Pol enge namba 1 mundi nigl sipraksi Yurop makan pindre ana taun Filipai kamambuno wakai di yungu ombuno i-pendigl endungwa. Taun i Masedonia Provins mina suna yongwa. (Aposel 16:8-15 kaniyo.)

Okuwo ye endpi taun bangeta ongo ana kane singwa. Ye kane yungu paimogltre pruko yomba tau eremogl Filipai yungu ombuno pirngino sigugl sinamnedi erikwa. Ba pepa i kere kamuno, ana yumbun ipre Pol dem munduo goglkrukwa. Ye Krais kaima pirngi dungwa pre gun yei moglkwa. Ye kane yungu mogl pepa i bogl tongwa.

Ana okuna kana Pol diminge ya taragl tau paitekrukwa enge, Filipai yungu ombuno wagle minge moni akepledi tengwa. Ipre ye ama diwakai yei pepa i muno bogl tongwa. Te aglau eran Pol kane pangwa ipre ye nomano suwo suwo yeikraglkwa pre pirngino gigle dinambedi ye pepa i ama muno boglkwa.

Te kor moraglkwa taragl wakai Yesus Krais mina God tomere ye ingwa i ama dipene endungwa. Taragl wakai i Juda yomba lono duglo bogltre ta ikrime dungwa. Tamanga. Yesus Krais we di pirngi dingwa i mina taragl wakai ingwa, ipre Filipai yungu ombuno wagle Yesus Krais mambunomo duglo bolo dungwa.

Krais yene yomba kande mole dikrukwa, te yene prumere taragl erekrukwa. Tamanga. Krais yene ake atne endindre ana God kongun tomere i orkwa. Ana yomba ye Yesus Krais mina sindakagl meglkwa, ye God wakaimo indre gun pond yeime dungwa.

Pepa i kere nono kanamga, Filipai yungu ombuno meglkwa ipre Pol gun pond yeitongwa.