Naewʉajnaxan paklochowliajwa, Jesús pejwʉajan naexasiti
5
Ma amwʉt naewʉajnaxaelen nejpaklochow,
japi nej-ancianos.
Japi ancianos tataeflafʉl kaenanʉla xamal,
Jesús pejwʉajan naexasitampim.
Xanbej ancianowan.
Me-ama japi,
ja-anbej xan.
Xan taenx,
Cristo nabijat wʉt,
tʉp wʉton cruztat.
Asamatkoi,
Cristo pejme pask wʉt tatoꞌlaliajwa,
jawʉt xanbej naktatoꞌlaxaelen,
ancianos sʉapich.
2 Xamal ancianos,
¡chiekal tataefʉlde naexasiti Jesús pejwʉajan!
Japi jiw,
me-ama oveja,
ja-aech.
Dios xamal toꞌa japi jiw chiekal tataeflaliajwam.
Samata,
¡chiekal tataefʉlde!
Me-ama Dios nejxasink tataeflaliajwam,
¡ja-amsfʉlde!
Nejchaxoelam wʉt,
¡nabej nejchaxoeleꞌ:
“Xan nejwesla japi jiw tataeflaliajwan.
Pe nakiowa,
tataeflax,
Dios natoꞌa xot” —nabej aecheꞌ,
nejchaxoelam wʉt!
¡Nabej nejchaxoeleꞌbej:
“Namot wʉt,
chiekal tataeflaxaelen” —nabej aecheꞌ,
nejchaxoelam wʉt!
3 Xamal Dios toꞌa japi jiw chiekal tataeflaliajwam.
Tatoꞌlam wʉt,
¡chiekal tatoꞌalde!
Me-ama asew paklochow,
jiw tatoꞌal wʉt,
tatoꞌali,
me-ama pej-esclavos wʉt,
ja-aechi pejjiwliajwa.
¡Xamallax nabej ja-aecheꞌ jasox!
¡Jesús pejwʉajan naexasiti,
japi jiw chiekal tatoꞌalde,
japi jiw xamal nakxataeliajwa!
4 Cristo wajpaklokolan,
japon naktatoꞌal puexa japon pejwʉajan naexasichpis.
Samata,
pask wʉton,
japon xamal kaenanʉla chaxduiyaxael corona,
xabich pachaempox.
Japox pomatkoichaliajwa.
Toepaxilpox.
5 Ma amwʉt naewʉajnaxaelenbej,
xamal pansiachwam.
Ancianos xamal tatoꞌal wʉt,
¡chiekal naexasiꞌe!
Kaenanʉla nakaewa nakajachawaetam wʉt,
nejchaxoelam wʉtbej,
¡nejchaxoelde:
“Xan kaes pejme pachaema-enil.
Me-ama asew jiw,
pachaempi,
xan jachi-enil” —amde,
nejchaxoelam wʉt!
Dios pejjamechan,
chajia lelspox,
jʉm-aech:
“Dios nejwesla jiw jʉm-aechpi:
‘Xan kaes pejme pachaeman.
Me-ama asew jiw,
pachaema-elpi,
jachi-enil’ —aechpi.
Pelax Dios kajachawaet jiw jʉm-aechpi:
‘Xan kaes pejme pachaema-enil.
Me-ama asew jiw,
pachaempi,
xan jachi-enil’ —aechpi” —aechox Dios pejjamechan,
chajia lelspox.
6 Samata,
xamal,
Dios mamnikpon matabijam xot,
nejchaxoelam wʉt,
¡nejchaxoelde:
“Xan kaes pejme pachaema-enil.
Me-ama asew jiw,
pachaempi,
jachi-enil” —amde,
nejchaxoelam wʉt!
Asamatkoi,
japon xamal kajachawaet wʉt,
jiw xamal sitaeyaxael.
7 ¡Dios kawʉajande xamal weweꞌppoxan kajachawaesliajwa,
Dios xamal tataeflafʉl xot!
Samata,
xabich nejchaxoelam wʉt,
¡nejchaxoelde japoxanliajwa!
8 Xamal,
naexasitampim Jesús pejwʉajan,
¡chiekal taem!
Nuth chachoel,
jʉmbʉꞌa wʉt.
Nuth choefan jalwek xaeliajwa.
Nadaelman Satanás,
ja-aechbej,
nanʉamt wʉt tabejsliajwapon xamal,
Dios xanaboejampim.
9 Satanás xamal naekichachajbasia wʉt,
xamal naekichachajbasamata,
¡Dios chiekal xanaboejim!
Xamal matabijam,
potʉajnʉcha wajkoew,
naexasiti Jesús pejwʉajan,
xabich nabijat.
Me-ama xamal nabijatam wʉt,
ja-aech japi.
10 Xamal kaematkoiyan nabijatam wʉt,
Dios kajachawaesaxael chiekal pachaemaliajwam,
Dios kaes xanaboejaliajwambej.
Dios nejxasink xot,
nakmakanot pomatkoicha duilaliajwas Diosxotse,
xatis Jesucristo pejjiws xot.
11 Dios puexa jiw tatoꞌlaxael pomatkoicha.
¡Jasox nej ja-aecheꞌ Diosliajwa!
Pedro toesliajwa wʉt ampacarta, saludo xatoꞌapox Jesús pejwʉajan naexasitiliajwa
12 Silvano,
me-ama takoewan,
japon naexasit xot Jesús pejwʉajan.
Silvano nakajachawaet ampox carta,
cha-aelaxach,
lelaliajwan,
xamal poxade xatoꞌaliajwan.
Ampox xamal chiekal naewʉajnax Jesús pejwʉajan chiekal naexasisliajwam.
Dios xatis chiekal nakkajachawaesfʉl xot,
matabijas,
diachwʉajnakolax Dios naknejxasink.
Samata,
¡nabej kofeꞌ Dios xanaboejampox!
13 Jesús pejwʉajan naexasiti,
Babilonia paklowaxpijiw,
xatoꞌa saludos xamalliajwa.
Japi Dios makanoch pejjiwaliajwa,
me-ama xamal,
jachiliajwa.
Marcosbej,
xatoꞌa saludos xamalliajwa.
Japon Marcos,
me-ama taxʉlan wʉt,
ja-aechon.
14 ¡Xamal nakaewa chiekal nasaludam,
nakaewa chiekal nanejxasinkam xot,
Jesús pejwʉajan naexasitam xot!
Puexa xamal nejxasinkax chiekal duilaliajwam,
asew jiw sʉapich.