Wachakalpijax carta, Juan lelpox
Amxot jʉm-aechpox diachwʉajnakolaxpox, nejxasiyaxbej
1
Xan,
anciano,
lelx ampacarta xamal Dios naexasitampimliajwa,
xamal Dios makanotpimliajwa.
Diachwʉajnakolax xamal xabich nejxasinkax.
Xan kaenan xamal nejxasinka-enil.
Puexa asew jiw chiekal matabijapi diachwʉajnakolaxpox,
japi jiwbej xamal nejxasink.
2 Xamal nejxasinkax,
xatis puexa naexasich xot diachwʉajnakolaxpox Diosliajwa.
Amwʉtjel japox naexasisfʉlas.
Japox naexasisfʉlaxaes pomatkoicha.
3 Xan kawʉajnax waj-ax Dios,
paxʉlan Jesucristobej,
japi xamal xabich kajachawaesliajwa,
beltaeliajwabejpi,
chiekal duilaliajwambej,
asew jiw sʉapich.
Xan waj-ax Dios kawʉajnax,
Jesucristobej,
diachwʉajnakolax xamal nejxasinkam xot Dios.
4 Xan xabich nejchachaemlax,
taenx wʉt asew jiw xamalxot kofa-elpox naexasisfʉlpox Jesús pejwʉajan.
Japi jiw chiekal duilafʉl,
me-ama waj-ax Dios naktatoꞌal duilafʉlaliajwas,
asew jiw naekichachajba-elaxtat.
5 Takoew,
xamal nejxasinkaxpim,
toꞌax nakaewa nanejxasinkaliajwas.
Japatatoꞌlax jela-el.
Japatatoꞌlax chajiakolaxtat xatis jʉmtaens wʉt,
naexasisfʉlas.
6 Dios tatoꞌalpox naexasisfʉlas wʉt,
asew jiw chiekal nakmatabija xatis Dios nejxasinkaspox.
Dios tatoꞌalpox nakjʉm-aech:
“¡Xatis nakaewa nanejxasinkaxaespox kaematkoisfʉl!”
—nak-aechox,
tatoꞌal wʉt.
Japox xatis chajia chiekal matabijas,
akaseskolaxtat naexasisfʉlas wʉt Jesucristo pejwʉajan.
Ampathatat xabich maenkpox naekichachajbapijiw
7 Ampathatat xabich maenk naekichachajbapijiw.
Japi asew jiw naewʉajan.
Japi naexasis-el Jesucristo,
Dios paxʉlan paskpon atontat ampathatat.
Jasox nejchaxoelpi,
japilap jiw naekichachajbapijiw.
Japibej Jesús padaelmajiw.
8 ¡Xamal kaenanʉla najut chiekal natataeflafʉlde napelsasamata nabistampoxanliajwa,
Dios chaxdusaxaelpox chiekal puexa kifisliajwam!
9 Xamal naexasisfʉlam wʉt Jesucristo naewʉajanpox,
ja-am wʉt,
waj-ax Dios,
japon paxʉlan Jesucristobej,
xamal kajachawaesfʉlaxael.
Pe asax naexasisfʉlam wʉtlax,
ja-am wʉt,
Dios xamal kajachawaesfʉlaxil.
10 Nejmachjiw pat wʉt xamalxot naewʉajnaliajwa asawʉajan,
japi jiw naexasis-el wʉt Jesús naewʉajanpox,
¡japi toꞌim asalel!
¡Nabej tapaeꞌ nejba leliajwa asawʉajan xamal naewʉajnaliajwapi!
¡Moi!
—¡nabej aecheꞌbej japi jiw!
11 Japi jiw bʉꞌkʉlaxaelam wʉt,
tapaeyaxaelam wʉtbej nejba leliajwa,
ja-am wʉt,
japi pejnaewʉajnax,
babijaxpox,
xamal,
me-ama kajachawaesaxaelam.
Amxot Juan kitoesaxaelpox lelpox
12 Xan xabich wʉajan xamal naewʉajnaliajwan.
Pe xanliajwa chiekal nawepachaema-el japoxan lelaliajwan cartatat.
Xanlax tajut chiekal nospaesian,
xamal sʉapich.
Samata,
asamatkoi xamalxot patx wʉt,
nospaeyaxaes kaeyaxtat,
chiekal nejchachaemlaliajwas.
13 Amxot duili,
naexasiti Jesús pejwʉajan,
Dios makanochpi,
japibej saludos xatoꞌa xamalliajwa.