Pablo chapaeipox masoxtat taenpoxliajwa wajpaklon Jesús
12
Wajut isaspoxan asew jiw chapaeis wʉt japi jiw naksitaeliajwa,
japox pachaema-el wajutliajwa.
Pe nakiowa,
xamal chapaeyaxaelen xan masoxtat tajut taenxpox,
xamal chiekal jʉmtaeliajwam wajpaklon Jesús natulaeltpox xanxot.
Japon natulaelt xanxot chiekal tajut taeliajwan,
xan isfʉlaliajwan japon nejxasinkpoxan.
2-3 Catorce waechanlisox Dios nabʉꞌfolpox athʉ poxase,
japon duk poxase.
Xan naxtae-enil,
nabʉꞌfol wʉt Dios.
Jalape.
Matabijs-enil,
tathʉalnan nabʉꞌfol wʉt,
o,
taj-aelkal bʉꞌfol wʉt.
Kaen Dios japox chiekal matabijt.
4 Xan chiekal matabijtax Dios nabʉꞌfolpox,
japon duk poxase.
Jaxochax wʉt,
jʉmtaenx asew jiw majt jʉmtae-eljamechan.
Dios natapae-el japox asew jiw chapaeliajwan.
5 Xan tajut chapaesian wʉt,
japox chapaeyaxaelen asew jiw nasitaeliajwa,
athʉ poxase nabʉꞌfolpox.
Pe japox xan jiw chapaeyaxinil.
Xanlax chapaeyaxaelen chiekal mamnika-enilpoxan.
6 Xan xabich chapaeyaxaelen wʉt Diosxotse taenxpoxan,
me-ama na-acha-enil wʉt,
jachiyaxaelen,
diachwʉajnakolax xot japoxan.
Pe japoxan chapaeyaxinil jiw nasitaesamata.
Xan nejxasinkax jiw nasitaeliajwa Diosliajwa isxpoxanliajwa,
asew jiw naewʉajnaxpoxanliajwabej.
7 Dios natapaei pomatkoicha tajbʉꞌt nawexaenkaliajwa,
japoxtat nabijasliajwanbej.
Ja-an wʉt,
Satanás,
me-ama pokcho-etat,
na-eꞌatat,
naxʉaꞌat wʉt,
ja-aech tajbʉꞌt nawexaenkaliajwa.
Jasox ja-aech,
Dios natapaei xot xan nejchaxoelasamatan:
“Dios na-itpaei pachaempoxan xan taeliajwan japonxotse.
Samata,
xan kaes pejme pachaeman.
Me-ama asew jiw,
jachi-enil” —chisamatan,
tajut nejchaxoelx wʉt.
8 Xan tres veces wajpaklon Jesucristo kawʉajnax naboejthʉsliajwa japox waxae.
9 Pe naboejthʉs-elon.
Jawʉt Jesucristo najʉm-aech:
“Xam weweꞌp tajnejxasiyaxkal.
Xam boejthʉsaxinil puexa jiw matabijaliajwa xam chiekal mamnika-emilpox” —aech wajpaklon.
Samata,
xan chiekal nejchachaemlax,
jiw pajut matabijaxael xot.
Xan puexa chiekal isx,
Cristo nakajachawaesfʉl xot.
10 Chiekal mamnika-enil wʉt,
nakiowa nejchachaemlax.
Asew jiw jʉm-aech wʉtbej babejjamechan xanliajwa,
Jesús pejwʉajan naexasitx xot,
xan nakiowa nejchachaemlax.
Asaxan naweweꞌp wʉtbej,
xan nejchachaemlax.
Asew jiw babijaxan is wʉtbej xanliajwa,
naexasitx xot Jesús pejwʉajan,
xan nakiowa nejchachaemlax.
Pachaema-el wʉtbej nabichliajwan Cristoliajwa,
xan nakiowa nejchachaemlax.
Jiw pajut taen wʉt xan mamnika-enilpox,
ja-aech wʉt,
japi pajut chiekal matabija,
puexa xan japoxan isx Cristo pejkajachawaesaxtat.
Pablo xabich nejchaxoelpox Corinto paklowaxpijiwliajwa
11 Xan chapaeix tajut isxpoxan.
Me-ama na-achan pajut ispoxan chapaei wʉt,
xan ja-an.
Jasox chapaeix,
xamal asew jiw chiekal chapae-emil xot xan isxpoxan.
Xanlax pachaema-enil.
Pe xan kaes pachaeman.
Diachwʉajnakolax apóstoles-elpi,
xamal naewetampi,
xan jachi-enil.
12 Xamalxot dukx wʉt,
naewʉajnax pin-iamatkoiyan,
Dios natoꞌa xot.
Isxbej koechaxan.
Samata,
xamal najut chiekal matabijam,
diachwʉajnakolax xan Cristo pej-apóstolan.
13 Xan dukx wʉt xamalxot,
puexa chiekal isfʉlax xamalliajwa,
me-ama asapaklowaxanpijiw,
Jesús pejwʉajan naexasitiliajwa,
puexa chiekal isx.
Ja-an wʉt,
xan asax is-enil xamal taliasliajwan.
Xamal wʉljoe-enilbej nakajachawaesliajwam naweweꞌppoxanliajwa.
Jasox ja-an wʉt,
xamalliajwa chiekal pachaema-el wʉt,
¡xan nabeltaem!
14 Xan thiltax xamal pejme taeliajwan.
Amwʉt xamal taeyaxaelen wʉt,
japoxtat tres vecesaxael taenxpox xamal.
Pejme xamalxot paꞌax wʉt,
xamal wʉljoeyaxinil plata nakajachawaesliajwam.
Me-ama majt wʉljoe-enil plata,
pejme xan jachiyaxaelen.
Xan nejxasinka-enil nejew plata.
Nejxasinkaxlax xamal chiekal naexasisliajwam Dios.
Paxjiw chaxduw plata paxiliajwa.
Paxi plata chaxdui-el paxjiw.
Xamal,
taxi wʉt,
ja-am xanliajwa.
Samata,
plata xamal wʉljoe-enil nachaxduiliajwam.
15 Xan nejchaxoelx xamalliajwa:
“Corinto paklowaxpijiw weweꞌpas wʉt kajachawaesax,
puexa xan tejew toesaxaelen japi kajachawaesliajwan.
Xan xajʉpx wʉt,
puexa isaxaelenbej japi kajachawaesliajwan” —an,
nejchaxoelx wʉt xamalliajwa.
Xamal kaes nejxasinkax wʉt,
xamallax xan nanejxasinkampox toepafʉl.
16 Xamalxotx wʉt,
xan asaxan naweweꞌp wʉt,
xamal wʉljoe-enil.
Pe nakiowa,
asew jiw nakaewa najʉm-aech xanliajwa:
“Pablo xatis naknaekichachajba plata nakwenosliajwa” —na-aechi nakaewa xanliajwa.
17 ¿Xamalkat nejchaxoelam xanliajwa:
“Pablo toꞌapi xatisleldin,
kaen japixot plata not Pabloliajwapi” —amkat xamal xanliajwa,
nejchaxoelam wʉt?
Japox nejchaxoelam wʉt,
diachwʉajnakolaxa-el.
18 Tito toꞌax wʉt xamal taeliajwa,
jawʉt asan,
Jesús pejwʉajan naexasitpon,
toꞌaxbej fʉlaeliajwa,
Tito sʉapich.
Japamatkoi,
¿Titokat xamal naekichachajba?
¡Japon naekichachajba-el!
Xan,
Tito sʉapich,
chiekal kaenejchaxoelaxan.
Samata,
Titobej xamal wʉljoeyaxil plata.
19 Xamal xanliajwa nejchaxoelambej:
“Pablo puexa japoxan pajut pijaxtat nakjʉm-aechbej xatis tasala-elaliajwas” —ambej,
nejchaxoelam wʉt xanliajwa.
¡El!
Japoxliajwa xan jʉmchi-enil.
Xan puexa jʉm-an,
Cristo nejxasinkpoxan,
Dios nejchachaemlaliajwa.
Xamal nejxasinkax.
Samata,
puexa japoxan jʉm-an xamal kajachawaesliajwan,
kaes Dios chiekal xanaboejaliajwam.
20 Xan xabich nejchaxoelx xamalliajwa,
ma-am xamal amwʉtjel,
duilam wʉt.
Chiekal bej duila-emilbej,
me-ama xan nejxasinkax xamal duilaliajwam.
Xamal nakaewa bej nalotambej.
Bej nusasiowlambej.
Nalala wʉt,
xabich piach bej nalalabej.
Kaenanʉla xabich bej nejchaxoelambej nejewkalliajwa.
Puexa xamal bej jʉm-ambej babejjamechan asew jiwliajwa.
Xamal asew jiw maliach bej bʉꞌwʉajanpaeyambej.
Bej nejchaxoelambej:
“Xatis kaes pejme pachaems.
Me-ama asew jiw,
jachi-esal” —bej ambej,
nejchaxoelam wʉt.
Xamal duilam wʉt,
chiekal bej duila-emilbej.
Samata,
xamal bej nasaladuilambej.
Ja-amsfʉlam wʉt,
xamalxot patx wʉt,
xan xabich talalaxael japoxanliajwa.
Samata,
xamal xabich losaxaelen.
21 Samata,
xan tadalaxael Diosliajwa,
xamal amwʉtjel babijaxan isam xot.
Samata,
amwʉtjel xabich nejchaxoelx xamalliajwa.
Asew jiw xamalxot chajiakolaxtat babijaxan is.
Amwʉtjelbej asew xamalxot nakiowa japoxan babijaxan isfʉlfʉk.
Asew wathoꞌ bʉꞌmoejtbejpi.
Kaes asaxan babijaxan isfʉlbejpi,
japi jiw padaeyax wejisal xot.
Xamalxot patx wʉt,
japi jiw isfʉl wʉt babijaxan,
xan noeyaxaelen japoxanliajwa,
xabich nanejxaejwaxael xot.