Mâro fuŋne fuŋne juŋgopieŋ
4
Âgo biaŋfâc‐nane, mâro kosa jaŋere dâŋ mi mana ʒakienʒepieŋ. Mâro moc e Anuturaonec me mâcne, i mana taraniŋte ruc banʒepieŋ. Porofete burecne wemo afecne fuambiŋ juraŋgopieŋ.* 2 Anuture Mâro e ʒiŋucko ʒâŋitazo: Mâro moc e Jesu Kristo ŋic fuawec i mutaniŋkeocmu, e Anuturaonec iŋuc mucnezo.* 3 Â mâro moc e Jesu mi mutaniŋkeocmu e Anuturaonec mâcne. E Kristo râsi qizec‐ticnere mâro iŋuc muzo. Ere manaeŋgopieŋ, e mâreŋko fuaocte mukicne, eme ʒine hâcne biac fuakac.* 4 Naru motecfâc‐mae, ŋoŋe Anuturaonec, irec porofete burecne sanaŋke‐jarembiŋ. Ŋoŋere maŋko juekac ere tâpirizi mâreŋko juekac ere tâpiri sirickekac hâcne.* 5 Porofete burecne jaŋe mâreŋkonec, irec mâreŋkonec ŋiczi dâŋ mumu i mueŋgopieŋ, mupie mâreŋkoneczi hazec‐jeŋic râeeŋgopieŋ.* 6 Nâŋâc ine Anuturaonec, eme moc e Anutu hone ʒâŋitac eekaczi dâŋnâŋec manaekac. Anuturaonec mi fuakicnezi ine dâŋnâŋec qikiŋneekac. Dâŋ fâri qizecnere mâro â bâbâsifuc mâro jahere fuŋne iŋucko hâcne ʒâŋitaeŋgopeneŋ.*
Anutu e maŋjauŋte fuŋne
7 Jorocfâc‐nane, nâŋâc maŋjauŋ eec enʒepeneŋ. Maŋjauŋ i Anuturaonec. Eme moc e maŋjauŋhec juomu, e Anuturaonec fuakicnezi Anutu mana maŋ eekac mucnezo.* 8 Moc e maŋjauŋ tâmiric juocmuzi Anutu ʒâŋe ruruŋkeocmu. Anutu e maŋjauŋ irec fuŋqizecne hâcne. 9 Anutuzi Ŋokâ‐ticne mocjaha e juju bâfua‐nâreocte mâreŋko soreme wahawec ira hâcne maŋjauŋ‐ticne nâŋâcnao fua taniŋkewec.* 10 Maŋjauŋte fuŋne ʒiŋuc fokac: Nâŋâc Anutu maŋjauŋ mi ecnembeŋ, ekizia nâŋâc maŋjauŋ enârehuc Ŋokâ‐ticne soreme waharâ sâqocne‐nâŋecte erâ kiwiric nâwoc rowec.*
Anuture maŋjauŋ honehuc ŋiczi wâc eec enʒepeneŋ
11 Jorocfâc‐nane, Anutu e maŋjauŋ iŋucne sâko enârewecte nâŋâc iŋuc jaha maŋzi jauŋ babac ehuc junʒepeneŋ.* 12 Ŋiczi Anutu hohone i moc mi ekicne, maŋzi jauŋ babac enaŋmuo ine Anutu maŋkenaŋmu, eme maŋjauŋ‐ticne nâŋâcnao fua sarickeocmu.* 13 Eki nâŋâc maŋnâpoekac â nâŋâc e maŋkeeŋgopeneŋ, irec fuŋne ine Mâro‐ticne nârewec ira taniŋkewec.* 14 Mamac e Ŋokâ‐ticne mâreŋ sâc ŋic bâpiaŋ‐nâpoocte soreme wahawec, eme nâŋe ʒâŋe fâri‐nâŋeczi qame honembeŋte dâŋ i mutaniŋkeeŋgopeneŋ.* 15 Eme ŋic moczi Jesu e Anuture Ŋokâ jâmbâŋ dâŋ i mutaniŋkeocmu, e Anutu maŋkeocmu â Anutuzi wâc e maŋkeocmu.* 16 Anutu maŋjauŋ‐ticne nâŋâcnao fuawec i hone ʒâŋitac erâ mana ʒakiembeŋ. Anutu e maŋjauŋte fuŋqizecne, eme moc e maŋjauŋhec juocmu e Anutuzi maŋkeocmu, â eki wâc Anutu maŋkeocmu.
Maŋjauŋheczi hâhâwic me âgo qaqaisoc mi ezejec
17 Iŋucko nâŋâcnao maŋjauŋ fua tarawec, i okac dameŋko qacfiric domanaŋte. Jesuzi juekac iŋuc jaha nâŋâc wâc mâreŋko ʒira jueŋgopeneŋ hâcne.* 18 Hâhâwic â maŋjauŋ jahe ââgo aricne, maŋjauŋ fârinezi hâhâwic guriŋkeocmu. Hâhâwic e ʒâic‐ticnehec. Irec moc e hâhâwic bajuocmu, erao maŋjauŋ sâcne mi fua tarawec muzo. 19 Nâŋâc ine Anutuzi qanaŋ maŋjauŋ enârewecte maŋjauŋhec junʒepeneŋ. 20 Ŋic moc e Anutu maŋjauŋ ecneekopac muhuc âgo‐ticne qaisockeocmu, ere burecŋic muzo. Manaŋgopieŋ, moc e âgo‐ticne ʒâŋezi hohonene e qaisockehuc wemocko Anutu mi hohonene maŋjauŋ ecneocmu. 21 Jesure sâcmutâc dâŋ ʒiŋuc fonârekac: Anutu maŋjauŋ ecneekaczi âgo‐ticne mâmâc ecnezejec.*