Espíritu Santo kajachawaesfʉlaspox Jesús pejwʉajan naexasiti Dios tatoꞌalpox isfʉlaliajwa
12
Takoew,
lelaxaelen xamal chiekal matabijaliajwam.
Kaenanʉla naexasiti Jesús pejwʉajan,
japi jiw Espíritu Santo kajachawaesfʉlas Dios tatoꞌalpoxan isfʉlaliajwa.
2 Xamal chiekal matabijam.
Majt naexasis-emil wʉtfʉk Jesús pejwʉajan,
Satanás xamal naekichachajbafʉl.
Samata,
ídolos,
naksiya-elpoxan,
xamal kawʉajnam.
3 Samata,
xan nejxasinkax xamal chiekal matabijaliajwam.
Aton jʉm-aech wʉt babejjamechan Jesúsliajwa,
japon pejmatpʉatxot jil Espíritu Santo.
Asan aton jʉm-aech wʉtlax:
“Jesús tajpaklon” —aech wʉt,
japon pejmatpʉatxot Espíritu Santo duk.
4 Jesús pejwʉajan naexasiti kaenanʉla nabist asabichaxan,
Dios pejbichaxan.
Espíritu Santobej kajachawaesfʉlas japi jiw Dios tatoꞌalpoxan isfʉlaliajwa.
5 Japi jiwbej kaenanʉla chiekal nabist Diosliajwa.
Japi pejbichaxan kaenanʉla najʉpa-el.
Pe japi jiw nabist kaen wajpaklon Diosliajwa.
6 Japi jiw kaenanʉla asabichaxan nabist,
Dios pejbichaxan.
Samata,
Dios puexa japi jiw kaenanʉla kajachawaesfʉl chiekal isfʉlaliajwa japon pejbichaxan.
7 Jesús pejwʉajan naexasiti,
japi jiw kajachawaesfʉlas Espíritu Santo chiekal isfʉlaliajwa Dios pejbichaxan,
puexa asew,
naexasiti Jesús pejwʉajan,
wepachaemaliajwas japoxan.
8 Asew Jesús pejwʉajan naexasitixot kajachawaesfʉlas Espíritu Santo.
Samata,
japi naewʉajan wʉt,
asew jiw chiekal naewechpi.
Do ja-aech wʉt,
japi jiwbej chiekal duilafʉl.
Asew jiw,
naexasitpixot Jesús pejwʉajan,
Espíritu Santo kajachawaesfʉlas xot,
japi jiw xajʉp chiekal chanaekabʉanaliajwa asew jiw chiekal matabijaliajwa japajamechan.
9 Asew Jesús pejwʉajan naexasitixot,
Espíritu Santo kajachawaesfʉlas xot,
japi jiw chiekal xanaboejapi Dios.
Asew naexasitpixot Jesús pejwʉajan,
Espíritu Santo kajachawaesfʉlas xot,
japi jiw xajʉp,
jiw bʉꞌxaenk wʉt boejthʉsliajwa.
10 Asew naexasitpixot Jesús pejwʉajan,
Espíritu Santo kajachawaesfʉlas xot,
japi jiw xajʉp koechaxan isliajwa.
Asew naexasitpixot Jesús pejwʉajan,
Espíritu Santo kajachawaesfʉlas xot,
japi jiw xajʉp jiw naewʉajnaliajwa Dios bʉxtoꞌaspoxan.
Asew naexasitpixot Jesús pejwʉajan,
Espíritu Santo kajachawaesfʉlas xot,
japi jiw xajʉpaxael matabijaliajwa,
asew jiw jʉm-aech wʉt Espíritu Santo bʉxtoꞌaspoxan,
o,
dep bʉxtoꞌaspoxanbej.
Asew naexasitixot Jesús pejwʉajan,
japi jiw Espíritu Santo kajachawaesfʉlas xot,
xajʉpaxael naksiyaliajwa asajame,
japi majt matabija-eljame naksiyaliajwa.
Asew naexasitixot Jesús pejwʉajan,
japi jiw Espíritu Santo kajachawaesfʉlas xot,
xajʉpaxael jʉmmatabijaliajwa,
asew jiw naksiya wʉt asajame.
Do jawʉx,
japi jiw xajʉpaxaelbej asew jiw chiekal chanaekabʉanaliajwa japajame jʉm-aechpoxan.
11 Puexa japi jiw,
Jesús pejwʉajan naexasitixot,
japoxan ja-aech,
Espíritu Santo japi kajachawaesfʉlas xot.
Espíritu Santo kaenanʉla jiw kajachawaet,
me-ama japon nejxasink jiw kajachawaesliajwa.
Kaebʉꞌtpox Cristo sʉapich naexasiti Jesús pejwʉajan
12 Aton pejbʉꞌtxot xabich pathi,
pawibej.
Kaes asewbej.
Pe nakiowa,
kaebʉꞌt.
Jatisbej xatis,
Jesús pejjiws.
Xabichas.
Pe nakiowa,
kaebʉꞌtas,
Cristo sʉapich.
13 Puexa xatis nakbautisa kaemʉtaliajwas.
Dios toꞌa kaen Espíritu Santo wajmatpʉatanxotaliajwa.
Xanal judíospin,
xamal judíos-emilpimbej,
xanal esclavos-enilpin,
xamal esclavospimbej,
puexa xatis wajmatpʉatanxot kaen Espíritu Santo.
14 Kaenanʉla wajbʉꞌantat,
xabich pathi,
pawibej.
15 Aton pejtʉak naksiyaxael wʉt,
jʉmchiyaxilpox:
“Xan ke-e-enil.
Samata,
xan ampabʉꞌtpijaxa-enil” —chiyaxil tʉakliajwa.
Tʉak japox jʉmchiyaxael wʉt,
japox pachaemaxil,
japabʉꞌtpijax xot.
16 Aton pejnaechoꞌtbej naksiyaxael wʉt,
jʉmchiyaxilbejpox:
“Xan itfuta-enil.
Samata,
xan ampabʉꞌtpijaxa-enil” —chiyaxilbej naechoꞌt.
Naechoꞌt japox jʉmchiyaxael wʉt,
japox pachaemaxil,
japabʉꞌtpijax xot.
17 Japon pejbʉꞌt puexa itfukal wʉt,
jʉmtaeyaxilon.
Puexa pejbʉꞌtxot naechoꞌankal wʉtbej,
japon aton jaenxataeyaxil.
18 Samata,
Dios aton is wʉt,
nejmach puexa ispon,
pathiliajwa,
pawiliajwabej,
kaes asaxanliajwabej pachaemaliajwa.
19 Aton pobʉꞌta itfukal chanlaelt wʉt,
o,
naechoꞌankal chanlaelt wʉtbejpon,
ja-aech wʉt,
japon aton pejbʉꞌt ajilaxael.
20 Diachwʉajnakolax aton pejbʉꞌtat xabich pathi,
pawibej,
kaes asaxanbej.
Pe nakiowa,
japon aton kaebʉꞌt.
21 Aton pej-itfut naksiyaxael wʉt,
jʉmchiyaxil ke-eliajwa:
“Ke-e,
xam naweweꞌpa-el” —chiyaxil itfut ke-eliajwa.
Aton pejmatnaetbej naksiyaxael wʉt,
jʉmchiyaxil tʉakliajwa:
“Tʉak,
xam naweweꞌpa-el” —chiyaxil matnaet tʉakliajwa.
22 Puexa xatis wajbʉꞌantatpi xabich pachaem.
Nejchaxoels wʉt wajbʉꞌantatpiliajwa,
me-ama nakweweꞌpa-el wʉt,
jatis japoxanliajwa.
Pe japoxan diachwʉajnakolax ajil wʉt wajbʉꞌanxot,
xabich nakweweꞌpaxael japoxan.
23 Xatis chiekal naxoeis wajdalapoxanxot,
nejchaxoels xot:
“Pachaema-el,
asew jiw nabʉꞌtaeliajwa” —tis xot,
nejchaxoels wʉt.
24 Pe wajmʉax,
wajthitbej,
wajmatnaetbej,
pachaem asew jiw nakwetaeliajwa.
Samata,
jaxot naxoe-esal.
Dios is wʉt wajbʉꞌan,
wajbʉꞌanxot asaxan,
me-ama xatis nakweweꞌpa-el wʉt,
ja-aech japoxan.
Jaxot chiekal naxoeis wʉt,
jatis wʉt,
japoxan,
me-ama xatisxot nakweweꞌp wʉt,
jachiyaxael.
25 Wajthit,
wajwibej,
kaes asaxanbej,
wajbʉꞌantat nasalaxil.
Japoxan kaenanʉla wajbʉꞌantat chiekal nakaewa natataeflafʉl.
26 Nakwexaenk wʉt wajbʉꞌanxot,
pobʉꞌta chiekal pachaema-esal.
Do jawʉx,
xaenkpox boejkijil wʉt,
ja-aech wʉt,
chiekal pejme nejchachaemlas.
27 Kaenanʉla xamal,
puexa Cristo pejbʉꞌtam wʉt,
ja-am.
28 Samata,
xamal kaenanʉla Dios chaxduw asabichaxan.
Dios matxoela makanot asew jiw,
japi Jesús pej-apóstolesliajwa.
Do jawʉx,
makanoton asew jiw profetasliajwa,
japi asew jiw naewʉajnaliajwa,
me-ama Dios bʉxtoꞌas.
Makanotbejpon asew jiw chanaekabʉanapiliajwa japon pejjamechan.
Toꞌabejpon asew jiw koechaxan isliajwa.
Toꞌabejpon asew jiw,
bʉꞌxaenkpi boejthʉsliajwa.
Toꞌabejpon asew jiw,
japi kajachawaesliajwa asew jiw.
Toꞌabejpon asew jiw,
japi paklochowliajwa Jesús pejwʉajan naexasitiliajwa.
Toꞌabejpon asew jiw chalechkal asajamechan naksiyaliajwa,
japi majt naksiya-eljamechan.
29 Puexa jiw apóstoles-el.
Puexa jiw profetas-elbej.
Puexa jiw chanaekabʉana-piya-elbej.
Puexa jiw koechaxan ispiya-elbej.
30 Puexa jiw boejthʉtpiya-elbej bʉꞌxaenkpi.
Puexa jiw chalechkal asajame naksiya-elpibej,
majt naksiya-eljame.
Puexa jiw jʉmmatabija-elbej,
asew jiw asajamechan naksiya wʉt chiekal chanaekabʉanaliajwa asew jiw.
31 Pachaem,
xamal nejchaxoelam wʉt:
“Xan nejxasinkax Dios nachaxdusliajwa pijax bichax,
kaes chiekal pachaempox” —am wʉt.
Nejxasinkaxaespox asew jiw
Amwʉt xamal naewʉajnaxaelen kaes chiekal pachaempox.
Japox nakaewa nanejxasinkaspox.