Pablo toꞌapox Tesalónica paklowaxpijiw Dios kawʉajnaliajwa japonliajwa
3
Takoew,
kaes lelaxaelen ampox xamalliajwa.
¡Dios kawʉajande xanalliajwa,
jiw naewʉajnax wʉt chiekal naewʉajnaliajwan!
¡Dios kawʉajandebej,
xanal jiw potʉajnʉcha naewʉajnax wʉt kamtalejen jiw chiekal naexasisliajwa Jesús pejwʉajan,
me-ama xamal kamta naexasitam,
jachiliajwabej japi jiw!
2 ¡Dios kawʉajande japon xanal natataeflaliajwa,
jiw babejchow babijaxan isasamata xanalliajwa,
puexa jiw naexasis-el xot Jesús pejwʉajan!
3 Pe nakiowa,
Dios nakkajachawaesaxael.
Dios kajachawaesaxael xamal kaes xanaboejaliajwam japon.
Dios tataeflaxaelbej xamal malechasamata,
Satanás xapaeja wʉt xamal.
4 Xanal nejchaxoelx xamalliajwa:
“Tesalónica paklowaxpijiw Dios kajachawaesaxaes.
Samata,
japi puexa isaxael xatis tatoꞌlaspoxan” —an xanal,
nejchaxoelx wʉt xamalliajwa.
5 Xanal Dios kawʉajnax xamal kajachawaesliajwapon asew jiw nejxasinkaliajwam,
me-ama Dios nejxasink xamal,
jachiliajwam xamal asew jiwliajwa.
Dios kawʉajnaxbej,
xamal nabijatam wʉt japon kajachawaesliajwa.
Me-ama Cristo nakiowa Dios naexasisfʉl,
nabijat wʉt,
¡xamalbej ja-amsfʉlde!
Jesús pejwʉajan naexasiti nabichaxaelpox pajut natataeflaliajwa
6 Takoew,
xanal lelx wʉt,
jʉm-an wajpaklon Jesucristo pijaxtat.
Aton,
naexasitpon Jesús pejwʉajan,
kiwechan wʉt nabichliajwa,
¡japon atonxot xamal nadiajim,
naexasis-el xoton xanal naewʉajnaxpox!
7 Xamal chiekal matabijam,
ma-an xanal,
xamalxot duilx wʉt.
Ja-an xanal,
xamalbej matabijaliajwan chiekal duilaliajwam.
Xamalxotan wʉt,
tajut nabistax wʉajsliajwan naweweꞌppoxan.
8 Xamalxotan wʉt,
malech naxaeyaxan wʉljoe-enil.
Wʉljowx wʉt,
xatamotx.
Naewʉajna-enil wʉt,
tajut nabistax matkoi,
madoi wʉtbej,
plata kanaliajwan,
kaen xamalxot xanal naweweꞌppoxan nawemosasamata.
9 Wajpaklon Jesús xanal natapaei xamal wʉljoeliajwan naweweꞌppoxan,
xamal naewʉajnax wʉt japon pejwʉajan.
Pe nakiowa,
wʉljoe-enil xamal.
Xanallax tajut nabistax,
xamalxotan wʉt,
xamalbej najut nabichliajwam wʉajsliajwam xamal weweꞌppoxan.
10 Xamalxotan wʉt,
jʉm-an:
“Aton kiwesla wʉt nabichliajwa,
¡japon nej xae-eleꞌ!”
—an xan.
11 Xanal wʉltaenx xamalxot asew nabich-elpox.
Pomatkoicha japi jiw asbʉan jʉmch mathʉn.
Nabichaxaelpi itsalti asbʉan jʉmch.
12 Jasi jiwliajwa wajpaklon Jesucristo xan natoꞌa jʉmchiliajwan:
“¡Japi jiw pajut nej nabich wʉajsliajwa weweꞌpaspoxan!”
—chiliajwan.
13 Takoew,
¡nabej kofeꞌ isliajwam pachaempoxan asew jiwliajwa!
14 Jiw naexasis-el wʉt xan lelxpox carta,
¡japi sʉapich,
nabej nanʉams!
Ja-am wʉt,
japi jiw pajut padalaxael.
15 ¡Pe xamal nabej nejchaxoeleꞌ japi jiwliajwa:
“Japi jiw tadaelmajiw” —nabej aecheꞌ,
nejchaxoelam wʉt!
¡Asbʉan jʉmch chiekal naewʉajande,
japi naexasit xot Jesús pejwʉajan!
Pablo amxot kitoesaxaelpox lelpox
16 Wajpaklon Jesucristo nakkajachawaet chiekal duilaliajwas.
Dios kawʉajnax xamal pomatkoicha chalaliajwapon,
kajachawaesliajwabej xamal chiekal duilaliajwam nejmachtʉajnʉchanxot.