6
Jaꞌ wan bꞌabꞌel jix cu cuy yin Cristo tuꞌ,
man ojabꞌ jaꞌ oj cꞌal yin chi cu kꞌanabꞌ tinaniꞌ.
Jaꞌ tinaniꞌ xin,
cu naꞌwej yu wanojxa cuybꞌanile yet watxꞌ chi chꞌibꞌ cu naꞌbꞌal yin Cristo.
Manxa chi cu naꞌwejtej wan bꞌabꞌel cuybꞌanile oj wal ey jex tiꞌ an.
Jaxca wan cuybꞌanile tol chi cu bꞌejcan wan costumbre cꞌamxa tzet chi oqui.
Catuꞌ sowalil chi kaoc cu cꞌul yin Dios.
2 Yetoj wan cuybꞌanile yin wan bautismo,
cꞌal yet chi bꞌatxbꞌale oc kꞌabꞌe yibꞌan cu jolom,
yetoj cuybꞌanile chi alon tol oj cu pitzcꞌu a xol ebꞌ camnajxa.
Yetoj cuybꞌanile chi alontej tol ey syaꞌtajilal ebꞌ ánima yin junelne,
ebꞌ cꞌam chi yaoc scꞌul yin Cristo.
3 Jaꞌ tinaniꞌ,
ey junxa cuybꞌanile oj cu cuy yetoj scolwal Dios.
4 Jaon tiꞌ,
jaxca tol tzejtenebꞌil xa cu pixan.
Chabꞌilxa jun caw watxꞌ saꞌbꞌeal Dios ku,
jaꞌton Naj Santo Espíritu eyxa oc kin junjun jon.
5 Kotajxa swatxꞌil skꞌane Dios.
Kotajxa yip Dios oj xꞌox yet jun tiempoal tol to oj juloj.
6 Yuxan,
ta chi kiꞌel cu naꞌbꞌal yin Cristo,
¿Tzet oj yun cu meltzo oc junelxa catuꞌ chi cu naꞌon pax cu bꞌa?
Yutol jaꞌ yet chi kiꞌon el cu naꞌbꞌal yin tuꞌ,
chi yal yeloc apnoj jaxca tol lalan cu locbꞌan pax a Naj Scꞌaal Dios yin culus junelxa.
Chi el pax ẍiqꞌuil Naj sattaj ánima junelxa ku.
7 Jaon tiꞌ,
laan jon jaxca txꞌotxꞌ txꞌotxꞌ.
Jaꞌ yet chi yakꞌon nabꞌ,
chi yucꞌtoj jaꞌ txꞌotxꞌ.
Ey txꞌotxꞌ caw watxꞌ yawoal,
chi yakꞌ tet mac chi mulna sat.
Yuxan chi xꞌoxel swatxꞌcꞌulal Dios yin jun txꞌotxꞌ tuꞌ.
8 Ey pax txꞌotxꞌ xin,
qꞌuix cꞌal chi aol sat,
cꞌal comon cꞌultaj chi aoloj.
Cꞌam niꞌoj yopiso.
Yuxan,
oj tit sjowal scꞌul Dios yibꞌan,
catuꞌ oj tzꞌaꞌtoj masanil.
Tecꞌan Ojabꞌ Chi Kute Cu Naꞌbꞌal Yu Tzet Eyoc Yipoj Cu Cꞌul
9 Jal jex wuẍtaj,
jex wanabꞌ,
caxcꞌal chi kaltoj wan tiꞌ ey jex,
chi kaoc yipoj cu cꞌul,
tol lalan je chaꞌon swatxꞌcꞌulal Dios,
yutol eyxa je colbꞌanil.
10 Jaꞌ Dios jichan cꞌal chi yute sbꞌa,
yuxan man oj toj qꞌueycꞌulal yu tzet jix el je yuneni,
cꞌal je camcꞌulal jix je txꞌox tet Dios,
yet jix jex colwa yin ebꞌ yet xa Dios.
Jacꞌalaꞌ pax che yun tinaniꞌ.
11 Chi koche pax oj,
tol junjun jex,
jaxca tuꞌ che yute je bꞌa yin tobꞌalkꞌinal,
yet watxꞌ tzꞌajaji oj yun je chaꞌon pax tzet che yechbꞌane tuꞌ.
12 Chi koche tol man isa oj che yute je bꞌa yin yet Dios.
Bꞌeybꞌalnewej sbꞌeybꞌal ebꞌ caw chi yaoc scꞌul yin,
ebꞌ caw tecꞌan chi yute sbꞌa.
Jaꞌ ebꞌ chi bꞌeybꞌalnen jaxca chi wal tiꞌ an,
lalan ẍaꞌon ebꞌ wan tzet yalnaj can Dios.
Caw Yel Oj Yun Dios Jaxca Jix Yun Yakꞌon Can Stiꞌ
13 Jaꞌ yet jix yalon can Dios tuꞌ tet naj Abraham yet peyxa tuꞌ,
cꞌam junojxa mactxequel jix sloc sbꞌi.
Jacꞌal oc sbꞌi jix slocoꞌ,
yutol cꞌam junojxa mac ecꞌbꞌan yintaj.
14 Yalnaj can tet naj jaxca tiꞌ:
“Caw yel miman jin yaxilal oj jin txꞌox ey jaach an.
Caw ey ja wicꞌaal oj pitzcꞌu oj,”
ẍi Dios tuꞌ tet naj Abraham.a
15 Jaꞌ naj Abraham tuꞌ,
miman cꞌal jix yute scꞌul yechbꞌaneni,
yuxan jix ẍaꞌ naj tzet yalnaj can Dios tꞌinan yakꞌon tet naj tuꞌ.
16 Jaꞌ yet chi slocon sbꞌi junojxa mactxequel,
asan junoj mac miman yeloj apnoj yintaj chi sloc sbꞌi.
Jaꞌ yet chi yalon junoj tzetyetal,
chi ton sloc sbꞌi junojxa mactxequel,
yet watxꞌ cꞌamxa cꞌal tzet chi yalaꞌ.
17 Yuxan,
jaxca tuꞌ yutenaj yalon can Dios,
catuꞌ jacꞌal oc jix sloc sbꞌi,
yutol chi yoche chi xꞌox kilaꞌ,
tol yel oj cu chaꞌ tzetyetal yalnaj tol oj yakꞌ ey jon,
catuꞌ cꞌam chi qꞌuexcha tzet chi yoche Dios.
18 Yu yalnaj can Dios,
catuꞌ jix slocon sbꞌi,
yuxan jaꞌ tzet yalnaj can Dios cꞌam bꞌakꞌin tol man oj yunne.
Yutol jaꞌ Dios tuꞌ,
cꞌam chi skeꞌ yakꞌon lekꞌtiꞌal.
Jaꞌ tzet yalnaj canoj,
chi kaoc yipoj cu cꞌul,
yutol kanaj oc cu bꞌa yul skꞌabꞌ Dios yu jon scoloni.
Catuꞌ lalan kechbꞌanen tzet oj yakꞌ ey jon tuꞌ.
19 Jaꞌ wan lalan kechbꞌanen tiꞌ,
jaꞌ eyoc yipoj cu cꞌul,
catuꞌ tecꞌan xa yeoc cu naꞌbꞌal yu.
Jaxca chi yun scancan junoj noꞌ noꞌ txubꞌabꞌil oc yin junoj chꞌen chꞌen.b
Ey ton jun eyoc yipoj cu cꞌul jaxca jun tuꞌ.
Jaꞌton jun watxꞌ xa yeoctoj yintaj an kꞌap smajil snan stemplo Dios bꞌey satcan.
20 Jatuꞌ bꞌabꞌel yoctoj Jesús cu sattaj yu sjajon ey jon.
Queyton tuꞌ jix yun yoc yakꞌomaloj xaambꞌal tet Dios yin tobꞌalkꞌinal,
jaxca yopiso naj Melquisedec yet peyxa.