Jesu fafahare‐ticnere dâŋ
15
Âgofâc‐nane, Biŋebiaŋ ŋazape manambiŋ, erâ wâc bajueŋgopieŋ, irecteaŋ manasu‐ŋarepe. 2 Qazu‐ŋarepo irec sâckoa bajuŋgopieŋko sâcne bâpiaŋ‐ŋopaocmu. Me bajuhapie biac sifucke‐ŋare wiac moc ewec? 3 Miti qizecne no narekicne ijaha ŋoŋe ŋarehuc kecʒiŋuc muhuc fuŋke‐ŋarepo: Kristo e miti papiao mucnekicne irec sâcko erâ sâqocne‐nâŋecte okacne hâmowec.* 4 Erâ miti papiao mucnekicne irec sâckoa ʒâŋeruŋko hurâ ʒoaŋ jahec â moc eha ɋârerâ faharewec.* 5 Faharerâ qanaŋ Kefa fuacnewec, izi motecfâcne 12 fua‐jarewec.* 6 Izi mitiŋic ʒare‐jeŋic 500 jâuruwec jaŋe tumaŋnehapie fua‐jareme hone‐fârembiŋ. Jaŋeraonec bocjahazi ɋâricne juŋgopieŋ, â gâcnezi hâmombiŋ. 7 Izi Jakobo fuacnewec, izi aposolo mâmâc sasawa fua‐jarewec.* 8 Ʒâhecko ine ombâŋtâc no wâc fua‐narewec.* 9 No aposolo waha qaqane jâmbâŋ, no Anuture kikefuŋ guru jopa sipiric ejarepore aposolo ʒâŋe munarepie mi sâckeekac.* 10 No aposolo epo i Anutu aki anonoc‐ticnere erâ epo. Erâ aki anonoc‐ticnezi norao racne mi ewec. No gie bapo i gâcne jaŋere sâc jâurukac, erâ no nahac wemo‐nanezi bazapo, Anuture aki anonoc norao fowec izi bawec.* 11 Eme no mecne jaŋe mecne miti iŋuc hâcne muromackeeŋgopeneŋ, eme ŋoŋe i hâcne manambiŋ bajuŋgopieŋ. Jesu hâmockonec ɋârewecte ɋârenaŋmu
12 Kristo e hâmockonec ɋârerâ faharewec, miti iŋuc muhuc ŋazapene wemocte ŋoŋeraonec gâcnezi hâmockonec fafahare mi fokac mueŋgopieŋ? 13 Hâmockonec fafahare‐nâŋec i mickehuc Kristo fafahare‐ticne mâmâc mickezo. 14 Kristo mi faharezacko ine miti mumu‐nâŋec fârimâc ezac â mamanasiŋ‐ŋeŋic iŋuc jaha fârimâc ezac. 15 Erâ i sawa mâcne. Nâŋe Anuture mumbeŋ, e Kristo hâmockonec bafaharewec. Eme hâmockonec fafahare mi fozacko Anutuzi wemocko Kristo bafaharezac. Irec dâŋ mumbeŋ i Anutu micko itic ecnehuc burecŋicfâc‐ticne eŋgopeneŋ ezac.* 16 Ŋic hâmockonec mi fahareniŋmu, iŋuc murâ Kristore iŋuc jaha hâmockonec mi faharewec muzo.* 17 Kristo e hâmockonec mi faharezacko ine mamanasiŋ‐ŋeŋic racne ezac â kiŋŋeŋic foŋarezac, 18 â Kristo manasiŋkehuc hâmombiŋzi sipirickembiŋ ezac. 19 Nâŋâc mâreŋko ʒira sawa Kristore mamanac maŋgâŋ junʒapeŋko, ine mamakucne fuŋmoc ehuc gâcne siric‐jopa‐fârenʒapeŋ.
Hâmockonec fafahare i birio faharezo
20 Erâ iŋuc mâcne, Kristo e jâmbomac hâmockonec ɋârerâ ŋic hâmokicne jaŋere micne barâ faharewec jukac.* 21 Ʒiŋucte hâcne: Ŋiczi hâmoc fuŋke‐nârewec iŋuc jaha ŋiczi hâmockonec fafahare fuŋke‐nârewec.* 22 Adamhec ʒuʒuhuc‐nâŋec fokacte hâmo‐fâreeŋgopeneŋ, iŋuc jaha Kristohec ʒuʒuhuc‐nâŋec fokacte fahare‐fârenʒoŋgopeneŋ. 23 Erâ birine mukicne sâc faharezo: Micne bapazi Kristo, izi fifisi‐ticnao Kristore bufuŋfâc,* 24 izi dameŋ taraocmu; Kristo e fekicne â tâpirihec â ʒoɋac sasanaŋhec bawahac‐jopame munaŋke‐fârehapie Wofuŋ gie‐ticne i Anutu Mamac‐ticne bârisiecneme dameŋ taraocmu hâcne.* 25 Ʒi ine Wofuŋ gie‐ticne bahuc juocmu, juku râsifâc‐ticne ro waha âte ejare‐fârerâ gie‐ticne bataraocmu.* 26 Râsi sâko mimic qa imac ecneocmu ʒâŋene hâmoc.* 27 Anutuzi ŋic â wiac sasawa Kristore wahamicnao râec‐nâpo‐fârewec hâcne. Erâ dâŋ ʒiŋuc fokac, “Ŋic â wiac sasawa bawahac‐joparâ ere wahamicnao guruc‐jopa‐fârewec”, dâŋ i manapene Anuture mâmâc mukicne mi ezejec. E hâcne Kristore wahamicnao guruc‐nâpoweczi rurumaŋnao mi huocmu.* 28 Mamac e ŋic â wiac sasawa Ŋokâ rurumaŋnao guruc‐nâpo‐fâreme Ŋokâ e Mamacte wahamicnao waharâ domaocmu. Eme Anutuzi qâhuc‐nâpo‐fârerâ juju isiricke‐fâreocmu.
Hâmockonec fafahare mi fome muzac mamakucne enʒapeŋ
29 Ŋoŋeraonec gâcnezi hâmokicne jaŋere erâ Miti Opâ ruaeŋgopieŋ, i hâmockonec fafahare mi fokacko wemocte iŋuc eeŋgopieŋ? 30 Erâ wâc nâŋe ine wemocte ʒârâ hâriŋ faio gâbâmâc qâmâc jumbeŋzi jueŋgopeneŋ?* 31 Âgofâc‐nane, Kristo Jesu Wofuŋ‐nâŋeczi eri‐nane râec‐ŋopawec ŋoŋere maio mukopac: No ʒoaŋ gie bapa sâc hâmoczi bâmbeŋnuha juekopac.* 32 No Efeso haeo qowi mimicne jaŋehec juju gie bapo i ŋicdâŋko siŋkehuc epoo wemo fârine mo fua‐nareocmu? Hâmockonec fafahare mi fokacko ʒiŋuc mupene sâckezac: “Tomâcko moc hâmonʒipeŋte miŋecgac jaha nânâ qowi ro nâc qânâc enaŋ.”* 33 Moczi moc ba qâsoric eŋarenʒipiŋ ine! Kosa jujune jaŋerao qohotaocmu e eebapa biaŋne sifuckecneocmu. 34 Ŋoŋe maŋŋeŋic ɋâreme pectâc juhuc sâqocne geŋkenʒepieŋ. Ŋoŋeraonec gâcnezi Anuture kâuc baŋgopieŋ, i manarâ mimieniŋte mukopac.*
Fafahare fuŋne fuŋne faharezo
35 Gâcnezi ʒiŋuc mecne muniŋmu: Hâmokicne jaŋe weniŋuc erâ fahareniŋmu â sahac hawari‐jeŋic weniŋucnehec fuaniŋmu? 36 I dâŋ mutucne; ŋoŋe wiac saraeŋgopieŋ i mâc mi wefuekac, mimiŋne ʒaŋkeha bâpâŋne wefuekac.* 37 Â wiac saraeŋgopieŋ, i borâcne mi saraeŋgopieŋ, hândâŋne sawa saraeŋgopieŋ, jacgoŋ me wiac gâcnere hândâŋ, eme borâcne â rehacne ʒâhec fuaekac. 38 Eme Anutu e mana tararâ hawari mucnewec ijaha wefurâ fuaekac, hândâŋne sâc hawari fuŋne fuŋne fuaekac.*
39 Sahacte fuŋne iŋuc jaha mocjaha mi fokac, ŋic nâŋâcne sahac i moc â bec qowi jaŋere sahac i moc â wipe jaŋere moc â opâ qowi jaŋere moc. 40 Sambâŋko wiac fâri ŋerakac â mâreŋko wiac fâri ŋerakac. Erâ sambâŋko ŋerakac i eri‐ticne moc, â mâreŋko ŋerakac i eri‐ticne moc. 41 Ʒoaŋ e tatamacne moc, mosa e tatamacne moc, bâpiŋ jaŋe tatamac‐jeŋic moc, erâ bâpiŋ tatamac‐jeŋic mocjaha mâcne, fuŋne fuŋne fokac.
42 Hâmockonec fafahare irec fuŋne ijaha fokac. Sarakicnezi sisirowene, fahareocmuzi mi sisirowene; 43 sarakicnezi joŋtawekicne, fahareocmuzi erinehec; sarakicnezi weweaŋne, fahareocmuzi tâpirinehec;* 44 sarakicnezi mâreŋ sahachec, fahareocmuzi sambâŋ sahachec. Mâreŋ sahac fokac, iŋuc jaha sambâŋ sahac fokac.
Mârâc Adam â ʒâhec Adam
45 Dâŋ ʒiŋuc hâcne qâreŋkekicne fokac: “Ŋic mârâc fufua Adam e maŋ qâqâtâchec erâ ɋârewec.” Ʒâhec Adam e ine Mârohec ehuc juju bâbâfua irec rune ewec.* 46 Sambâŋte wiaczi mi bâniewec, mâreŋte wiaczi bânieha sambâŋte wiaczi ʒâhec ewec. 47 Mâreŋŋic e mâreŋzi bakicnere mâreŋkonec ŋic ewec â ʒâhecŋic e ine sambâŋkonec.* 48 Mâreŋkonec ŋic juwec sâc ijaha mâreŋkonec ŋicfâc‐ticne jueŋgopeneŋ, â sambâŋkonec juwec sâc ijaha sambâŋte biŋefâc‐ticne nâŋâc junaŋmu. 49 Eme mâreŋkonec ere hawari rombeŋ, iŋuc jaha sambâŋkonec ere hawari ronaŋmu.*
Jesu fisime sambâŋ sahachec enaŋmu
50 Âgofâc, dâŋ moc ʒi mupe mananiŋ: Mâreŋ sahac‐nâŋeczi Anuture uucmaŋ sâcne mi rauckeocmu, â wiac gârecke ʒaŋ eenezi wiac fofo sanaŋ mi wâc rauckeocmu.* 51 Manaŋgopieŋ, ʒi dâŋ soŋne moc mufua‐ŋarepe: Nâŋâc mi hâmo‐fârenaŋmu, hetikierâ hawari moc ee ine ʒeŋgoma efârenaŋmu.* 52 Qeŋ mimic dâŋeme ututuŋ, ɋeŋfâfâc jaha iŋuc hâcne enaŋmu. Qeŋ dâŋeme hâmokicnezi faharerâ gârecke ʒaŋ tâmiric juniŋmu, â ɋâricne junaŋmuzi wâc hetikierâ hawari moc enaŋmu.* 53 Sahac ʒi gârecke ʒaŋ eenezi juju saric i ŋaqi iŋucne heme huzejec, â hâmocte biŋe ekicnezi juju sanaŋ heme huzejec.*
54 Eme gârecke ʒaŋ eenezi juju saric heme huocmu, â hâmocte biŋe ekicnezi juju sanaŋ heme huocmu, dameŋ ira dâŋ kecʒiŋuc qâreŋkekicne i deŋkeocmu:
“Jujuzi hâmoc ɋâckewec.”
55 “Hâmoc go tâpirige weni?
Hâmoc go ʒârâge weni?”*
56 Sâqocnezi hâmocte ʒârâ ekac, â sâcmutâc dâŋte erâ sâqocnezi tâpirinehec ekac.* 57 Anutu e Wofuŋ‐nâŋec Jesu Kristo ecneme jujure tâpiri bâfua‐nâreekacte muteŋkenʒepeneŋ. 58 Irec âgofâc‐mae, ŋoŋe sanaŋkerâ qiŋ herâ domanʒepieŋ, ehuc Wofuŋ gie‐ticnere dameŋ sâc henʒiriŋnehuc banʒepieŋ. Wofuŋte erâ gie bapie fârimâc mi eocmu, iŋuc manahuc banʒepieŋ.*