Jesús pejwʉajan naexasiti machiyaxaelpox Dios nejchachaemlaliajwa japiliajwa
5
Dios xamal xabich nejxasink,
japon paxim xot.
Samata,
xamal isfʉlaxaelam pachaempoxan.
Me-ama Dios isfʉl pachaempoxan,
¡xamalbej ja-amsfʉlde!
2 ¡Nejxasinkafʉlde asew jiw!
Me-ama Jesucristo naknejxasink,
¡ja-amsfʉldebej xamal asew jiwliajwa!
Japon xatis naknejxasink xot,
pajut natapaeipon asajiw boesaliajwas nakwemosliajwa xatis babijaxan isaspoxanliajwa,
Dios nakbeltaeliajwa.
Samata,
Dios nejchachaemil,
Jesús tʉp wʉt xatisliajwa.
3 Xamal Dios pejjiwam xot,
¡nabej is puexa pachaema-elpoxan,
asew jiw xamal bʉꞌwʉajanpaesamata!
Samata,
nejchaxoelam wʉt,
¡nabej nejchaxoeleꞌ asew wathoꞌ bʉꞌmoejsaxan,
nijwa-elpow!
Nejchaxoelam wʉt,
¡nabej nejchaxoeleꞌbej asew jiw pejew kinosliajwam!
4 ¡Nabej jʉm-aecheꞌbej babejjamechan,
wajdalaxaelpoxan!
¡Nabej jʉm-aecheꞌbej nejliaklaxan!
Japoxan jʉm-am wʉt,
japoxan pachaemaxil.
¡Jʉm-amdelax Diosliajwa:
“Dios,
xam xabich pachaemam,
nakajachawaetam xot” —amde Diosliajwa!
5 Xamal chiekal matabijam.
Asew poejiw pijowpi,
asew wathoꞌ naebʉꞌmoejt wʉti,
japi poejiw pasaxil Jesucristoxotse,
pax sʉapich,
tatoꞌalxotse.
Asaxan pachaema-elpoxan ispibej,
japibej pasaxil jaxotse.
Asew pejew kinosasiapi,
japibej pasaxil Diosxotse,
kaes nejxasink xoti pejewkal.
Pe japi nejxasinka-el Dios.
6 ¡Nabej tapaeꞌbej asew jiw xamal naekichachajbaliajwa isliajwam Dios fiatpoxan!
Jiw,
ispi japoxan,
Dios kastikaxaesi.
7 ¡Japi ispoxan xamal nabej is!
8 Xamal majt babijaxan isfʉlam,
chiekal naexasis-emil wʉtfʉk Dios.
Samata,
majt nejnejchaxoelaxan,
me-ama itkʉaꞌnik wʉt,
ja-aech.
Amwʉtjel chiekal duilam,
Dios pejjiwam xot.
Samata,
amwʉtjel nejnejchaxoelaxan,
me-ama itliak,
naexasitam xot Jesús pejwʉajan.
9 Xatis laelpas wʉt,
chiekal laelpaxaes,
me-ama Dios nejxasink.
Isfʉlaxaesbej pachaempoxan.
Nakaewa najʉmchiyaxaesbej diachwʉajnakolaxpoxan.
10 Nejchaxoelam wʉt,
¡nejchaxoelde isliajwam Dios nejxasinkpoxan!
11 Naexasis-elpi Jesús pejwʉajan,
japi babijaxan isfʉl wʉt,
¡xamal japi nabej nakxataeꞌ japoxan isasamatam!
¡Xamallax japi jiw naewʉajande kofaliajwa babijaxan ispoxan!
12 Japi jiw maliach ispoxan,
kaen aton jʉmchiyaxael wʉt asew jiwliajwa,
japon aton xabich padalaxael japoxanliajwa.
13 Xamal naewʉajnam wʉt japi jiw Jesús pejwʉajan,
ja-am wʉt,
japi pajut matabijaxael babijaxan ispoxan.
14 Samata,
ja-aech wʉt,
japilax isaxael pachaempoxan.
Chajia lelspox jʉm-aech wʉt,
jʉm-aechox:
“Xamal babijaxan isfʉlam wʉt,
napelsaxaelam Diosliajwa.
Samata,
¡kofim babijaxan isampoxan!
Dios xamal bʉꞌweliajwa,
Cristo tʉp” —aechox.
15 Samata,
duilam wʉt,
¡chiekal taem babijaxan isasamatam!
¡Nabej duileꞌ,
me-ama Jesús pejwʉajan naexasis-eli!
¡Chiekal duilafʉlde!
Me-ama chiekal matabijapi Jesús pejwʉajan,
¡ja-amde,
xamal duilafʉlam wʉt!
16 Ja-am wʉt,
xajʉpaxaelam isliajwam pachaempoxan.
¡Japoxan isfʉlde,
xabich asew jiw babijaxan isfʉl xot!
17 Xamal,
me-ama nejliaklawam wʉt,
¡nabej ja-aecheꞌ!
¡Majt chiekal nejchaxoelde isaxaelampoxan,
isliajwam Dios nejxasinkpoxan!
18 ¡Xamal saxa nabej feꞌ babijaxan isasamatam!
¡Xamallax naexasisfʉlde Espíritu Santo tatoꞌalpoxan,
chiekal duilaliajwam,
me-ama Dios nejxasink!
19 Asew jiw sʉapich,
natamejlam wʉt,
¡jajuim Diosliajwa Dios pejjajui,
xabich nejchachaemlam xot Diosliajwa!
20 Waj-ax Dios naktaen,
kawʉajnas wʉt,
naexasich xot Jesús pejwʉajan.
Samata,
pomatkoicha Dios graciaschiyaxaes puexa japon ispoxanliajwa xatisliajwa.
Machiyaxaelpox Jesús pejwʉajan naexasiti chiekal duilaliajwa, pejbapijiw sʉapich
21 Nakaewa natatoꞌlam wʉt,
¡chiekal na-ow-amde xamalxot wʉajan ajilaliajwa!
¡Ja-amde,
xamal xabich sitaenam xot Cristo!
22 Xamal wathoꞌam,
nejmol tatoꞌal wʉt,
¡ow-amde!
¡Naexasisfʉlde,
nejmol tatoꞌal wʉt!
Me-ama wajpaklon Jesucristo tatoꞌalpox chiekal naexasisfʉlam wʉt,
¡ja-amsfʉlde xamal wathoꞌam nejmolliajwa!
23 Dios tapaei Cristo tatoꞌlaliajwa jiw naexasiti japon pejwʉajan.
Dios tapaeibej kaenanʉla poejiw tatoꞌlaliajwa pejwathoꞌ.
Jesucristo tʉp xot,
nakwemot xatis babijaxan isaspoxanliajwa Dios nakbʉꞌweliajwa.
Samata,
puexa xatis Cristo pejjiws,
naexasich xot Cristo pejwʉajan.
24 Xatis,
naexasichpis Jesús pejwʉajan,
naexasisaxaes Jesucristo tatoꞌalpox.
Wathoꞌbej kaenanʉla naexasisaxael pamal tatoꞌlaspox.
25 Xamal poejwam,
¡nejxasinkde nejwathoꞌ!
Me-ama Jesucristo xatis kaenanʉla naknejxasink,
naexasichpis japon pejwʉajan,
¡ja-amsfʉlde xamal poejwam,
nejxasinkam wʉt nejwathoꞌ!
Japon pajut natapaei asajiw boesaliajwas.
Tʉp wʉt,
nakwemoton xatis babijaxan isaspoxanliajwa.
26 Jesucristo jasoxtat nakwemot xatis babijaxan isaspoxanliajwa,
naexasichpis japon pejwʉajan matabijaliajwas,
pachaemaliajwas Diosliajwa.
Xatis nakbautisa wʉt,
japox jiw chiekal matabijaliajwa puexa xatis babijaxan isaspoxan nakwe-ajilpox Diosliajwa.
27 Jesucristo pejme athʉlelsik pask wʉt,
japon taesia puexa xatis chiekal naexasichpox japon pejwʉajan.
28 Samata,
xamal poejwam,
me-ama najut nanejxasinkam wʉt,
¡ja-amsfʉldebej kaenanʉla nejwathoꞌliajwa!
Pijow nejxasinkpon,
japon atonbej pajutliajwa chiekal nanejxasink.
29 Kaen aton pajutliajwa nanejwesla-el.
Japon aton pajutliajwa chiekal natataefʉl.
Japon chiekal xaelbej naxaeyaxan mamnikaliajwa.
Jatisbej xatis,
Cristo pejwʉajan naexasichpis.
Cristo chiekal naktataeflafʉl.
30 Puexa xatis,
Cristo pejbʉꞌt wʉt,
jatis.
Samata,
japon naktataeflafʉl.
31 Dios pejjamechan,
chajia lelspox,
jʉm-aech wʉt,
jʉm-aechox:
“Aton pawis fit wʉt,
pax,
penxot dukaxil.
Japon pejlel dukaxael,
pijow sʉapich,
japi pajut natataeflaliajwa.
Majt japi kolenje.
Japi nanot wʉt,
me-ama kaen wʉt,
ja-aechlisi” —aech Dios pejjamechan.
32 Dios pejjamechan,
chajia lelspox,
japox jʉm-aech wʉt,
xabich pachaem xatis matabijaliajwas.
Majt matabija-esal japox.
Japox jʉm-aechbej xatis amwʉtjel matabijaliajwas Cristo pejjiwspox.
Samata,
xatis Jesús pejwʉajan naexasichpis,
Diosliajwa,
Cristo sʉapich,
kaebʉꞌtas wʉt,
jatis.
33 Samata,
xamal poejwam,
¡chiekal nejxasinkafʉlde nejwathoꞌ!
Me-ama xamal najut nanejxasinkam wʉt,
¡ja-amsfʉlde!
¡Wathoꞌbej,
nej sitaeꞌ pamaljiw!