14
1-20 (-)Apu David nina uchiri Absalónkan tsagkuramu
Absalónka David chikich nuwanam akiamu ajakuiti. Nu nina yachin maa tsekegki Caishur nugkanam yaakat Tecoanam jeaa nui uumak pujusuiti.
21 Chikich tsawantin apu David Joabpan chicharuk: “Ame turutu asaakmin yamaika wina uchir Absalón waketki taati tusan wakerukjai. Tuma asamtai ame wetá, tumam chicharkum amina apa waketki taati tusa turammayi tusam titá”, tusa tinaiti.
22 Tusa takai Joab apu Davidtan eme anentas iiyak nugkan antiastatuk tsuntsumaa pegkernum chicharuk: “Wii amina inatairam aig, wii tamau anturtuku asaakmin maaketi tusan tajame”, tusa tinaiti.
23 Nuna takai Absalónkan yaakat Jerusalénnum juki itattsa Joab yaakat Gesurnum wuwaiti. Tuma yaakat Gesurnum jeaa Absalónkan juki Jerusalénnum itawaiti. 24 Turasha wii pujamunmagka pegkesha tatsuk nina jeen we pujusti, tusa apu David tinaiti.
Tusa tinu asamtai, Absalón apunam jeatsuk nina jeen wuwaiti.
25 Ashi Israel shuar ainanam chikichkiksha Absalón pegkeri asamtai wakerusa iitai ajakua imauka atsujakuiti. 26 Wichi tsakarmatai kijin nekapeak chikichik uwítin chikichkia awamajakuiti. Absalón awamarmatai wichi nenaa iisam dos kilon nagkasag ajakuiti.
27 Absalónkan uchiri aishmag ainaka tres arujakuiti, tura chikichik nuwa arujakuiti. Nuna naarigka Tamar nuka shiram ajakuiti.
28 Absalón Jerusalénnum pujus apari David pujamunam wetsuk jimar uwí ejénaiti. 29 Tuma asa wina apar pujamunam jeaa wina pachitas chichasti tusa akupkattsa Joabpan untsukuiti. Turamsha Joab werichuiti. Tumamtai ataksha chichaman akuptukuiti, turamsha werichuiti.
30 Nuna tumamtai Absalón nina inatairi ainan chicharuk: “Joabpan ajari cebadaa aina arakmau wina ajarui ayaamas a nu, werirum ji apujtuarum ekemaktarma”, tusa tinaiti.
Tusa takai Absalónkan inatairi aina wear Joabpan ajariin jin apujtuawar ekematkaru ainawai. 31 Nuna turamun Joab nekaa Absalónkan jeen wuwaiti. Tuma jeaa iniak: “¿Urukamtai amina inatairam ainasha wina ajarnasha ekemakara?” tusa tinaiti.
32 Tusa takai Absalón ayak: “Yaakat Gesurnum pujumain aisha juisha urukamtaig iirtan nakitayatcha itarama nuna pachis wina aparjai chichasti tusan wina inatairun akuptukmajme. Yamai aparun wainkattsan wakerajai. Wii makumakun mantamnamainan takasu akaigka mantuati”, tusa tinaiti.
33 Tusa timatai Joab, apu David pujamunam wuwaiti. Tuma jeaa Absalón timaun pachis ashi ujakuiti. Turam apu nina inatairin Absalón utita tusa akupkauwaiti. Turam juki apu pujamunam itaam aparin apun eme anentas iiyak, nugkan antiastatuk tsuntsumawaiti. Turasha apu David achik kugkuasuiti.