SÂCMUTÂC HÂSINE
MITI RAŊɊAre papia qizec namba 5 irec ʒâŋe SÂCMUTÂC HÂSINE mueŋgopeneŋ. Papia irec fuŋne kecʒiŋuc fokac: Mose e qanaŋ Israe ŋic Sinai tikio jowac‐jopa rame ira fisipie Wofuŋzi mâsi hâhâwicne ejarehuc sâcmutâc dâŋ fuŋne fuŋne mufua‐jarewec. Eme Mosezi bânie‐jareme Sinai tiki mâreŋkonec faharerâ rahuc juku Kanaaŋ mâreŋ mendâŋnao fisimbiŋ, Jordaŋ opâ ocniŋucnao. I Israe ŋic Aigita mâreŋkonec wahambiŋ i jaŋe hâmohapie ɋâricfâc‐jeŋic jaŋe iŋuc embiŋ. Eme jaŋe Anutuzi mamacfâc‐jeŋic Sâcmutâc Sanaŋ Teŋ jarehuc jaŋehec ʒâʒâfic ewec irec dâŋ boc mi manahuc juhapie Mosezi ira hâcne hetumaŋ‐joparâ mâzoc‐jopahuc Wofuŋtaonec sâcmutâc dâŋ i mocwâc heɋâre‐jarewec, ehuc dâŋ i reŋkehuc juniŋte jaza qâmoc ewec. Jordaŋ wâneŋko dâŋ jazawec sasawa i Sâcmutâc Hâsine papia irec maŋnao qâreŋke‐fârekicne fokac hâcne.
Eme gaŋne gaŋne dâŋ forakac i kecʒiŋuc:
Sâc 1:1-5. Mumuʒâwe dâŋ. Qâreŋŋic e juwicnao wiac fua wefuwec irec binaŋ bakicne ira iticnehuc dâŋ fuŋkekac.
Sâc 1:6–Sâc 3. Ira Israe ŋicguru jaŋe Horebe tiki mâreŋkonec faharerâ hata juwarehapie Anutuzi weniŋuc erâ ŋezic‐jopahuc jowac‐jopa warewec irec binaŋ fokac.
Sâc 4:1-43. Ira Anuture sâmutâc dâŋ mana rereŋ eniŋte jaza qâmoc ekac, erâ nemu burec â qâpuc wiac bajunʒipiŋte uŋ sawaŋ ejarewec irec dâŋ qâreŋkekicne.
Sâc 4:44–Sâc 30. Ira sâcmutâc dâŋ fuŋne fuŋne harierâ mufua‐jarewec. Â sâcmutâc dâŋ izi ʒâʒâfic raŋɋanere hobeteŋ erâ foocte manasuhuc jazawec.
Sâc 31–34. Ira ine Mose hâmoc dameŋ‐ticne bembeŋkeha wiac fuawec irec dâŋ fokac. Gaŋ 32 ira Mosere gae sâko fokac, gaŋ 33 ira Mosezi Israe ŋic mimic jambuŋ‐jopawec irec dâŋ, â gaŋ 34 ira Mose hâmoc‐ticnere binaŋ, iŋuc forakac hâcne.
Papiare dâŋ neŋgocne sâko ʒiŋuc fokac: Anutuzi ŋicfâc‐ticne bâwosâec‐jopakicne jaŋe maŋjauŋ ejarehuc jambuŋ‐jopawec â ŋezic‐jopawec. Irec jaŋe i manasuhuc erao roweckehuc dâŋticne mana rereŋ enʒepieŋ.
 dâŋ fâri hândâŋne moc ine gaŋ 6:4-5 ira fokac, kecʒiŋuc: “O Israe kikefuŋ, ŋoŋe mananiŋ: Wofuŋ e mocjahazi Anutu‐nâŋec jukac. Irec ŋoŋe maŋŋeŋic â qâqâtâc‐ŋeŋic â ʒoɋac‐ŋeŋic Wofuŋ Anutu‐ŋeŋic furu jaha qikiŋnecnepie fozejec.” Dâŋ irec hâcne Jesuzi ʒiŋuc muwec: “Dâŋ izi sâcmutâc dâŋ fârine â femicne.” (Mataio 22:37)