17-18 Israelita ainan faraón jiirmataisha, jinta tutupin filisteo aina pujuinamunam jea nunii wearti tusagka tichauwaiti. Nunaka filisteo aina junigka nagkamakirpa tusa tama maaninak ashamainak Egipto nugkanam ataksha wakettrarai tusa, nayants kapantu tutai jeamunmani Yuus akupkauwaiti. 19 Israel shuar aina Egipto nugkanmaya jinar shimuinak Moisés José ukunchi ainan jukinaiti. Moisés turawa nunaka José eke jatsuk pujus nina patai ainan chicharuk: Egipto nugkanam pujarum nunaka Yuus jiirmar Canaán nugkanam juramkitin ainarme. Wii tajarum nu uminkaigka wina ukunchur ainasha Canaán nugkanam jukitin ataarma, tusa timau asar nuna umiak turawaiti. 20 Israelita aina nugka Sucot tutainum pujuina jiintrar we wenakua aya nugkanmag jeastatuk nugka Etam tutainam jeawar nui kanararuiti. 21-22 Tsawaika nita wetinnumani yuragmia numamtinan Yuus emtik umau. Antsu káshika nita wetinnumani ji kea numamtinan Yuus emtik umau. Tuma asamtai israelita ainaka tsawai, tura káshisha nuna iisar wena.