Saulo Pab-Jesúsbal naigujad
9
Tenal Saulogin-urwed-nakwijadbal Saulo Pab-Jesúsgin-ibzhemalad-mesbi-kualzhun.
Al Saulo tule-irwal-Pabzhe-kolmalad-pul-tummadzhe nad,
karta amigal Jesúsgin-ibzhemalad-Damascogin-pukmalad-kanegal.
2 Tegin tule-irwal-Pabzhe-kolmalad-pul-tummad Sauloga karta ukcha,
Damascogin Judio-ormaked-neg-e-tummaganga chedgal.
Tenal we karta Sauloga igal-ukcha Pab-Jesúsgin-ibzhemalad,
machergan,
omegan-ugakche kanegal,
tegin Jerusalénzhe kannan chedagal.
Tegin Saulo karta amisgu,
Damascoje nadzhun.
Conversión de Saulo (Hechos 9.1-19)
3 Tegin Saulo Damasco-neg-kwebur-omodanikidgin,
arpak nikpa-akar immal takár Saulogin kanoni.
4 Tegin Saulo napkin agladgu,
itos tule eje kol:
“Saulo,
Saulo,
¿ibiga pe peyedzhe chabzhul an-imanai?”
5 Tegin Saulo tule-eje-kolnonikidzhe kote:
“Tummad,
¿pede,
toa-tule-ade?”
Tegin tule kannan kolnonibal:
“Antin,
an Jesús,
pe-chabzhul-an-imanaid.
6 Imisgin pe kwisgu,
tegin pe neg-kwebur-Damascoje nao.
Tegin we neg-kweburgin pega choglego,
pe ibi imakenab.”
7 Tegin tulemal-Saulobak-natapmalad peyedzhe kwakijadbal,
keg pel chunma-pesmal.
Tenal Saulo-e-pakamalad tule-koled itosmogan,
tenal tule-kwen-takchajul-kus.
8 Tegin Saulo kwisgusgu,
pato aku ata-pes.
Tegin Saulo-e-pakamalad chunkalgin-ankaal Damasco-neg-kweburzhe Saulo-chesmalzhun.
9 Tegin Saulo ibapá Damascogin megwis,
aku pel ata.
Tenal teun Saulo mas pel kwen kunchul,
tegin kobed pel kobzhulbal.
10 Imi teun takalgu,
Damascogin tule-walgwen-Jesús-igalgin-naneed maimo.
Tenal we tule nug Ananías.
Tegin Pab-Jesús ua-akpuredgin Ananíaszhe kocha:
“Ananías.”
Tegin Ananías Jesúsga chogal:
“Tummad,
an maiai.”
11 Tegin Pab-Jesús Ananíasga chogal:
“Pe imis-imis Igal-Inniki-nugadbal pe nao,
Judas-negzhe.
Tegin pe ekiso,
pia Saulo-Tarsogined mai.
Imi we Saulo pato anche kolnai.
12 Tenal Saulo imia-akpuredgin tule-walgwen-Ananías-nugad-takcha chunkalgin e-ebunai e-imia kannan atagal.
Imi pedin a-tuledo.”
13 Tegin Ananías Pab-Jesúsga chogal:
“Pabye,
pe nabir anka chogendo,
tenal tulemal-ichejul anka we tulegin chunmasmal.
Imi tulemal anka chogmaldo:
Saulo Jerusaléngin chabzhul tule-pegin-akenanimalad-imas.
14 Tenal Saulo tule-irwal-Pabzhe-kolmalad-e-tummagan-nuggin igal-nikanoni,
itigin anmal-pel-kwapa-pe-nuggin-kolmalad-kagal.”
15 Tegin Pab-Jesús kannan Ananíasga chogalbal:
“Tenal pe keg-chulgu Sauloje neenab.
Imi antin we Saulobi-chus,
an-nuggin Judiojulmaladga tegin e-erreymalga chunmadi-kugal.
Tenal Saulo ankin chunmanonikil,
tulemal nuekwa an-wisgunonimalo,
tegin Israel-tulemal nuekwa an-wisgunonimalmogo.
16 Tenal Saulo anpal naigujal,
kep an Sauloga oyogo,
ede keg-chulgu peyedzhe an-nug-anal wilenoniko.”
17 Tegin Ananías Saulo-maidzhe nadzhun.
Tegin Ananías neg-yabal togzhagu,
chunkalgin Saulo-ebus.
Tegin Ananías Sauloga chogal:
—Kwenad-Saulo,
pe igalbal-tanikidgin Pab-Jesús pega nononi.
Imi we Jesús peje an-palminoni pe kannan imia mag atagal,
tegin pe pela-pela Pab-Purpa-Nued-nikugalbal.
18 Tegidgin Saulo imia-yabal-akar immal ua-ukayob nodgu,
e-imia mag atanonijun.
Tegin Saulo ilgwen tigin Jesús-nuggin ogleszhun.
19 Tegin Saulo mas wis kuchagu,
chan wis kannales.
Tegin Saulo Pab-Jesúsgin-ibzhemalad-Damascogin-pukmaladbak,
untar megwiszhun.
Saulo Damasco-neg-kweburgin Jesúsgin chunmajad
20 Imi teun-akar Saulo Judio-ormaked-neg-ilbal chunmadi-kual:
“Jesús,
Pab-Tummad-Machi-chunchunnad.”
21 Tegin tulemal-Saulo-itobukmalad weob pakal pesmal,
chogalmal:
“¿We tulede,
Jerusaléngin peyedzhe tule-Jesús-nuggin-kolmalad-owioszhulzhí?
Tegin we tule itije nonibal tule-Jesús-nuggin-kolmalad-kagal.
¿Tegin Saulo nonibalzhulzhí,
Jerusalénzhe kannan tule-irwal-Pabzhe-kolmalad-e-tummaganga tule-kalesmalad-chedgal sapejul oturdagal?”
22 Tenal Saulo ibe-ilbal pul-pule napírra chunmakedbal,
mag-itojul Judiomal-Damascogin-pukwamalad-ebesmal.
Tenal Saulo Judiomalga napírra chogzhado,
Jesús Cristo-Pab-akpene-chogzhad-palmidagoed-tule.
23 Tegin Saulo Damascogin untar megwijadgin,
Judiomal aga igal-itosmal Saulo-mesgal.
24 Tenal Saulo aga wisgus,
tulemalde e-mesbi-kunanimal.
Tegin Judiomal mutik-ibgin neg-kwebur-wanagakkin Saulo-abintananimal Saulo-mesgal.
25 Al Jesúsgin-ibzhemalad mutik,
neg-kwebur-emakal-chiid-yankalbal,
karpa-tummadgin Saulo-odesmal.
Tegin Saulo wakiszhun.
Saulo Jerusalénzhe nonikid
26 Tegin Saulo Jerusalénzhe nonigu,
Jesúsgin-ibzhemaladbak ormabi-kualin.
Tenal Jesúsgin-ibzhemalad Saulo-tobgualmal.
Tegin tule-Jesúsgin-ibzhemalad Saulo-pengusmal,
ede chunchunnad Jesúsgin-ibzheed o chul-dewa.
27 Tegin Bernabé Jesús-nuggin-palmilegalmaladzhe Saulo-cheinoni.
Tegin Bernabé pel-kwapa Jesús-nuggin-palmilegalmaladga palchogalzhun,
Saulo igi Damasco-igalbal-natapidgin Pab-Jesús-takcha,
tegin Pab-Jesús igi ebak chunmasbal.
Tegin Bernabé chogalbal,
Saulo tobzhulidgin Damascogin Jesús-nuggin tulemalga chunmasbal.
Tegin Jesús-nuggin-palmilegalmalad,
Bernabé-chogzhadbal kep Saulo-abingasmalzhun.
28 Tegin Saulo Jesús-nuggin-palmilegalmaladbak Jerusaléngin peszhun.
Tegin Saulo Jerusaléngin akalzhul pipirmadi-kuszhun.
Tegin Saulo tobzhulidgin Jesús-nuggin chunmadi-kuszhun.
29 Tegin Saulo Judiomal-Griego-kakagin-chunmamaladbak Jesús-nuggin chunmadi-kual,
tegin we tulemalbak aga abin-abin imakaldamalbal.
Tegin Judiomal-Griego-kakagin-chunmamalad Saulo-mesbi-kualmalzhun.
30 Tegin Jesúsgin-kwenamalad wisgusgu Judiomal Saulo-mesbimal,
Cesareaje Saulo-pelapmal Tarsoje ukin Saulo-palmigal.
31 Tegin tule-Jesúsgin-ibzhemalad Provincia-Judeagin,
Provincia-Samariagin,
Provincia-Galileagin-pukmalad,
akalzhul untar ampagusmal,
tule tar-kwen-akaloszhulmal.
Tenal tule-Jesúsgin-ibzhemalad purpal Jesúsgin tunkumai.
Tegin Jesúsgin-ibzhemalad Pab-Purpa-Nued-tar-pentakedbal tulemal melgumaibal.
Tegin Jesúsgin-ibzhemalad Pabgin-atagedgin kudigusmalbal.
Pedro purkwaled-akar Jesús-nuggin Dorcas-otulojad
32 Imi Pedro neg-kwebur-ilbal Jesúsgin-akenanimalad-taknadedgin,
neg-kwebur-Lidagin Jesúsgin-akenanimalad-taknonimo.
33 Tegin Pedro Lida-neg-kweburzhe nonigu,
tule-walgwen-Eneas-nugad-taknonimo.
Tenal we tule pirkapábakkus,
abgan-purkwaled nikadbal kachigin mellemai.
34 Tegin Pedro Eneasga chogal:
—Eneas,
Jesucristo pato pe-nudas.
Imisgin pe kwisgu,
aga pe kachi olma.
Tegidgin Eneas apka-pakal nugusgu,
ilgwen kwisgus.
35 Tegin tulemal-pel-kwapa Lida-neg-kweburgin,
tegin Saróngin-pukmalad,
Eneas-nugus takchagu,
Pab-Jesúsbal naigusmal.
36 Imi teun Jope-neg-kweburgin,
ome-walgwen-Jesúsgin-ibzheed chimo.
Tenal we ome nug Tabita;
tegin Griego-kakagin pimal,
Dorcas.
Tenal we ome pane-pane e-itolegedbal yer tulemal-penta,
tegin tule-wiledimalad-pentabal.
37 Imi teun Pedro ampa Lida-neg-kweburgin maidgin,
Dorcas yegual.
Tegin Dorcas purkwenonijun.
Tegin tulemal Dorcas-mui okchamalgu,
nikpa-neg-toto-yabal Dorcas-mui odosmal.
38 Tegin Jesúsgin-ibzhemalad wismal,
Pedro ampa Lidagin mai.
Tenal Lida-neg-kwebur,
Jope-neg-kweburbak itiki-choggu,
al Jesúsgin-ibzhemalad walbo tule-palmis Pedroje kolnegal:
“Pedin,
kueye-kueye tagenab,
Jope-neg-kweburzhe.”
39 Tegin tule-palmilesmalad Pedroje omosgu,
Pedroga pél palchognonimal.
Tegin Pedro ilgwen tule-walbogwadbak mes alzhun Jope-neg-kweburzhe.
Tegin Pedro Jopeje nonigu,
Jesúsgin-ibzhemalad ilgwen Dorcas-mui-maidzhe Pedro-chesmal.
Tegin Pedro Dorcas-mui-maidzhe nonigu,
omegan-tarbi-machergan-purkwismalad Pedroje pononimal.
Tegin omegan Pedroga chogalmal:
—Pe tak,
Dorcas ampa tulaun,
igi anmalga mol makcha.
40 Tegin Pedro pél tulemal-onisgu,
ilgwen chimtis,
tegin Pabzhe kolal.
Tegin Pedro Dorcas-mui-maidzhik akpiridgu,
muiga chogal:
—Tabita,
pe kwisguma.
Tegidgin Dorcas Pedroga imia arkaal.
Tegin Dorcas Pedro-takalgu,
chigwiszhun.
41 Tegin Pedro chunkalbal Dorcas-kasgu,
Dorcas-okwichis.
Tegin Pedro Jesúsgin-ibzhemaladzhe kocha,
tegin omegan-tarbi-machergan-purkwismaladzhe kochamo.
Tegin Pedro tulemalga tulakwa kannan Dorcas-ukchajun.