Kioŋte dâŋ
27
Juda ŋicwofuŋ Zedekia, Josiare ŋokâ hâcne, e ŋicwofuŋ gie‐ticne fuŋkerâ juhame Jeremiarao Wofuŋtaonec dâŋ kecʒiŋuc fuawec: 2 Wofuŋzi kecʒiŋuc nazawec: “Go muc â kioŋ wiac bâfuarâ upegao râezemec. 3 Erâ Jerusalem haeo kiŋaŋ fisirâ Juda ŋicwofuŋ Zedekiarao fuambiŋ jaŋe ŋicwofuŋfâc‐jeŋic kecʒiŋuc i jaŋere dâŋ jaretec baranʒepieŋ: Edom ŋicwofuŋ, Moabi ŋicwofuŋ, Amoŋ ŋicwofuŋ, Tiro ŋicwofuŋ â Sidoŋ ŋicwofuŋ. 4 Erâ bomboŋfâc‐jeŋic dâŋ kecʒiŋuc jazaniŋte mujarezemec: ‘Anutu Tâpiri Ɋuŋɋasaŋ Wofuŋ, Israere Anutu eki ʒiŋuc mukac: Ŋoŋe bomboŋfâc‐ŋeŋic kecʒiŋuc jazanʒepieŋ: 5 “Mâreŋ mecne, erâ mâreŋte faio ŋic â qowi juraŋgopieŋ jaŋe mecne i noni hâcne menane sicnehuc tâpiri sâko‐nanezi bâfuac‐jopapo, irec e me e râcnezo murâ râcnepemu. 6 Ʒi ine mâreŋ i sasawa kiŋaŋ qaqa‐nane Nebukaneza, Babe ŋicwofuŋ hâcne, ere meo râepe fokac, ehuc kâte qowi jaŋe wâc kiŋaŋ qacneniŋte mujarepo. 7 Ŋicne ŋicne jaŋe e ŋokâ‐ticne erâ ŋosa‐ticnere kiŋaŋ qahuc jufekupie e jahacne mâreŋ‐ticnere dameŋ maickezejec wâc; maickeme ŋicguru kâcɋene â ŋicwofuŋ tâpirihec jaŋe rauckepie kiŋaŋ qaqa‐jeŋic ezejec. 8 “‘ “Ŋicguru moc ŋicwofuŋ‐jeŋichec kiŋaŋ qacneniŋte qikiŋneniŋmu me Babe ŋicwofuŋte tagi mi deniŋmu jaŋe ʒikazi me roroczi me huc hâmoczi bâtiŋ‐jopa raku Babe ŋicwofuŋ ecnepe bâsirowec‐jopa‐fârezejec; Wofuŋ nore dâŋ iŋuc. 9 Irec porofete me findaŋdâŋ omane mumu me guŋ fuŋne mamana me mâsi bapare fuŋne mamana me qaŋgec bapa jaŋe dâŋ ʒiŋuc ŋazapie mi mananʒepieŋ: ‘Ŋoŋe Babe ŋicwofuŋ ere kiŋaŋ qaqa moc mi jujâmbâŋkeniŋmu.’ 10 Jaŋe mâreŋ‐ŋeŋickonec jâpec‐ŋopaniŋte â noni bâtâtiec‐ŋopape sipirickeniŋte findaŋdâŋ burecne ŋazaeŋgopieŋ. 11 Ŋicguru moc Babe ŋicwofuŋ tagi‐ticne dehuc kiŋaŋ qacneniŋmu jaŋe ine mana‐jarepe mâreŋ‐jeŋickoa gie he sarac ehuc ŋec juc enʒepieŋ, Wofuŋ nore dâŋ iŋuc.” ’”
12 Juda ŋicwofuŋ Zedekia e ine ʒiŋuc muhuc dâŋ ijaha âzâcnepo: “Ŋoŋe Babe ŋicwofuŋ tagi‐ticne dehuc e jahacne â ŋicfâc‐ticne jaŋere kiŋaŋ qahuc mi sipirickerâ sâcne juniŋmu. 13 Ŋicguru moc Babe ŋicwofuŋ kiŋaŋ mi qacneniŋmu jaŋe sipirickeniŋte Wofuŋzi muwec. Eme go â ŋicfâcge ŋoŋe wemocte dâŋ i mana‐bipierâ ʒika â roroc â huc hâmoczi ŋopame hâmoniŋte muŋgopieŋ me? 14 ‘Ŋoŋe Babe ŋicwofuŋ ere kiŋaŋ mi qajâmbâŋkeniŋmu’, porofete iŋuc ŋazaeŋgopieŋ jaŋere dâŋ mi mananʒepieŋ, jaŋe findaŋdâŋ burecne ŋazaeŋgopieŋ hâcne. 15 Wofuŋte dâŋ ʒiŋuc: No jaŋe mi sorec‐jopapo, aricne, jaŋe nore ʒâŋeo âke hotahuc findaŋdâŋ burecne ŋazaeŋgopieŋ i behec‐ŋopape ŋoŋe mecne â porofete findaŋdâŋ ŋazaeŋgopieŋ jaŋe mecne mâmâc sipirickeniŋte iŋuc eeŋgopieŋ.”
Jeremiazi taha bapa â ŋic ŋokac uŋdâŋ jazakac
16 Eme no taha bapa â ŋic ŋokac ʒi sasawa ʒiŋuc jazapo, “Wofuŋzi kecʒiŋuc mukac: Porofetefâc‐ŋeŋic findaŋdâŋ kecʒiŋuc ŋazaeŋgopieŋ jaŋere dâŋ mi mananʒepieŋ, ‘Manaŋgopieŋ, Wofuŋ taha ufuŋ‐ticnere râqâc wiac i dameŋ mi ʒoraha Babe haeonec risie wareocmu,’ findaŋdâŋ i burec ehuc ŋazaeŋgopieŋ hâcne. 17 Ŋoŋe dâŋjeŋic mi manahuc Babe ŋicwofuŋ kiŋaŋ qacnenʒepieŋ, iŋuc erâ sâcne juniŋmu; hae ʒi wemocte sesutac fuarâ foocte muŋgopieŋ? 18 Jaŋe porofete fârine moc juŋgopieŋko â Wofuŋ nore dâŋ fojarekacko ine Anutu Tâpiri Ɋuŋɋasaŋ Wofuŋ no mu wâwâsic enarepie mupe nore taha ufuŋko mecne, Juda ŋicwofuŋte ficko mecne â Jerusalem haeo mecne râqâc wiac nâfocne fokac i Babe haeo mi baranʒepieŋ. 19 Anutu Tâpiri Ɋuŋɋasaŋ Wofuŋ no wâtuŋ mecne, râqâc sâko â ŋeŋe wiac‐ticne mecne, erâ taha ufuŋte wâcwiac ʒanʒaŋne hae ʒira fokac, irec dâŋ mukopac. 20 Babe ŋicwofuŋ Nebukaneza e Jojakimte ŋokâ, Judare ŋicwofuŋ Jekonia erâ Judare â Jerusalemte ŋic fekicne sasawa Jerusalem haeonec Babe haeo bacjopa rawec dameŋ ira beheme fowec. 21 Irec Anutu Tâpiri Ɋuŋɋasaŋ Wofuŋ, Israere Anutu no taha ufuŋko â Juda ŋicwofuŋ ere ficko erâ Jerusalem haeo râqâc wiac ʒanʒaŋne fokac irec ʒiŋuc mukopac hâcne: 22 Wiac i Babe haeo baranʒepieŋ, eme ira foha juku dameŋ moc maickeme no irec manasurâ mupe hae mâreŋ ʒira mocwâc risiezejec, Wofuŋ nore dâŋ iŋuc.”