MATAIO
Ŋic fua warekupie Jesu fuawec irec dâŋ binaŋ
1
Ŋic gaŋne gaŋne fua wefukupie Jesu Kristo e Abraham â Dawidi jahere ɋâric fuawec.* 2 Abrahamte bifuŋko Isaka fuawec. Isakare bifuŋko Jakobo fuawec. Jakobore bifuŋko Juda â hahac ɋafâcne fuambiŋ.* 3 Judare bifuŋko Perese â Sera fuapic, jahe Tamazi rocjofawec. Peresere bifuŋko Hezoroŋ fuawec. Hezoroŋte bifuŋko Ram fuawec.* 4 Ramte bifuŋko Aminada fuawec. Aminadare bifuŋko Nasoŋ fuawec. Nasoŋte bifuŋko Salamoŋ fuawec. 5 Salamoŋte bifuŋko Boasi fuawec, e Rahabazi rowec. Boasire bifuŋko Obede fuawec, e Rutizi rowec. Obedere bifuŋko Isai fuawec.* 6 Isaire bifuŋko ŋicwofuŋ Dawidi fuawec. Ŋicwofuŋ Dawidire bifuŋko Salomo fuawec, e Uriare ŋonâŋzi rowec.* 7 Salomore bifuŋko Rehoboam fuawec. Rehoboamte bifuŋko Abia fuawec. Abiare bifuŋko Asa fuawec.* 8 Asare bifuŋko Josafata fuawec. Josafatare bifuŋko Joram fuawec. Joramte bifuŋko Usia fuawec. 9 Usiare bifuŋko Jotam fuawec. Jotamte bifuŋko Ahaʒi fuawec. Ahaʒire bifuŋko Hisikia fuawec. 10 Hisikiare bifuŋko Manase fuawec. Manasere bifuŋko Amoŋ fuawec. Amoŋte bifuŋko Josia fuawec. 11 Josiare bifuŋko Jekonia â hahac ɋafâcne fuambiŋ, ine Judaŋic Babe mâreŋko bacjopa rakicne dameŋ ira fuambiŋ.* 12 Eme irec fainao Jekoniare bifuŋko Sealitie fuawec. Sealitiere bifuŋko Serubabe fuawec.* 13 Serubabere bifuŋko Abiudu fuawec. Abiudure bifuŋko Eliakim fuawec. Eliakimte bifuŋko Aso fuawec. 14 Asore bifuŋko Zadoko fuawec. Zadokore bifuŋko Akim fuawec. Akimte bifuŋko Eliudu fuawec. 15 Eliudure bifuŋko Eleaʒa fuawec. Eleaʒare bifuŋko Mataŋ fuawec. Mataŋte bifuŋko Jakobo fuawec. 16 Jakobore bifuŋko Josefe fuawec, e Mariare ŋowe ewec. Â Mariazi ine Jesu rowec, ere ʒâŋe Kristo mukicne.* 17 Fufua ine kecʒiŋuc fua warembiŋ: Abrahamtaonec fua fua wefukupie Dawidi fuawec i gaŋjeŋic 14. Â Dawidiraonec fua fua warekupie Judaŋic Babe mâreŋko bacjopa rakicne ine gaŋjeŋic 14 jaha. Â dameŋ irecnec fua fua warekupie Kristo fuawec iŋuc jaha gaŋjeŋic 14 ekac.Jesu fufua‐ticnere binaŋ
18 Jesu Kristo fuawec irec fuŋne kecʒiŋuc fokac: Neŋgoc‐ticne Maria e Josefe biŋe qacnepie rârâwiŋ juhapire Tiri Mârozi mâsi bame Maria e motec kiweckewec.* 19 Iŋuc ecneme biŋe‐ticne Josefe e mitihec juwecte maŋnezi kecʒiŋuc muwec: No dâŋticne hofao râepe mimi fainao fezacte kamierâ behezepac. 20 Iŋuc eocte manasuhuc juhame Wofuŋte aŋelo moczi guŋko fuacnerâ kecʒiŋuc âzâcnewec: “Josefe, go Dawidire ɋâriczi Maria ŋonâŋge rocmurâ manabâc mi ezemec, motec kiweckekac i Tiri Mâroraonec.* 21 Motec roocmu ere ʒâŋe Jesu muzemec, eki hâcne gurufâc‐ticne sâqocnere niŋgiŋkonec batarac‐jopaocmu.”* 22 Wiac sasawa fuawec i porofete moczi Wofuŋte micte dâŋ kecʒiŋuc muwec i fârinehec eocte fuawec:*
23 “Manaŋgopieŋ, naru ʒeŋoŋ moczi motec kiweckerâ roocmu,
ere ʒaŋe Imanue muniŋmu.”