwapa we tulemal-abingas.
4 ¿Imi pede ibi-tule-ade,
pe tule-pid-mos-arpagedgin chunmagal?
Tenal mos-e-tummadgin chii,
choggal,
we mos immal nued imas o chul.
Tenal Pabdin kannaleged nika we tule-unnigugal nued nanegal.
5 Imi tule-wal-walgwen pinzhemal:
“We ibe,
pul-ibe-chunchoged,
pul ibe-pimaladga.”
Tenal tule-pimaladdin chogmalmo:
“Ibemal pél yopígwadbi.”
Tenal tule-ilbal aga ulubgin mag itogenabmal,
wedin igal-nued.
6 Imi meke-ibi-tule aga ulubgin itogel:
“We ibe,
pul-ibe-chunchoged,”
we tuledin e-chogzhadbal Pab-Tummad-otummonai.
Tenal tule chan kunnoedbal,
Pabga tog-nuedi chogzhadgin Pab-otummonaimo.
Tenal tule wichul chan-kunnel,
chan-kunchulidbal Pabga tog-nuedi chogzhadgin Pab-otummonaimo.
7 Tenal tule-pel-kwapa aga tukin tula-tijulmal,
tegin tule aga tukin purkwejulmalbal.
8 Imi anmal tula-tiil,
Pabga tula-tii.
Tegin anmal purkwijal,
Pabga purkwis.
Al an tula-tiil,
an purkwel,
anmal Pabga kudii.
9 Al Cristo purkwis tegin purkwaled-akar kannan tullenonibal,
tule-tulamaladga tegin tule-purkwismaladga e-tummadga kugal.
10 ¿Tede pe ibiga aga-kwenad-uachogmalzhun?
¿Tede pe ibiga tule-kegeyob aga-kwenad-takmalzhun?
Tenal pemal kwenadgan-uachoged-wilub-chulmalan.
¿Imi pe wismalzhulzhí anmal-pel-kwapa Pab-assapin ampagunonimalal,
Pab anmalzhe pél immal ekisnoniko?
11 Imi Pab-kartagin nermakal maimodo:
Pab Tummad chogdo:
“Imi an chunchunnad tula mai,
an purkwal chul.
Al tule-pel-kwapa keg-chulgu
an-assapin yokorgin chimudigal chimtinonimalo.
Tegin anka pel-kwapa chogdamalo:
‘Pedin,
pe Pab Tummadga maiye.’ ”
Is.
45:23
12 Al anmal-ilbal Pabga pel-kwapa chognonimalo an ibi imas.
Pe melle iskuedgin kwenadgan-egwano
13 Tenal anmal melle aga emal-emal uachogmalo.
Tenal anmal pul-pule nuekwa pinzheenabmal an-immal-imakedbal an melle iskuedgin kwenad-egwangal.
14 Imi an Pab-Jesúsbak nuekwa kudiidbal,
an nued wisdo,
mas-kunned-kwen-nikchul izhe kunkal.
Tenal tule takel mas-kunned izhe kunkal,
we mas kunned we tulega izhe kunoniko.
15 Imi kwenad-walgwen pe-takchal mas-ega-izhe-kulleged kunchii,
we kwenad pukib-itononiko.
Tenal kwenad pe-mas-kuchadbal pukib-itononikil,
pedin pato kwenad-pilaledgin kwen nanejul.
Imi Cristo pe-kwenadga purkwis-choggu,
al pe-mas-kuchadbal pe melle kwenad-izhononiko.
16 Imi pemal yer Pab-igal takmaladbal pe melle tulemalga igal-uko Pab-igalgin istar chunmagal.
17 Imi Pab-neg-takmaid-igaldin kwen chogzhul tule igi mas kunnenab tegin tule ibi kobenabbal.
Tenal Pab-neg-takmaid-igaldin chogdo Pab Purpa Nuedbal tule immal-nuegan-imakenab,
tegin tule aga ulubgin-akalzhul-itogenab,
tegin tule weligwal-itogenabbal.
18 Imi meke-ibi-tule Pab Purpa Nuedbal Cristoga immal imakel,
Pab Tummad yer we tule-taknoniko.
Tegin tulemal yer we tule-immal-imaked itononimalmogo.
19 Al anmal pela-pela alamakenabmal ukin negal aga pulakwa akalzhul ampagumalgal.
Tegin anmal alamakenabmalbal Pab-igalgin aga muchub-muchub-pentakedbal tunkugal.
20 Imi pe-mas-kunnedbal pe melle Pab-kwenad-ulubgin-arpajad izhononiko.
Imi mas-kunned kwen nikchul izhe kunkal.
Tenal pe mas-kunnedbal iskuedgin tule-pid-egwachal,
pedin pato nos.
21 Imi antin,
an takto,
pe pul melle chan kunno,
tegin pe melle vino kobo,
tegin pe melle immal-pid imabalo,
pe pul iskuedgin kwenad-egwangal.
22 Imi we igal-an-pega-chogzhadgin pe igi aga ulubgin pe pinzhedídin,
pe Pabbakpí unnila apinni pe chunmakenabmal.
Imi tule igal-abinchujadbal aga ulubgin akal-kwen-itojulil,
ib-nued we tulega kusdo.
23 Tenal meke-ibi-tule penedgin mas-kunned kunnel,
we tuledin pato aga tukin chogzha ede keg-chulgu Pab Tummadzhe sapejul oturdaleged-wilub.
¿Ibiga an teob chog?
Nabir.
Imi meke-ibi-tule penedgin immal imakel,
wedin iskued.
Al tule penedgin mas kunnel,
pato iskuedgin nanedii.