Aŋelo moczi mumupaŋ sanaŋ muwec
10
Eme aŋelo sâko moc sambâŋkonec wahame honepo. E karoraczi rufacnekicne, qizec botâŋnao hiriri somâckerâ domawec, ʒâŋe maine ʒoaŋ iŋucne, kike jahecne ʒocbâruŋhec.* 2 Meticnezi papia piticne moc bâdâmârekicne i badomawec. Erâ kike fâre‐ticnezi hâwec faio â kike qanazi mâreŋko âterâ domawec. 3 Domahuc dâŋ wiwira kâcɋene, laioŋte dâŋ sâcko ewec. Wirame ɋuŋ 7 jaŋe dâŋembiŋ.* 4 Dâŋehuc mupie manarâ qâreŋkezo ehape sambâŋkonec wiwira norao ʒiŋuc wahawec: “Ɋuŋ 7 dâŋ mumbieŋ i mi qâreŋkec, mâc tapa batec fooc.”* 5 Eme aŋelo hâwecko â mâreŋko âterâ domawec, eki mefâre‐ticne sambâŋkopec sicnehuc dâŋ mupaŋkewec.* 6 Ehuc juraʒihuc juocmu sanaŋzi wiac bâfua‐fârewec, sambâŋ â irec wiac‐ticne, mâreŋ â irec wiac‐ticne, hâwec â irec wiac‐ticne, erao hâcne ɋetickehuc ʒiŋuc mupaŋkewec: “Dameŋ mocwâc mi fokac.* 7 Aŋelo namba 7 qeŋticne qame fânâŋ fuaocmu, dameŋ ira Anuture dâŋsoŋ, ŋicfâc‐ticne porofete biŋene jazawec, irec fârine fua taraocmu.”* Aŋelo moczi Johane papia râcneme nâwec
8 Eme sambâŋkonec dâŋ manapo ijaha mocwâc fuarâ ʒiŋuc nazawec: “Go rarâ aŋelo hâwecko â mâreŋko âterâ domahuc papia bâdâmârekicne badomakac i roc.” 9 Mume no aŋelorao rarâ papia nareocte âzâcnepe ʒiŋuc nazawec: “Rorâ nâc. Nâtecne bugao hâtâcguocmu â micgao baŋac iŋucne erâ aŋacguocmu.”* 10 Iŋuc murâ papia nareme nâpo. Nârâ micnaneo baŋac iŋucne erâ aŋacnuwec, izi nâkâcnepe ine bunaneo hâtâcnuwec. 11 Eme ʒiŋuc nazambiŋ: “Go ŋicguru bocjaha, sahac hawari‐jeŋic â dâŋmarac‐jeŋic fuŋne fuŋne erâ ŋicwofuŋfâc‐jeŋic jaŋere findaŋdâŋ mocwâc muzemec.”*