Ahitofel tura Husai Absalónkan chicharkamu
17
Ahitofel chikich tsawantin Absalónkan chicharuk: “Suntar ainan doce mil etegkan yaruakan, ju káshia juik Davidtan patatuktajai. 2 Tuman pimpiki kakaarchamnau jas pujaun jearan, ashi shuar nijai yujainanka awakkan etsekearan ishimkun ima apunak maatjai. 3 (Ameka chikichka maatsuk ima nigki maattsam wakera iiyajme.) Nuna turan ashi shuar ainanka amini ikankatjai. Shuar aina waketar amini kaunkarka, nita agkan shir pujusartatui”, tusa tinaiti.4 Nuna tusa takai Absalónsha, tura apu ainasha pegkeraiti, tusa tiaruiti. 5 Turasha Absalón shuar ainan Husai arquita shuara nu untsuktarma, nisha ni enentaimmaun titii, tusa tinaiti.
6 Tusa takai Husain jukiar Absalón pujamunam ejéniaru ainawai. Turawarmatai Absalón chicharuk: “Ahitofel turumainaiti tusa ta nusha, ¿amesha wari tame turumainkait?” tusa tinaiti.
7 Tusa takai Husai Absalónkan chicharuk: “Ahitofel turattsa wakera nuka pegkerchauwaiti”. 8 Ameka amina apa tura nina suntaari ainasha maanitan yacha aina nuka shir nekame. Tura nigka chai nina uchiri achika jurukmau asa kajemaina numamtuk kajek pujawai. Nuiyasha amina apaka maanitan yacha asa, nina suntaari ainancha káshisha kanarmi tusagka tichattawai. 9 Nigka yamaiya juik chikichik wanam tumachkusha ummain amaunam umak pujumainaiti. Maaniamunam amina suntaarum aina yama nagkamchak mantamnawarmataigka, Davidtan suntaari aina Absalónkan suntaari ainan nepetkarai tusar tiartatui. 10 Nu tusa tuinamun amina suntaarum maanitan yacha, uun yawa kajena iman ainasha nuna antukar senchi ashamkartatui. Ashi ii ainatika amina apa maanitan yacha nu, tura nina suntaari ainasha maanitan yacha aina nu nekainaji. 11 Tuma asamtai, ii shuar aina yaikim nekapmamainchauwa imanua nu Dannum nagkamam Beersebanam irumrata. Nu turam tu maaniktarma tusam titin asam ame emkata. 12 Amina apa, tura nina suntaari ainajaimak tuig pujau wainkataj nuig maanikmi. Sana nugkanam kakena numamtuk, amina apasha tura nina suntaari ainasha chikichkiksha ujutsuk ashi ijinami. 13 David chikichik yaaktanmagsha umkamtaigka, ashi israelita ainati yarag aina jukir werir, yaakta tanishri jigkaar japikir entsanam utsa ejekkami. Turamu asa nu yaaktanmagka chikichik kayaksha juakchattawai, tusa tinaiti.
14 Tusa takai Absalón, tura ashi shuar aina Ahitofel turami tusa timaun nagkas pegkeran Husai tawai tusar tiaruiti. Ahitofel pegker timaun umikcharua nunaka Absalónkan tu maawarti tusa Yuus wakera asa turawaiti.
15 Husai, sacerdote Sadocan, tura Abiatarjai chicharuk: “Absalónka tura ina apuri ainajai nu turami”, tusa tiyi. Turasha nuka turutsuk nekas juni turami tusan takun ni turattsa enentaimmaunka yapajtuajai. 16 Tuma asamtai David wári werirum ujakrum: “Aya nugkanmak wesa jinta kanutsuk, entsa Jordán amain katigti. Nuna umiachkugka, nincha tura shuar aina nijai yujainajaimak ashi ijinawartatui”, tusa tinaiti.
17 Sacerdote uchiri Jonatán tura Ahimaas entsa Roguel tutainam nui pujuina. Nunaka yaaktanam wayar jiniarin waitmakaraij tusa tumaina. Tumaina asarmatai Absalónka chichamen antuk chikichik nuwa nitan ujakuiti. Turam nita apu Davidtan ujakartasa wearuiti. 18 Turasha Jonatán Ahimaasjai tumamun chikichik uchi nekawaiti. Tuma nuna pachis Absalónkan ujaktasa werinaiti. Nuna tumamtai Jonatán Ahimaasjai wári Bahurimnum chikichik shuara jeen wearuiti.
Tuma jeawaruiti, tumawar chikichik yumirmatai taimu amaunam nui umkaru ainawai. 19 Nuna tumawarmatai nu shuara nuwe yumirmatai nukutaijai nukukuiti. Tura nuna ukurin trigo ainan matsasuiti. 20 Tura pujai Absalón akupkamu aina nui taawaruiti. Tumawar nuwan chicharainak: “¿Jonatán tura Ahimaascha tui pujuina?” tusa tinaiti.
Tusa takai entsa amain katigkarmayi, tusa tinaiti.
Tusa takai weriar eakar wainkachar ataksha Jerusalénnum waketkiaruiti. 21 Absalón akupkamu aina waketkiaruiti. Tumawarmatai yumirmatainam umkar pujuina jiinkiaruiti. Tumawar wear, Davidtan jeariar ujainak: “Ahitofel Davidka tu maata tusa Absalónkan tiyi. Tura asamtai juigka pujutsuk, wári entsa Jordán amain katigta”. 22 Tusa timatai nu káshia nuig David tura shuar nijai yujainajaimak entsa Jordán amain katigkaru ainawai. Kashin tsawara iismasha chikichik shuarkesha entsa Jordán amain katigchauka atsau. 23 Turasha Ahitofel timaun Absalón umiriachu. Turamu asa, burronam ekemak nina jeen yaakat Guilónam waketkinaiti. Tuma nina jeen jeawaiti. Tuma nina patai ainan winau ainaka wii jakamtaisha atum kuitamkatarma tusa ashi chichas umik, suwenam jigkama jakauwaiti. Tumamtai nina apari ikusmaunam nuig ikusaru ainawai.
Absalón Davidtan patatukmau
24 David yaakat Mahanaimnum jeawaiti. Tuma ai Absalón ashi israelita aina nijai yujainajaimak patatuk entsa Jordán amain katitkauwaiti. 25 Joab apu amainnum Absalón Amasán nina suntaari apuri amajsauwaiti. Amasáka Joabpan kana yachi ajakuiti. Itra naartin ismaelita shuar Abigailan nuatkauwaiti. Abigailka Sarvia kai ajakuiti. Tura aparigka Nahas ajakuiti. Seruíaka Joabpa nukuri ajakuiti. 26 Tuma Absalón shuar nijai yujainajaimak wea weakua Galaad nugkanam jeawar nui matsamsaruiti. 27 Nuna tumainai Davidka nina suntaari ainajaimak yaakat Mahanaim jeawar pujuina. Tumainakai tres shuar aina nita pujamunam tawaruiti. Nahasa uchiri Sobí naartin, nuka yaakat Rabánmaya, Amón shuar ajakuiti. Chikichka Maquir naartin, Amielan uchiri yaakat Lodebarnumia ajakuiti. Tura chikichka Barzilaí, galaadita shuar yaakat Rogelimnumia ajakuiti. 28 Tumawar Davidtan tura shuar nijai yujainajaimak nita kanartinan peak ainan, taza ainan ichigkan ainan susaruiti. Nuiyasha trigo ainan, cebada ainan, harina ainan, araka jigkai unuekmau ainan, haba ainan, lenteja ainan, 29 miel ainan, mantequilla ainan, oveja muntsuri tura vaca muntsuri queso najankamu ainancha, Davidtan susaru ainawai. Nunaka shuar nijai yujainajaimak aya nugkanmag yujai yujainakua pimpikiar, senchi tsukarar tura kitarar tachariash tu enentaimsar turawaru ainawai.