8
Yuus Moisésan chicharuk: Faraón jearim chicharkum, wii etegkamu ainan jiir akupkati, turam aya nugkanmag jeawar wina emematriarti. 2 Antsu wii etegkamu ainan jiir akuptan nakitakaigka, mukun ainan ashi Egipto nugkanam ishitkan waitkastatjai. 3 Mukun aina Nilo entsanmaya jinar jea ame pujusa inamtairmin, kanutairmin, peakrumincha, amijai takau aina nuna jencha, ashi egiptonmaya aina nuna jencha, pan inartainmasha tura pan najanattsa namutainmasha ashi wayawartatui. 4 Imanina asar amincha, tura amijai takau aina nuna tura egiptonmaya ainajaimak mukun ainaka pemruinak waitkarmasartatui tusa Yuus tawai tusam ujakta turutin asamtai ujajme, tusa tinaiti.5 Tusa ujamsha faraónka enentaimkachu jasu asa, nekaspapi tawa tichauwaiti. Tumamtai Moisés Aarónkan chicharuk: Mukun aina jiintrar Egipto nugkan enetkati tusam ushukrutai entsa ainanmani inakmasta, tusa tinaiti. 6 Tama Aarón ushukrutain entsa ainanmani inakmasuiti. Turamtai mukun aina entsa ainanmaya jiintrar Egipto nugkan enetkauwaiti. 7 Nuna turawarmataisha egiptonmaya iwishin aina nitasha turusag mukun ainan ikaankaruiti. Turasha mukun ainan emegkartajkama tujinkaruiti. 8 Turawarmatai faraón Moisés Aarónjai utitarma tusa shuaran akuptukuiti. Turam itawarmatai faraón Moisésan Aarónjai chicharuk: Mukun ainan ijinati tusarum, wina pachittsarum, tura wii shuar ainasha pachisrum Yuus aujasatarma. Turawakrumin Yuusan eme anentas iiyainak tagku ainan maa epeawarti, tusan atum weantu ainan akupkartatjai, tusa tinaiti.
9 Tama Moisés faraónkan chicharuk: “Amina, tura amijai takau aina nuna, tura ashi egiptonmaya ainajaimak mukun aina pemturmainak waitkarmainakai entsanam shiak megkarati Yuus aujsata tusam, urutiak turuttam nui Yuusan aujtustatjame”, tusa tinaiti. 10 Takai faraón chichaak: Nuka kashin turata, tusa tinaiti. Tusa takai Moisés ayak: Ame tame nuka tumasag uminkati, tumamtai chikich Yuus israelita ainati umirtairiya imau atsa nu nekattame, tusa tinaiti. 11 Mukun aina amina, amijai takau ainan tura egiptonmaya ainajaimak pemturmainak waitkarmaina nuka shiak entsanam utsanattawai. Tumawarka atak awenagka amina, amijai takau ainan tura egiptonmaya ainajaimak waitkarmaschattarme, tusa tinaiti.
12 Nuna tusa ukuinak faraón pujamunmaya aa jiinkiaruiti, tumawar Moisés faraónkan, nijai takau ainan tura ashi egiptonmaya ainan pachis mukun waitkaina nu emegkarta tusa Yuusan aujsauwaiti. 13 Turam Yuus Moisés timaun metek umiruk, mukun aina jeanam irunun, aa irunun tura aja ainanam irununcha ashi jinaawaiti. 14 Tumawarmatai shuar aina juukar irumkaruiti, turamu asar kaukar Egipto nugkanmagka ashi mejegkuiti. 15 Turasha faraón ni waitamun agkanma, Yuus tumattawai timaunka tumasag enentaimkachu jasuiti, tuma asa Moisésan Aarónjai umirkachuiti.
Egiptonmaya ainan temajai waitkasmau
16 Tumamtai Yuus Moisésan chicharuk: Tema najanakar Egipto nugkan ashi enetkati, ushukrutaijai nugka juyujuyuntu awatta tusam Aarón titá, tusa tinaiti.
17 Tusa timau asa Moisés Aarónkan chicharuk: Ushukrutaijai nugka juyujuyuntu awatta, tusa tinaiti. Takai nugka juyujuyuntun awatnaiti. Turamtai Egipto nugkanam nugka juyujuyuntu irunuka tema ashi najaanakuiti. Tumawar shuar ainan, tura tagku ainancha waitkaina. 18 Turasha iwishin ainaka teman najankataj tukama tujinkaruiti. Tura tema ainaka shuar ainan tura tagku ainancha shir senchi waitkaina. 19 Iwishin aina faraónkan chicharainak: Ju waittanka Yuus akupkayi, tusar tiaruiti. Tuinakaisha Yuus tumattawai timaunka tumasag, faraónka enentaimkachu jasuiti.
Egiptonmaya ainan anchi ishitka waitkasmau
20 Tumamtai Yuus Moisésan chicharuk: Kashin káshikmas faraón Nilo entsanam wetatui, tumatin asamtai amesha káshikmasam nantakim jearim chicharkum: Yuus chichartamuk, wii etegkamu ainan jiir akupkati, turawaram wina emematriarti tusa turammayi. 21 Antsu akupeachkuminka anchi ainan amini, shuar amijai takau aina nui, egiptonmaya aina nui tura ashi Egipto nugkanmagka ishiaktatjai, turamu asa ashi jeanam piaktatui, tusa Yuus turamui tusam ujakta timau asa, faraónkan ujakuiti. Turamsha umikchauwaiti. 22 Turasha Egipto nugkanam tumakaisha Gosén nugkanam wii etegkamur aina pujuina nunaka chikichik anchigsha nitanka pegkesha waitkaschartatui. 23 Nuna wii turakai tukit winau aina tura tukit aminu aina nu kashi nekattame, tusa tinaiti.
24 Nuna tinu asa faraón pujusa inamtainam, nijai takau ainan jeencha tura ashi Egipto nugkanam anchi ainan Yuus ishitkauwaiti. Turamu asa egiptonmaya ainan anchi aina senchi waitkaina. 25 Turuinamu asa Moisés Aarónjai untsukrum utitarma tusa faraón shuaran akuptukuiti. Turam untsuk itamtai faraón nitan chicharuk: Wetaarma, tumarum atum pujarum nuig tagku maarum atumin Yuusri eme anentsa iiyakrum epeatarma, tusa tinaiti.
26 Takai Moisés chichaak: Amee shuar ainaka tagkun yuusrimawar eme anentas iiyainak emematin ainawai. Tumau asar, ii umirtai Yuus eme anentsa iiyakur tagku aina maa epeakrin waitmakar, kayajai tukurmiar mantammain asarmatai juigka turumaitsuji. 27 Antsu ika wea weakua tres tsawan aya nugkanmag jeattaji. Tuma nui jeawakrin Yuus ii umirtai turatarma tusa turamkai, turusrik ni eme anentsa iiyakur tagku aina maa epeattaji, tusa tinaiti.
28 Takai faraón Moisésan chicharuk: Takurmeka werum atum umirtai Yuus eme anentsa iiyakrum tagku aina maa epeatarma. Turakrum wina pachittsarmesha aujtursatarma. Turasha shir jeashtaka weerpa, tusa tinaiti. 29 Takai Moisés faraónkan chicharuk: Israelita ainati aya nugkanmag shiakar Yuus eme anentsa iiyakur tagku aina maa epeattsa wakeraj nu, turatarma tusam titin akuminka, wii juiya jinkin kashinia nui anchi aina amina tura amijai takau ainan tura ashi egiptonmaya ainan waitkaina nu emegkarta tusan Yuusan aujtustatjame, tusa tinaiti.
30 Nuna tusa Moisés faraón pujamunmaya jiinkinaiti, tuma Yuusan aujsauwaiti. 31 Turam Yuus Moisés timaun turusag umiak faraónkan, shuar nijai takau ainan tura ashi egiptonmaya ainan anchi waitkainan emegkaruiti. 32 Turasha faraónka enentaimkachu ataksha jasuiti, tuma asa israelita ainan jiintrarum wetarum, tusa tichauwaiti.