Israelita aina amorreo ainajai maanika nepetmakmau
10
Josué yaakat Jericón tsaikua turusag yaakat Ainmaya shuar ainajai maaniak nepetak ijina yaaktarincha tsairkayi. Tura apuncha maayi. Nuiyasha yaakat Gabaónnumia shuar ainaka maanikchami tusar israelita ainajai chichaman umikaru asar, nitajai iruuntrar pujuinawai tamauncha yaakat Jerusalénnumia apu Adonesec antukuiti. 2 Tuma yaakat Gabaónka yaakat Ai tutain nagkasau, tura chikich yaakat ainan nagkasau ima uun, apurtin, tura suntaari ainasha maanitan yacha aina, tura arantsa iitai ainayat tumawaru ainawai. Nu iman ainasha tumawaru asarmatai nitan shir senchi ashamkauwaiti. 3 Tuma asa yaakat Jerusalénnumia apu Adonisédec, yaakat Hebrónnumia apu Hohaman, yaakat Jarmutnumia apu Piraman, yaakat Laquisnumia apu Jafían, tura Eglónnumia apu Debiran nu aina ujaktarma, tusa chichaman etserin ainan akuptak chichaak: 4 “Jui taatarma. Tumarum yaakat Gabaónnumia shuar ainajai maaniamu yainkatarma, nitaka Josuéjai tura israelita ainajai maanichu ami tusar chichaman umikarai”, tusa tinaiti.5 Nuna antukar yaakat Jerusalénnumia, Hebrónnumia, Jarmutnumia, Laquisnumia, tura Eglónnumia, nu amorreo ainan apuri cinco apu iruuntrar, nita suntaari ainajai yaakat Gabaónnumia shuar ainajai maaniami tusar shiakar yaaktanam jeastatuk matsamsaru ainawai. 6 Tumawarmatai wárimasar Gabaónnumia shuar aina Josué Gilgalnum pujaun chichaman etserin ainan akuptak: Ii atumjai chicham umiakur atumin inatairi ami tusa timaji. Tuma asamtai ii ainatinka amina suntarum ainajai wári taam ayamkartukta. Amorreo ainan apuri aina nain ainanam puju aina nu ijai maaniawartasa ashi iruuntrarai, tusa tinaiti. Turamun turusag ujakaru ainawai. 7 Nu tusa ujakam, Josué Gilgalnum pujau nina suntaari maanitan yacha ainan ashi yaruak wuwaiti. 8 Josué eke weachunak Yuus chicharuk: “Wii nitanka nepetkati tusan amina inaitusujme. Turamu asa amijai maaniakai ayamrumainka chikichik shuarkesha atsuttawai. Tuma asamtai sapijmatsuk wetá”, tusa tinaiti.
9 Tusa tima Josué nina suntaari ainan yaruak, káshi wea weakua cinco apu aina Gabaónnumia shuar ainajai maaniawartasa pujuinamunam pachiachmau jeawaru ainawai. 10 Yuus amorreo ainanka israelita ainan ashamkarti, tusa tinaiti. Timau asamtai Josué nina suntaari ainajai amorreo ainan Gabaónnum shir nukap ijinawaruiti. Tura ijinam chikich tsekeararu ainancha patatukar jinta Bet-horón wetainam ejéniaruiti. Tura amorreo ainanka mai mainakua yaakat Azeca, tura yaakat Maquedá tutainam ejéniaru ainawai. 11 Tura amorreo chikich aina tsekeararu ainancha Bet-horónnum jeastatuk wenan Yuus akupkamu micha kaya iman aina kakeak israelita aina nagkijai ijinawa nuna inagkas nukap ijinawaiti.
12 Yuus amorreo ainan israelita aina ijinati tusa timau asa, ijinawaiti. Nu tsawantin Josué nina suntaari ainan emtin, Yuusan aujeak: “Etsaya kintamtsuk yaakat Gabaómnumag ekeemsati. Tura nantuncha tumasag nain Aialón tutai japau aka nuig ekeemsati”, tusa tinaiti.
13 Tusa takai nina shuarin ijinati tusa etsa, tura nantusha akaatsuk ekemsauwaiti. Tuma asamtai, nita shuari ainan nepetkar ijinawaruiti. Nu ainan pachis Jaser tutainam aaruiti. Chikichik tsawan tumain etsa akaatsuk nayaimpinam jasa asauwaiti. 14 Nunaka shuar yaunchuk Yuusa auju jaku aina nuisha turachmaun tura atakea nuisha tumashtinan nu tsawantin Yuus turawaiti. Nu tsawantin Yuus nitan ayamrak maaniawaiti. 15 Tuma nepetmak Josué nina suntaari ainajai nita pujamunam Gilgalnum waketkinaiti. 16-43 (-)