Pablo Abrahambal anmalga chagla-chis Pabgin-penzhulidbal tule-iskued-nikchulidyob kunonigal
4
¿Imi anmal-tad-sagla-Abrahamga tule-iskued-nikchulid-igalgin igi ka kus pe ebinzhe?
2 Nabir.
Imi Abraham maigusgu,
¿e-immal-imajadbal Pab tule-iskued-nikchulidyob Abraham-taknoni pe ebinzhe?
Chulá.
Imi Abraham immal-imajadbal tule-napírragwadilen,
Abraham igal-nikujan tummarba itogal.
Imidin Abraham Pab-wagin igal-kwen-nikchul-kus aga tummarba itogal.
3 Imi Pab-kartagin ampa chogmodo:
Imi Abraham aga ulubgin Pab-Tummad-penzhul-kunonikidbal,
Pab Tummad tule-iskued-nikchulidyob Abraham-taknoni.
Gn.
15:6
4 Nabirdo.
Imi tule arpajadbal keg-chulgu ka mani uklenoniko.
Tenal tulega pinche mani uklegojul,
e-arpajadbal tulega mani ukleged-wilub.
Imi Pab Tummad ampa teopí tule-immal-imakedbal tule-takmalmo.
5 Tenal tule aga immal-imakedbal chogzhul Pab Tummadbak igal-nudas,
tenal tule Pabgin-penzhul-kunonikidbal,
Pab Tummad kep chogdago ede tule-iskued-nikchulidyob tule-iskana-ima.
Al Pabdin tule-iskued-nikchulidyob tule-Jesúsgin-penzhulmalad-taknoniko.
6 Imi David chogzhamodo:
“Imi Pab Tummad tule-immal-nuegan-imajad takchulil,
tenal Pabdin tule-iskued-nikchulidyob tar-taknonikil,
ib-nued we tulega kus.”
7 Al David Pab-kartagin chogzhabaldo:
Imi tule Pabgin-walmajadbal,
Pab we tulega
e-immal-akalosmalad pelgus chogzhal,
tegin Pab ka iskued elinonibalil,
ib-nued we tulega kus.
8 Imi Pab Tummad tuleje
iskued pal ekisojulidbal,
ib-nued we tulega kusbal.
Sal.
32:1-2
9 ¿Imi David-chogzhadyob,
tule-abgan-chikalmaladgabi unnila ib-nued kus,
o ampa tule-abgan-chikalzhulmaladgamo?
Nabir.
Imi anmal chogzhamaldo:
“Anmal-tad-sagla-Abraham Pab-Tummadgin-penzhulidbal tule-iskued-nikchulidyob kep taklenoni.”
10 ¿Tede inkwa tad-Abrahamgin teob choglesdé?
¿Imi Abraham abgan-tuku-chiklejadgin,
o ampayo abgan-tuku-chiklegeddu?
Ampayo abgan-tuku-chiklegeddudo.
11 Imi teun takalgu,
Pab Tummad kep abgan-tuku-chikleged-igalgin Abrahamga wilub onos,
oyogal Abraham ampayo abgan-tuku-chiklegeddu,
Pab-Tummadgin-penzhulidbal Pab Tummad tule-iskued-nikchulidyob Abraham-taknoni.
Al tule-pel-kwapa abgan-tuku-chikalzhulmalal tenal Pabgin-penzhulmalal,
we igal Abraham-akar tani.
Al we tulemal,
tule-iskued-nikchulmaladyob taklenonimalzhun.
12 Tenal tule-abgan-tuku-chikchamalal,
tenal Abraham ampayo abgan-tuku-chiklegeddu Pabgin-penzhul-kudiidyob Pabgin-penzhul-kunonimalal,
we igal ampa Abraham-akar tanibal.
Anmal-Pabgin-penzhulidbal, Pab-Abrahamga-kaka-ukchadyob anmalga kunonimogo
13 Imi teun takalgu,
Pab Tummad Abrahamga tegin e-wagwaganga kaka-ukcha iti-nap-naid-ugakche egadga kuo,
tenal tulemal Moisés-igal-mamikid-pallí immal-imadiidbal-chul.
Tenal Abraham-wagwagan Pab-Tummadgin-penzhulidbal tule-iskued-nikchulidyob taklenonikidgin,
iti-nap Abraham-wagwaganga kunoniko.
14 Imi tule-Moisés-igal-mamikid-pallí-naneedbal,
Pab Tummad targa immal-nuegan ukelen,
tule-Pabgin-penzhulid ibga pal kwen kunonikojulin,
tegin Pab-Tummad-kaka-ukchad ib-pinchegadga kunonibaloen.
Imidin Pab-kaka-ukchad ib-nuedga kunonijun.
15 ¿Ibiga an teob chog?
Imi tule igal-mamikid-pallí nanejulil,
peyedzhe oturdalenoniko.
Tegin tulega we igal mamijulilen,
tule keg we igalgin walmamalan.
16 Al pe Pab-Tummad-Abrahamga-kaka-ukchad abingebiel,
pe Pabgin-penzhul-kuenabmo,
tegin Pab-kaka-ukchad kep pegadga kunonimogo.
Imi Pab peigujii iskued-nikchulidyob-anmal-imaked-wilubzhulinadbal Pab iskued-nikchulidyob anmal-imagal,
Pab Abrahamga kaka-ukchadyob.
Al Pab pel-kwapa Abraham-e-wagwaganga,
keg-chulgu kaka-ukegalmo,
tule-Moisés-igal-mamikidgin-nanemaladgabijul,
tenal tule-pel-kwapa Abrahamyob Pabgin-penzhulmaladgamo.
Al Abraham pel-kwapa tule-Pabgin-penzhulmalad-e-tad-saglaga maido.
17 Tenal Pab-kartagin ampa Abrahamgin nermakal maimodo:
Imi Pab Tummad chog:
“Imi antin,
tule-iti-napkin-pukmalad-akal-akal-chunmamaladga,
e-tad-saglaga pe-imako.”
Gn.
17:5
Al Pab-Tummad-wagin Abraham anmal-tad-saglaga mai.
Imi Pab Tummad tule-purkwaled-otuloged.
Tegin Pab Tummad ampayo-immal-kueddu immal-kujadyob chunmaked-tulemo.
Imi Abraham Pab Tummadgin weob penzhul-kunoni.
18 Tenal Abraham Pab-ega-chogzhadgin pengued-wiluban.
Tenal Abraham Pab-Tummad-chogzhadgin yabli kwen penguszhul-kus,
ede machi-nikunoniko.
Al Abraham tule-akal-akal-e-tad-saglaga kunoni,
Pab Tummad Abrahamga chogzhad-kujad-yopí:
Pe-wagwagan íchejul ampagunonimalo.
Gn.
15:5
19 Imi Abraham pirka-tulaataled-kuchale nikunonigu,
Abraham aga mag itononi ede nuchu-nikued-wilub chul.
Imi teun takalgu,
e-ome-Sara pato seredgusmo.
Tenal Abraham Pab Tummadgin yabli kwen penguszhul-kus ede nuchu-nikune.
20 Imi Abraham abal-abal Pabgin kwen pengunonijul,
tenal Abraham pul-pule Pabgin ibzhenoni.
Al Abraham Pab-otummodi-kus.
21 Imi teun Abraham kwen penguszhul,
Pab Tummad kannaleged nika e-kaka-ukchad-pallí immal-imagal.
22 Al Pab-kartagin nermakal maido:
Pab Tummad tule-iskued-nikchulidyob
Abraham-taknonijun.
Gn.
15:6
23 Tenal Pab-kartagin-choglesmaid Abrahamginbi kwen chogleszhul,
tenal anmalgin ampa choglesmo.
24 ¿Igijun?
Nabir.
Imi Pab Tummad purkwaled-akar kannan anmal-Tummad-Jesús-otulos.
Tegin anmal Pab Tummadgin kwen penzhulmalal,
Pab Tummad ampa tule-iskued-nikchulidyob anmal-taknonimalmogo.
25 Tenal anmal-Tummad-Jesús anmal-iskuedbal tulemalga purkwegal ukles.
Tegin Jesús purkwaled-akar kannan tullesbal,
tule-iskued-nikchulidga anmal-imagal.