—Cʉ̃ caro, wahiquinare yʉhʉre ti jʉ̃ wa mʉohti carore dahrebasajaro yʉhʉre. Tí caro cjihtore yoaa, acacia yucʉ pjĩni mehne susuri caro dahrejaro. Tí carore pʉa metro veinticinco centímetro yoari caro dahrejaro. Tuhsʉ, to yoaro purota sari caro cʉ̃hʉ dahrejaro. To mʉano sehere cʉ̃ metro veinticinco centímetro mʉari caro dahrejaro.

2 ‘Ã yoa tí caro puhacari bui tíro sehere pja sahwiri acáciacʉ sahwiri tiri caro yoajaro. Tí sahwirire yoaa, dohoro marieno dóipʉta tí caropʉta jia sahwiri yoajaro. Tí carore yoa tuhsʉ, comaa bronce mehne pja cahsari dahre, jiri caro purore duhu õ sitoajaro. Ã yoa tí caro puhicha sehe cʉ̃hʉre duhu õjaro.

4 ‘Comaa bronce mehne pari tene, wahiquinare jʉ̃ wa mʉoa taa, ti payohti tene cjihto dahrejaro. Tí tene puhacaripere pititia sorori, comaa bronce sorori õjaro. 5 Tuhsʉ, tí tenere tí caro susuri caro ji dijaro dacho macai, tí sororipʉ duhu yojaro jʉna —ni yahu namoha Yawe Moisere.