Johanezi papia moc sâfâzi basanaŋkekicne honewec
5
Eme eri ŋeŋeo ŋeekac e mefâre‐ticnezi papia foforiŋ moc baŋeme honepo, papia e bune râpene qâreŋhec jaha fowec, erâ sâfâ 7‐zi basanaŋkekicne.* 2 Eme aŋelo sâko honepo, e dâŋ hahaŋnehec ʒiŋuc muwec: “Mo tiŋnezi papia sâfâ‐ticne bâhockerâ bâdâmâreme sâckeocmu?” 3 Iŋuc mume sambâŋko me mâreŋko me mâreŋ jujuwicnao moczi moc papia sâfâ‐ticne bâhockerâ woseocte mi afeckewec. 4 Eme moczi sâsâcne mi juhuc papia bâdâmârerâ wosewecte bunane sâqoreme boc kiopo. 5 Iŋuc epe ŋicqizec jaŋeraonec moczi ʒiŋuc naza muwec: “Mi kioc, manakomec, Judare ɋâricfâc jaŋeraonec laioŋ moc fuawec, Dawidire gitecne hâcne, eki papia sâfâ‐ticne 7 bâhockerâ bâdâmâreocte wiac sasawa qamase‐fârewec.”* Johanezi Lama honewec
6 Eme no ʒâŋe firâ eri ŋeŋe â wiac jujune 4 irec ŋondeŋko ŋicqizec jaŋere birio Lama moc hezukicne hawari domame honepo. Ʒuŋene 7 â ʒâŋene iŋuc jaha 7. Ʒâŋene 7 i Anuture mâro 7, jaŋe mâreŋ sâc sorec‐jopakicne juraŋgopieŋ.* 7 Eme Lamazi rarâ eri ŋeŋeo ŋewec ere mefâreonec papia foforiŋ rowec.* 8 Papia foforiŋ rome wiac jujune 4 â ŋicqizec 24 jaŋe Lamare maŋfuŋko fodapembiŋ. Jaŋe musi‐jeŋichec sasawa, â râqâc golzi bakicne i mâmâc barâ fombiŋ. Râqâc maŋkonec hosâc âsu biaŋ wefuwec, i Anuture tiriŋicfâc jaŋere nunumu.* 9 Eme jaŋe gae ɋâricne moc ʒiŋuc hembiŋ:
“Goki papia rorâ sâfâ‐ticne bâhocketec sâcke‐hâmoocmu.
Go gupie socgezi mâreŋ sâc ŋic sahac hawari
fuŋne fuŋne â dâŋmarac fuŋne fuŋne
kitâc‐jopame Anuture biŋe embiŋ.*
10 Erâ qâzuc‐jopatec Anutu uucmaŋ‐ticnere
kikefuŋfâc â taha bapafâc‐ticne embiŋ.
Eme jaŋe mâreŋte faio guriŋ bapa gie baniŋmu.”*
Sâmbâŋko ʒeri mumuteŋ sâko fuawec
11 Eme no ʒâŋe firâ aŋelo bocjaha jâmbâŋ honec‐jopahuc micfânâŋ‐jeŋic manapo. Jaŋe eri ŋeŋe â wiac jujune â ŋicqizec orâŋ‐jopahuc domambiŋ, teŋ tauseŋ gurune gurune â wâŋ tauseŋ gurune gurune domarahuc* 12 dâŋ ʒiŋuc wiwirao mumbiŋ: “Lama hezukicne eki tâpiri mazuc mâriri â maŋɋârâŋ â sasanaŋ â ʒâŋe biŋe â eri qaraweŋ â muac baafec rauckeme sâcke‐hâmokac.”* 13 Eme sambâŋko â mâreŋko â mâreŋ jujuwicnao â hâwecko jurambiŋ sasawa jaŋe kecʒiŋuc mupie manapo: “Eri ŋeŋeo ŋekac e â Lama mâmâc muac baafec â ʒâŋe biŋe â eri qaraweŋ â tâpiri focnekaczi focnerahuc juzejec sanaŋ.”* 14 Eme wiac jujune 4 jaŋe mumbiŋ: “Jâmbomac.” Â ŋicqizec jaŋe fodapehuc numucnembiŋ.*