BINAŊ QÂHÂC I
BINAŊ QÂHÂC I â II
BINAŊ QÂHÂC I â II irec maŋnao Judaŋic ŋicwofuŋfâc‐jeŋic sasawa jaŋere binaŋ mocwâc qâhâckehuc râekicnere papia ʒâŋne BINAŊ QÂHÂC mukicne. Papia qizec jajahec i mârâc jaha jâmbâŋ papia mocjahao qâzuckepie fowec. Juku ʒâhec ine bâfâuckepie papia qizec jajahec fuapic.
Papia fufuŋkenao Saulo â Dawidi jahere binaŋ mocwâc fuakac, â tataranao ine Judaŋic Babilonia mâreŋko kâpâcwâruo bacjopa rakicne irec binaŋ fokac. Ine hâcne, Judaŋic erâ ŋicwofuŋfâc‐jeŋic jaŋe Anuture maio weniŋuc juhapie Wofuŋzi hone bafic â jopa bâtiŋ ejarewec irec dâŋ â binaŋ wiac i mu bac efârekicne.
Dâŋ neŋgocne sâko gaŋne gaŋe forakac ine kecʒiŋuc:
Bin I 1–10. Ira Adamtaonec ŋic gaŋne gaŋne fua wefukupie Saulozi Israe ŋic jaŋere ŋicwofuŋ erâ juku hâmowec irec dâŋ â binaŋ fokac.
Bin I 11–29. Ira ŋicwofuŋ Dawidire binaŋ qâreŋkekicne forakac.
Bin II 1–9. Ira Salomore dâŋ â binaŋ bâfuaŋgopeneŋ.
Bin II 10–36. Ira ine Israe ŋic jaŋere uucmaŋ fâuckeme Judaŋiczi juwefuku kâpâcwâruo rafârembiŋ, irec binaŋ râekicne.
Ŋifec ine Anutuzi Wofuŋ jujareha ere gurufâc jumbiŋ, â Jerusalem haeo taha ufuŋ‐jeŋic ŋeha ira Anutu mai ecnembiŋ irec binaŋ i wâc mâmâc râekicne fokac. Ine hâcne, qâreŋŋic e fuŋne jajahec kecʒiŋucte Judaŋic jaŋere binaŋ mocwâc banârewec:
1. Judaŋic jaŋerao wiac hâhâwicne fuarâ foha Anutuzi sifu dâŋ mupaŋke‐jarewec irec fârine fuaocte giene bahuc juwec. Irec e mana‐jareha kâpâcwâruonec risierâ sahackopec â maŋkopec juju i heɋârerâ gurufâc‐ticne ʒuhuckerâ jumbiŋ. Moc iŋuc nâzâ nâwotuc eocte papia‐ticne qâreŋkewec.
2. Â moc ine Jerusalem haeo Wofuŋ mai eecne i weniŋuc erâ fuŋkembiŋ, â taha bapa â Lewiŋic jaŋe gie‐jeŋic weniŋuc erâ bambiŋ i wâc nâzâ nâwotuc eocte qâreŋkewec. Ehuc, Dawidizi taha ufuŋ fufua â maŋnao taha gie bapa â wiac gâcne ebac ee irec ʒaʒawie gie bame juku ʒâhec ŋokâ‐ticne Salomozi taha ufuŋ bajâmbâŋkewec irec dâŋ i mâmâc mu qâreŋ ewec.