David akatmamku chichakmau
23
Davidka, Isaí uchiri ajakuiti.Yuus ninka eme anentsa iitai amajsauwaiti.
Yuus, Jacob umirujakmauwa nu, ninka apu amajsauwaiti.
Israelnumia chikichik shuar shir kantamin asa, wakerutai ajakua nu,
inagnak kantamuk:
2 “Yuusa Wakaniya nu, winaka chichamtikrawai.
Nu chichamtikrakai wika chichajai”.
3 Yuus Israel emematujakmauwa nu chichakmayi.
Yuus Israelan ayamrujakua nu, wina chichartak:
“Apu shuar ainan pegkernum inauka, tura apu Yuusan umirnuka,
4 etsa káshikmas pegker etsanna numamtuk,
shuar ainan pegkernum yaigtatui”.
Yumi yutuk nupa ainan shir tsapamtikna numamtin atatui.
5 Yuus wijai chichaman umikuiti,
tura nuka atakea nuisha tuke atinaiti.
Tuma asamtai wina pataar ainaka sapijmatsuk shir pujusartatui,
wii wakeramunka Yuus ashi umirtuktatui.
6 Turasha shuar tunau takatan inaitan nakitin aina nuka,
pegkerchau asar jagki achimainchauwa numamtin ainawai.
7 Nitaka nagkijai, jagki yaruakar
ji keamunam utsaam esak megkaina numamtin ainawai.