Kiŋnêŋ Buku Ŋamataŋa
Kiŋnêŋ Buku Ŋamataŋa tonec gêjac têku lau Israel nêŋ kiŋ nêŋ miŋ, taŋ kêsêp Samuelnê buku luagêc naŋ.
Buku tau gêwa tau kêkôc gêja ŋasêbu têlêac gebe
1. Môkêlatu 1-2 Salomo kêtu lau Israel to Juda nêŋ kiŋ gêjô Dawid su. Dawid gêmac êndu ŋamiŋ.
2. Môkêlatu 3-11 Salomo gêjam gôliŋ lau Israel to ênê kôm ŋanô ŋamiŋ. Ênê kôm towae gebe kêkwê lôm dabuŋ aŋga Jerusalem.
3. Môkêlatu 12-22 Gamêŋ Israel gêwa tau kêkôc gêja gamêŋ luagêc, sêsam teŋ gebe Israel ma teŋ gebe Juda. Kiŋ taŋ sêjam gôliŋ gamêŋ luagêc tonaŋ naŋ, nêŋ miŋ kêsêp môkêlatu tonaŋ e jagêdêŋ têm Jehosapat kêtu kiŋ aŋga Juda ma Ahasia gêjam gôliŋ Israel.
Kiŋnêŋ buku luagêc kêkip kiŋ samob nêŋ lêŋ taŋeŋ wamu gêdêŋ Anôtôŋa sa. Kiŋ, taŋ taŋeŋ wamu Anôtô naŋ, sêjam gôliŋ lau jagêdêŋ ma têtap kôm ŋanô ŋajam sa. Mago êsêac, taŋ sêjam sakiŋ gwam to sêbuc dêmôêŋ Anôtô naŋ, nêŋ gôliŋ gêôc sec sa. Kiŋ samob, taŋ sêjam gôliŋ gamêŋ gêmu kêpiŋa naŋ, seso Anôtônê jatu. Gamêŋ Juda ŋakiŋ ŋagêdô sêsô Anôtônê ŋagôliŋ ŋalabu, ŋagêdô sêkac tauŋ su aŋga Anôtônê.
Lau ŋatêkwa toŋ teŋ nêŋ miŋ kêsêp buku tau amboac tonaŋgeŋ. Êsêac têtu Apômtaunê jaeŋwaga. Aêac tasam êsêac gebe Propete. Êsêac sêkêŋ puc gêdêŋ lau samob ma sêjac jao sakiŋ gwamŋa to taŋeŋpêc. Êsêacnêŋ ŋac towae teŋ Elia. Ênê miŋ towae kêsêp môkêlatu 18. Eŋ to Balnê dabuŋwaga aweŋsuŋ gêôc ka tauŋ aŋga lôc Karmel gebe Anôtô ondoc ŋanô.