Apu Nabucodonosor orojai shuar najanatarma tusa timau asar najanawar emematu jakmau
3
Apu Nabucodonosor chichaak: Ashi shuar aina emematiartin yakinti treinta metros, tura wagkanti tres metros orojai najanatarma, tusa tinaiti. Timau asar nain Dura tutai pakarin orojai najanawar awajsaruiti. 2 Turawarmatai nuna emematiarti tusa nugka shikapchinam apu inamin ainan, suntara apuri ainan, apun chicharin ainan, kuitan iin ainan, apu chichaman epegkin ainan, tura chikich apu ainancha apu Nabucodonosor ashi ipamawaiti. 3 Turamu asar ashi apu aina kaunkaruiti, tumawar najanamun jiistamruinak emematiartasa ashi iruuntraruiti. 4 Tumawarmatai chichaktin etegkamu senchi chichaak: Apu chiki chikichik chichamtin ainata ashi antuktarma. 5 Trompeta, flauta umpuamu, tura cítara, líra, salterio, gaita, nu aina awateamu antakrumka, tikishmarum pujusrum, apu Nabucodonosor najanatarma takai orojai najanamua ju ememattarma. 6 Antsu shuar nuna emematchauka: “Jukir pan najantai kea a nui egkeam atatui”, tusa tinaiti.7 Timau asar trompeta, tura flauta umpuamun, cítara, líra, salterio, gaita, nu aina awatainamun antukar, tikishmarar orojai najanamun ememataina. 8 Turasha israelita aina nuiya ujumak shuar emematcharu, tumainakai Babilonianmaya shuar aina, apu ujakmi tusa shiakaruiti. 9 Tuma jeawar apu Nabucodonosoran chicharainak:
“¡Apu ameka nukap uwí iwáku pujutnaitme! ¡Tura amina naaram pachisar tuke chichatai atinaiti! 10 Apu ame chichakum trompeta tura flauta umpuamu, tura cítara, líra, salterio, gaita, nu aina awateamu antakrumka tikishmarum orojai najanamu ememattarma”, tusam tinaitme. 11 Tura nuna nuniachuka pan inartai kea a nui jukirum egkeatarma tusam tukartinaitme. 12 Turasha Sadrac, Mesac tura Abed-nego wijai takakmasarti tusam apujsaruitam nuka ame timaunka umitsuk orojai najanamuncha emematainatsui, tusa apun ujakaruiti. 13 Turam apu senchi kajek chichaak: “Jukirum jui itaatarma”, tusa tinaiti. Takai tres shuar ainan jukiar apu pujamunam ejéniaruiti. 14 Turawarmatai tres natsa ainan apu chicharuk: “Wina yuusur aina, tura wii najanatarma takai orojai najanawarua nusha atumka ememattsurme. 15 Turasha yamai nagkamsarmeka trompetan, tura flautan umpuinamu antakrumka orojai najanamu tikishmatrarum ememattarma. Nu tumachkurminka pan najantai kea a nui egkeatarma tusan titatjarme. Atumin nui egketmawarmatai yuus jiirmamainka atsawai”, tusa tinaiti.
16 Tusa takai apun chicharainak: “Apuru ju pachisrika chichamru pujucharmi. 17 Ame ji keamunam egkekratawakmincha, ii ainati ememattai Yuusa nu, ni wakerakka jakai tusa kuitamramainaitji. Tura ame iturkatjai tusamek wakeram nuisha nigki ayamturmamainaitji. 18 Tura waitat sukartachkumincha ika amina yuusrimtairam, tura orojai najanamua nusha tikishmatrar emematmi tusarka enentaimtsuji”, tusar tuina.
Tres natsa ainan jinum egkeamu
19 Tuinakai apu Nabucodonosor senchi kajek chichaak: “Ju natsa aina egkeatin pan inartai sieteya imaania ekeemaktarma”, tusa tinaiti. Timau asar turusag umikarmatai: 20 Sadracan, Mesackan tura Abed-negon nu ainan achik jigkar jinum egkeatnun, suntar kakaram ainan iis etegkawaiti. 21 Turamu asar tres natsa ainan jaanch pegker nugkuarmautak jigkarar ji keamunam egkeawaruiti. 22 Apu inaram tres shuaran achik suntar aina jinum juinan ji shir senchi keak nimparu asamtai suntar aina asawar jakaruiti. 23 Turasha tres natsa ainaka ji keamunam egkeamsha asatsuk jigkarmautak jinum egketaina.
24 Tumaina asarmatai apu Nabucodonosor enentai jearchauwaiti. Tuma chicharkartin aina nuna jeari chicharuk:
“Tres shuarapi jinum achika egkeamjia”, tusa tinaiti.
Takai nita aimainak: “Ee tres shuar egkeamji”, tusar tuina.
25 Tusa tuinakai apu chichaak: Turasha yajaimakea cuatro shuarsha jasa, nu ainaka atimawar ji keamunam ajapeen yujainawai. Antsu chikichka nayaimpinmaya shuara numamtinaiti, tusa tinaiti. 26 Nuna tusa Sadracan, Mesackan tura Abed-negon nu ainan pan inartai waitirin wajas untsuak:
“Yuus ashi nagkakartakua nuna umirin ainata jiinkirum, jui tataarma”, tusa tinaiti.
Takai tres shuar jinum chumpiruka imanisag jiintraruiti. 27 Tumawarmatai ashi apu aina nui matsataina iisartasa jeantaruiti. Turasha iyashi aina, wichi aina, tura jaanchri ainasha pegkesha asacharu asar mejenachu.
28 Tumawaru asarmatai Nabucodonosor senchi chichaak: “Sadracan, Mesackan, Abed-negon nu ainan Yuusriya nu nitan uwemtikrattsa nayaimpinmaya shuaran akupak uwemtikra nuka eme anentsa iiyaku tuke ememattai atin atii. Nitaka nina chichamen metek umirainak wii chicham timauncha umikcharai. Tumaina asar yuusrimtai aina nuka ememattsuk ika jakattsa wakeraji tusar tiarmayi. 29 Yáki ju tres natsa aina juna Yuusrin pachis pegkerchau chicharkat nuka mantamnattawai. Tura jeesha yumpunnartatui. Nunaka juiya akaisha, chikich nugkanmaya akaisha pegkesha tsagkurashtatjai”, tusa tinaiti. 30 Nuna tusa tres natsa ainan, Babilonianmaya shuar ainan apuri amajsaruiti.