Wofuŋte momori gie bazo
2
Kristo Jesuzi aki anonoc tahacguwec i go motec‐nanezi bajuhuc qabocge qame huzejec. 2 Ŋic bocjahazi hone manac ehapie gie gaza gowatuc epo, gie i hâcne ŋic tucne Wofuŋte hatao jueŋgopieŋ â miti munusuŋkeniŋte tâpiri fojarekac iŋucne jaŋe qazu‐jaretec banʒepieŋ wâc. 3 Go Kristo Jesure momori ŋic sanaŋne juhuc irec ʒârâ hâriŋ kâdocge rocmurâ mi takicguzejec.* 4 Moc e momori gie baocmuzi wemocko sahackopec gie fuŋne fuŋne ameckeocmu. E momori jaŋere birio râeweczi wiac honeme sâckeocmu i sawa eocte muocmu. 5 Moc e sisiric gie bahuc sâcmutâc qâsuaocmuzi furine mi roocmu.* 6 Moc e he sarac ehuc ʒâic‐ticne manaocmuzi nânâ fârine micne barâ bâsurâ nâme sâckeocmu.* 7 Dâŋ gazakopac i manatâc qâtâc ezemec. Wofuŋ eki maŋge bâwiŋkeme mana tara‐fârezemec. Mi docke pârâc ezo
8 Go Jesu Kristore mamanac juzemec; e Dawidire ɋâriczi hâmockonec ɋârerâ faharewec; Biŋebiaŋ‐ticne iŋuc hâcne muekopac.* 9 Biŋebiaŋ irec erâ ʒâic fâro manaekopac, erâ wâc sâqocne bapa iŋucne niŋgiŋnumbiŋ ŋekopac. Anuture dâŋ ine mi niŋgiŋkekicne.* 10 No ʒâic gie sasawa i Anutu bâwosâefâc‐ticne jaŋere erâ ŋetâcneekopac, jaŋe Kristo Jesure bâbâpiaŋzi ŋihe umbiŋ ejareha eri tatamac fofone mâmâc rauckeniŋte iŋuc eekopac hâcne.* 11 Dâŋ ʒiŋuc fokac i jâmbomac:
Ere hâmocko ʒuhuckembeŋko
juju‐ticnao iŋuc jaha ʒuhuckenaŋmu,*
12 ʒâic mana takirenaŋmuo
ehec guriŋ bapa gie wâc banaŋmu.
E mic banaŋmuo
eki iŋuc jaha mic bacnâpoocmu.*
13 Mumupaŋ‐nâŋeczi dockeocmuo
ere mumupaŋzi sanaŋkeocmu.
Moc murâ moc mu i erao mi fokac.*
Mitire mumusifuc
14 Go dâŋ i heqâre‐jarerâ Anuture maio mujomirehuc jaza sanaŋketec dâŋ racnere mu iigoc mi enʒepieŋ. I wiac fârimâc, iŋuc ehuc miti mamana sipiric‐jopaniŋmu.* 15 Anutuzi mana‐gareme sâckeocte ʒoɋachec juhuc giege bazemec, ehuc dâŋ fâri qizecne fâretiŋ jaha mujaŋgeŋkehuc jutec mimizi gieŋic gore faio mi fezejec.* 16 Â dâŋ jawanere ojowane bapie mi bafic‐jopazemec. Iŋuc eeŋgopieŋzi eraku miti beheniŋmu.* 17 Burecdâŋ‐jeŋiczi biac wicbâroŋ iŋucne erâ ŋedâmâreocmu. Ŋic iŋucne jaŋeraonec moc Himenaio â moc Fileto.* 18 Jahe dâŋ fâri beherâ mukopirec, fafahare i biac fuawec. Iŋuc muhuc ŋic gâcne miti ba imac ejarekopirec.
Anuture qânâ wâtuŋ â râqâc furi sâko
19 Anutuzi qânâ wâtuŋ râeme huwec ine qiŋ herâ domakac. Maqâreŋ‐ticne ʒiŋuc fokac: “Wofuŋzi biŋefâc‐ticne ʒâŋitac‐jopaekac.” Erâ moc ʒiŋuc: “Wofuŋte ʒâŋe bajuŋgopieŋ jaŋe ʒeŋgoma bâbâsifuc râpeckenʒepieŋ.”* 20 Ufuŋ sâkoo râqâc wiac gol â siliwazi bakicne i sawa mâcne, jâczi â mâreŋzi bakicne i mâmâc ŋekac. Râqâc gâcnao wiac furi sâkozi huocmu, gâcnao wiac omanezi huocmu.* 21 Moc e bâbâsifuc wiac qikiŋneme maŋne ɋaɋackeme râqâc furi sâko eme ufuŋ runezi jambuŋkerâ bajuhuc izi gie biaŋ fuŋne fuŋne baocmu.*
Wofuŋte ŋic juzo
22 Socɋârizi wiac fuŋne fuŋnere andac eeŋgopieŋ i bâec bazemec. Ehuc maŋjaŋic biaŋkekicnezi Wofuŋ mu wâwâsic ecneeŋgopieŋ jaŋe bafic‐jopatec tiŋke biaŋ eere â mamanasiŋte â maŋjauŋte â wamare henʒiriŋnenʒepieŋ.* 23 Mugufuc dâŋ mutucne â racne igockezemec, irec fârine mu qaqatarac sawa fuaekac i manakic.* 24 Wofuŋte kiŋaŋŋiczi mu hehefaric mi ezejec, e ŋic sasawa âgo ejarehuc miti micafec qazu‐jarezejec, â pepecne ecnepie wiac aaricko mi ejarezejec;* 25 erâ ŋic maŋrâŋgeŋ ine urucko mu bâtiŋ ejareme Anutu e jahac moc bawahac‐jopame maŋjeŋic bârisierâ dâŋfâri ʒâŋitanʒepieŋ.* 26 Eme maŋjeŋic uŋtome, Sataŋte dâŋ reŋkeniŋte wiwitic‐ticnao kicjopawec i hetaranʒepieŋ.