ZEFANIA
Porofete Zefania e Habakuc juwec dameŋ irec juwicnao gie‐ticne fuŋkerâ bahuc juwec, ine jara 640–609 B. C. dameŋ ŋondeŋ ira; erâ i Josiazi Judaŋic jaŋere ŋicwofuŋ juhame. Erâ e porofete Jeremiazi juha juwec wâc. Dâŋticne mu qâreŋ ehuc mufuawec i Judaŋic jaŋe juju â eebapa‐jeŋicte heheɋâre gie bahuc juhapie ewec.
Zefania juju â gie bapa‐ticnere dâŋ â binaŋ gâcne wâc mi manaŋgopeneŋ. Papia‐ticnao ine dâŋ muhuc juwec i sawa qâreŋkekicne fokac, e jahacne binaŋ ine aricne. Irec ʒiŋuc sawa mananaŋ: E Wofuŋtaonec okac fifisire findaŋdâŋ mumu ŋic moc hâcne.
E gaŋ 1 ira dâŋticne fuŋkehuc uŋdâŋ gâcne mu qâreŋ ewec. Erâ uŋdâŋ i dâŋ fârine mocte rurumaŋnao fokac, dâŋ fârine kecʒiŋuc: “Wofuŋte dameŋ maickekac”. Wofuŋte dameŋ mukac dâŋ i Israe ŋic â Judaŋic okacne fisi‐jareocmu irec manasuhuc mukac. Erâ dameŋ ira mâreŋko ŋic gurune gurune jaŋerao ima samaki fuaocmu wâc.
Gaŋ 2:1-3. Ira ine ŋic tiŋne â maŋhuhuŋ jueŋgopieŋ jaŋere uŋdâŋ wâc qâreŋkekicne. Jaŋe wiac hâhâwicne sâko fuaocmu izi jowaruocte Wofuŋtao roweckenʒepieŋ muhuc mu qafeŋ ejarekac hâcne.
Gaŋ 2:4-15. Ira dâŋ fokac izi ine ŋicguru gâcne, Filisa, Moabi, Amoŋ, Kusi â Asiria ŋic jaŋere uŋdâŋ ekac.
Gaŋ 3:1-13. Ira Jerusalem hae rune â fekicnefâc‐jeŋic jaŋere uŋsawaŋ mufuakicne. Jaŋe hâcne Wofuŋte uŋdâŋ mana‐bipierâ hehesicne boc jujumbieŋ. Eme Wofuŋ e maŋfefe â pepecnehec jaŋe bâsirowec‐jopahuc guru pitic maŋhuhuŋhec jaŋe sabec‐jopame wamao ʒuhuckerâ juniŋmu.
Papia tataranao ine Jerusalem hae rune jaŋe Wofuŋzi bafic‐jopahuc râsi jopa jâpec ejareme dameŋ biaŋ mocwâc fua‐jareocmu, irec Wofuŋ ʒeri mumuteŋ ecneniŋte ejarekac.