Chi Snaꞌoc Dios Yin Masanil Ánima Yin Caw Yel
2
Yal cꞌal mactxequel junoj jon chi cu naꞌoc yin junojxa mactxequel,
ma skeꞌ kaloni tol cꞌam cu penail.
Yutol jaꞌ yet chi cu naꞌon oc yin junojxa mactxequel,
lalan kiꞌontej syaꞌtajilal kibꞌan.
Yutol jaꞌ yet lalan cu naꞌon oc yin junojxa mactxequel,
laan tzet chi el kunen yetoj.
2 Kotaj,
tol yal cꞌal mactxequel jaxca tuꞌ chi yute sbꞌa,
jaꞌ Dios oj naꞌon oc yin caw yel.
Oj yaoc syaꞌtajilal yibꞌan.
3 Jaꞌ jaex che naꞌoc yin ebꞌ chi unen wan man watxꞌoj tuꞌ.
¿Tumi oj skeꞌ je colon el je bꞌa yalan sjowal scꞌul Dios oj jul yibꞌan ebꞌ chi unen man watxꞌoj tuꞌ,
che naꞌ?
Quey pax tuꞌ che yute je bꞌa jaxca ebꞌ tuꞌ.
4 Jaꞌ Dios caw miman swatxꞌcꞌulal,
caw ey smimancꞌulal.
Man comonoj chi tit sjowal scꞌul Dios.
Tejan ey jex cꞌam pax yeloc apnoj wan tiꞌ yul je sat.
¿Tumi man je yotaj oj tol chi yakꞌ mimancꞌulal kibꞌan,
yet watxꞌ chi yakꞌ snaꞌ sbꞌa cu cꞌul?
5 Jal jex jaex tiꞌ,
cꞌam che jije pax oj.
Cꞌam che naꞌel niꞌoj je bꞌa.
Yuxan lalan cꞌal je yambꞌan oc sjowal scꞌul Dios je yibꞌan.
Jaꞌ yet oj jul jun scꞌual syaꞌtajil tuꞌ,
je yet cꞌal eloj,
jaꞌ yet jun cꞌual tuꞌ oj txeclo eloj,
tol watxꞌ cꞌal lalan yunen snaꞌon oc Dios yin masanil ebꞌ.
6 Jaꞌ yet jun cꞌual tuꞌ,
oj ẍaꞌ spaj sqꞌuexel jatacꞌalaꞌ tzet jix el yunen junjun ánima.
7 Ey ebꞌ bꞌey oj yakꞌ jun kꞌinale tol ey cꞌal yin tobꞌalkꞌinal,
jaꞌton ebꞌ tecꞌan chi yute sbꞌa yin yunen swatxꞌilal,
catuꞌ chi seyon swatxꞌilal Dios chi txeclo el yin ebꞌ,
catuꞌ miman yeloc apnoj Dios yul sat ebꞌ.
Catuꞌ chi seyon jun kꞌinale ebꞌ tol ey cꞌal yin tobꞌalkꞌinal.
8 Ey pax ebꞌ,
asan yet ey yeloc apnoj yul sat.
Cꞌam chi sjije cuybꞌanile caw yel.
Asan yin tzet cꞌam swatxꞌil eyoc snaꞌbꞌal ebꞌ.
Caw miman sjowal scꞌul Dios oj tit yibꞌan ebꞌ,
catuꞌ oj yaon oc syaꞌtajilal Dios yibꞌan ebꞌ.
9 Masanil cꞌal ebꞌ chi unen tzetyetal man watxꞌoj,
oj yabꞌ syaꞌtajilal ebꞌ sicꞌlebꞌil.
Yel xacꞌal ecꞌbꞌan oj utele ebꞌ wet Israelal,
oj yabꞌ cꞌal pax syaꞌilal ebꞌ man Israeloj.
10 Jaꞌ masanil ebꞌ watxꞌ chi yute sbꞌa,
jaꞌ swatxꞌilal Dios oj yakꞌ tet ebꞌ,
catuꞌ miman yeloc apnoj ebꞌ yul sat Dios.
Ey watxꞌcꞌulal snan xol ebꞌ yetoj Dios.
Jaꞌ ebꞌ wet Israelal watxꞌ chi yute sbꞌa,
yel xacꞌal ecꞌbꞌan oj yun yakꞌon wan tiꞌ tet ebꞌ,
catuꞌ oj yakꞌon pax tet ebꞌ man Israeloj.
11 Yutol jaꞌ yul sat Dios,
laan cꞌal yeloc apnoj junjun ánima.
12 Masanil ebꞌ man otajnenoj sley Moisés,
ta tol cꞌam swatxꞌil sbꞌeybꞌal ebꞌ,
oj ale cantoj ebꞌ bꞌey camich yin junelne.
Manaj pax jun ley tuꞌ oj aon cantoj ebꞌ bꞌey syaꞌtajil.
Jal masanil ebꞌ otajnen jun ley tuꞌ,
ta lalan cꞌal pax yunen spenail ebꞌ,
jacꞌal oc jun ley tuꞌ oj akꞌbꞌalnele oj,
catuꞌ oj ilchatej yin ebꞌ.
13 Yutol jaꞌ ebꞌ asan tucꞌal chi abꞌen tzet chi yal jun ley tuꞌ,
man watxꞌoj ebꞌ yul sat Dios.
Jaꞌ ebꞌ chi jijen tzet chi yalaꞌ,
jaꞌton ebꞌ,
watxꞌ yul sat Dios.
14 Jaꞌ ebꞌ man Israeloj,
man yotaj oj ebꞌ sley Moisés,
ta tol asan yin snaꞌbꞌal ebꞌ chi yun tzet chi yal jun ley tuꞌ,
caxcꞌal man yotaj oj jun ley,
jaxca tol jaꞌ jun ley tuꞌ,
eyoc yin snaꞌbꞌal ebꞌ.
15 Jaꞌ sbꞌeybꞌal ebꞌ chi txꞌoxon eloj,
tol eyoc jun ley tuꞌ yin snaꞌbꞌal ebꞌ.
Jaꞌ jun snaꞌbꞌal ebꞌ chi akꞌon cuenta.
Jaxca tuꞌ chi yute xꞌoxon el sbꞌa ebꞌ,
tol eyoc jun ley tuꞌ yin snaꞌbꞌal ebꞌ,
cꞌal yotajnen el ebꞌ yin snaꞌbꞌal,
ta watxꞌ chi el yunen ebꞌ ma pena.
16 Jaꞌ yet oj jul jun scꞌual oj snaꞌoc Dios yin masanil ánima yu tzettaj ewan cꞌuan yeoc yu ebꞌ,
jaꞌ Jesucristo oj naꞌon oc yin ebꞌ,
jaxca chi yal jun kꞌane yet colbꞌanile chi wal tiꞌ an.
Jaꞌ Tzet Yopiso Sley Moisés Yu Ebꞌ Israel
17 Jal jex jaex tiꞌ,
che jelanne je bꞌa yutol a Israel jex,
catuꞌ asan sley Moisés che yaoc yipoj je cꞌul.
Caw che yecꞌbꞌane je bꞌa,
yutol sconobꞌ Dios* jex.
18 Je yotaj xa tzet chi yoche Dios.
Je yotaj pax oj,
bꞌeytet watxꞌ tzet chi el kuneni,
yutol cuywinaj jex yin sley Moisés.
19 Ey ebꞌ man otajbꞌiloj Dios yu.
Catuꞌ ey jex chi skeꞌ je txꞌoxon Dios tet ebꞌ,
je naꞌoni.
Ey ebꞌ jaxca tol chi ecꞌ spixan ebꞌ xol kꞌejkꞌinal,
chi skeꞌ je yakꞌon sajkꞌinal tet ebꞌ,
je naꞌoni.
20 Jaꞌ je naꞌoni tol chi skeꞌ je cuyon ebꞌ cꞌam tzet yotaj.
Catuꞌ chi skeꞌ je yakꞌon naꞌcha el yu ebꞌ cꞌam chi naꞌcha el yu,
je naꞌoni.
Yu sley Moisés,
yuxan caw chi naꞌcha el wan cuybꞌanile tuꞌ je yu.
Je yotaj xa bꞌeytet yel.
21 Ta caw cuywawom jex tet wanojxa mactxequel.
¿Tzet yuxan cꞌam pax che cuy pax je bꞌa?
Che yalaꞌ,
tol cꞌam chi skeꞌ kelkꞌanwi,
elkꞌom jex pax oj.
22 Che yalaꞌ,
tol cꞌam chi skeꞌ cu mulwi,
chex mulwi pax oj.
Caw cꞌam che yoche wan tzetyetal chi al-le oc sdiosal,
elkꞌom jex pax bꞌey eyoc wan dios tuꞌ.
23 Yutol je yotaj sley Moisés,
yuxan ecꞌbꞌan che yute je bꞌa.
Cꞌam pax che jije tzet chi yal jun ley tuꞌ.
Yuxan caw chi bꞌuchle el Dios je yu.
24 Jaꞌ yul An Juun chi yal can jaxca tiꞌ:
“Yu je bꞌeybꞌal,
yuxan chi bꞌuchwa ebꞌ man Israeloj yin Dios,”
ẍi yul An Juun.a
25 Yel toni,
ey yopiso jun yechel chi yij sbꞌi circuncisión,
* ta che jije tzet chi yal sley Moisés.
Ta cꞌam pax che jije jun ley tuꞌ,
jaxca tol man eyoj oc jun yechel chi yij circuncisión je yin yul sat Dios.
26 Jal pax ebꞌ man eyoj oc jun yechel tuꞌ yin,
jaxca tol eyoc jun yechel tuꞌ yin ebꞌ yul sat Dios ta chi sjije ebꞌ tzet chi yal jun ley tuꞌ.
27 Ey ton ebꞌ jaxca tuꞌ.
Cꞌam jun yechel tuꞌ eyoc yin ebꞌ,
chi sjije pax ebꞌ jun ley tuꞌ.
Jaꞌ ebꞌ oj naꞌon oc je yin.
Caxcꞌal eyoc jun yechel tuꞌ je yin,
caxcꞌal tzꞌibꞌebꞌilcan jun ley tuꞌ ey jex,
tutun cꞌam che jije.
28-29 Manaj ebꞌ chi yij sbꞌi Israel yu ánima,
manaj ebꞌ yel Israel yul sat Dios.
Jaꞌ ebꞌ caw yel eyoc snaꞌbꞌal yin Dios,
jaꞌton ebꞌ tuꞌ caw yel Israel yul sat Dios.
Manaj ebꞌ eyoc jun yechel,
chi yij circuncisión tuꞌ yin smimanil ebꞌ.
Manaj ebꞌ yel eyoc jun yechel tuꞌ yin ebꞌ yul sat Dios.
Yutol jaꞌ jun jaꞌcaw yechel chi yij circuncisión yul sat Dios,
jaꞌton jun eyoc yin cu pixan.
Man yu oj ley yuxan chi oc kin,
yu cꞌal tzet eyoc yin cu pixan,
yuxan chi oc kin.
Yuxan man ánima oj chi aloni,
tol watxꞌ jon,
jaꞌton Dios chi aloni,
tol watxꞌ jon.