Jerusalén paklowaxxot apóstoles, ancianos sʉapich, natamejapox
15
Japamatkoi wʉt,
asew Judea tʉajnʉpijiw pat Antioquía paklowaxxot.
Japi jʉm-aech Jesucristo pejwʉajan naexasitiliajwa:
“¡Xamal circuncidaxaelam Dios pejmarkaxliajwa,
me-ama Moisés chajia jʉm-aech!
Circuncida-emil wʉt,
Dios xamal bʉꞌweyaxil” —aech Judea tʉajnʉpijiw.
2 Pablo,
Bernabé sʉapich,
japox jʉmtaen wʉt,
kaenejchaxoelaxa-el Judea tʉajnʉpijiw jʉm-aechpoxliajwa.
Samata,
nabʉꞌnaloti,
Judea tʉajnʉpijiw sʉapich.
Do jawʉx,
kaenejchaxoelaxa-el xoti,
Antioquía paklowaxpijiw,
Jesucristo pejwʉajan naexasiti,
nakaewa najʉm-aech:
“Toꞌaxaes Pablo,
Bernabé sʉapich,
asew xatisxotibej,
Jerusalén paklowax poxade,
jaxotde japi nospaeliajwa,
apóstoles sʉapich,
ancianos sʉapichbej,
circuncidaxliajwa” —na-aechi nakaewaliajwa.
3 Samata,
Pablo,
Bernabé sʉapich,
asew jiw sʉapichbej,
toꞌas fʉlaeliajwa Jerusalén paklowax poxade.
Japi fol wʉtfʉk,
Fenicia tʉajnʉxot,
Samaria tʉajnʉxotbej,
japatʉajnʉchanpijiwliajwa,
Jesucristo pejwʉajan naexasitiliajwa,
chapaefʉl wʉt,
jʉm-aechi:
“Ampamatkoiyan judíos-eli,
kofa pejwʉajnapijiw pejkabʉanpoxan.
Amwʉtjel japi naexasisfʉl Dioskal” —aech Pablo,
Bernabé sʉapich.
Japatʉajnʉchanpijiw japox jʉmtaen wʉt,
xabich nejchachaemil.
4 Pablo,
Bernabé sʉapich,
asew jiw sʉapichbej,
Jerusalén paklowaxxot pat wʉt,
japi bʉꞌkʉlas apóstoles,
ancianosbej,
asew Jesucristo pejwʉajan naexasitibej.
Pablo,
Bernabé sʉapich,
chapaei puexa japi ispoxan,
Dios kajachawaesfʉlas wʉt.
5 Do jaxot kaesʉapich fariseos nana,
japi naexasiti Jesucristo pejwʉajan.
Nana wʉt,
jʉm-aechi:
—Judíos-eli,
naexasiti Jesucristo pejwʉajan,
japibej circuncidaxaes Dios pejmarkaxliajwa.
Toꞌaxaesbejpi naexasisliajwa Moisés chajia lelpox —aech japi fariseos.
6 Apóstoles,
ancianos sʉapich,
natameja kaeyaxtat japikal chiekal nejchaxoelaliajwa circuncidaxliajwa.
7 Do jawʉx,
piach nospaei wʉt,
Pedro nant naksiyaliajwa.
Jʉm-aechon:
—Takoew,
xamal chiekal matabijam,
Dios namakafit xamalxot chimiawʉajan,
Jesucristo pejwʉajan,
naewʉajnaliajwan judíos-eli naexasisliajwa,
japibej Dios bʉꞌweliajwas.
8 Dios chiekal matabijt kaenanʉla jiw nejchaxoelpoxan.
Dios nak-itpaei nejchachaemilpox judíos-eliliajwa,
naexasit xoti Jesús pejwʉajan.
Samata,
Dios toꞌak Espíritu Santo japi pejmatpʉatanxotaliajwabej,
me-ama xatis,
jachiliajwapi.
9 Dios nejxasink judíos-eli.
Me-ama xatis naknejxasink wʉt,
ja-aech Dios japiliajwa.
Japibej beltaens Dios,
naexasit xoti Jesús pejwʉajan.
10 Samata,
¿ma-aech xotkat xamal nejxasinka-emil Dios ispox judíos-eliliajwa?
Moisés chajia lelpox xabich tampoel jiw chiekal naexasisliajwa.
Xatis judíos wajut chiekal naexasis-esalbej Moisés chajia lelpox.
Wajwʉajnapijiwbej chiekal naexasis-el japox.
11 Xatis matabijas Dios naknejxasinkpox.
Samata,
wajpaklon Dios malech nakbʉꞌwia Jesús pijaxtat.
Jatislap-is judíos-elpiliajwa —aech Pedro.
12 Puexa japi boejlach chiekal chalak.
Jʉmtaeni Bernabé,
Pablo sʉapich,
chapaeipox,
isfʉl wʉti koechaxan Dios pijaxtat,
naewʉajnafʉl wʉti judíos-eli pejpaklowaxanxot.
13 Naksiyax bʉxtoet wʉt,
Santiago jʉm-aech apóstolesliajwa,
ancianosliajwabej:
—Takoew xan chiekal,
¡nanaeweꞌe!
14 Simón Pedro chiekal nakjʉm-aech judíos-eli Dios kajachawaechpox,
japi naexasit xot Jesús pejwʉajan.
Samata,
amwʉtjel chiekal matabijas,
Dios tʉadut makanosliajwa judíos-eli,
japi sʉapich,
kaemʉtaliajwas.
15 Japoxliajwa profetas chajia lelpox jʉm-aech judíos-eliliajwa:
‘Japiliajwa Dios chajia jʉm-aech:
16 “Pejme fʉloekx wʉt,
xan puexa jiw kajachawaesxaelen japi chiekal nanaexasisliajwa.
Me-ama chajiakolaxtat rey David,
pejjiw sʉapich,
chiekal nanaexasit,
puexa jiw pejme jachiyaxaelbej.
17 Samata,
judíos-eli xan nanaexasisaxael.
Ja-aech wʉt,
japi tajjiwaxael’ —aech Dios,
chajia jʉm-aech wʉt.
18 Jasox chajiakolaxtat wajpaklon Dios jʉm-aech xatis chiekal matabijaliajwas” —aech profetas chajia lelpox —aech Santiago apóstolesliajwa,
ancianosliajwabej.
19 Santiago pejme jʉm-aech:
“Xan nejchaxoelxpox judíos-elpiliajwa,
amwʉt japox jʉmchiyaxaelen.
Judíos-eli kofa pejwʉajnapijiw pejkabʉanpoxan Dioskal naexasisliajwa.
Japi xatis kaes tatoꞌlaxisal Moisés chajia lelpoxan naexasisfʉlaliajwapi.
20 Carta lelaxaes judíos-elpiliajwa fiasliajwas weweꞌpaspoxfʉk.
Japacartaxot lelaxaes kaechafiasliajwas choef xʉaꞌataspi ídololiajwa,
japawi xaesamatapi.
Lelaxaesbej fiasliajwas poejiw,
asew wathoꞌ bʉꞌmoejsasamata.
Lelaxaesbej kaechafiasliajwas choef,
kachariamakʉspoxtat tʉpi,
japawi xaesamatapi.
Kaechafiasaxaesbejpi choef buꞌalpi japawi xaesamatapi.
Lelaxaesbej kaechafiasliajwas choefjalan fesamatapi.
21 Japacartaxot japoxan lelaxaes,
Moisés chajia fiat xot japoxanliajwa.
Pomatkoicha,
napatamatkoiyan wʉt,
puexa paklowaxanxot jiw natameja wʉt,
chanaexaljows Moisés chajia lelpox jiw naexasisliajwa.
Wajwʉajnapijiw tʉaduw japox” —aech Santiago apóstolesliajwa,
ancianosliajwabej.
Apóstoles, ancianos sʉapich, carta lelpox judíos-elpiliajwa
22 Apóstoles,
ancianos sʉapich,
asew Jesucristo pejwʉajan naexasiti sʉapichbej,
kaenejchaxoelax carta lelpoxliajwa judíos-elpiliajwa.
Samata,
asew japixot makanoti,
japi nakfʉlaeliajwa Pablo,
Bernabé sʉapich,
Antioquía paklowax poxade wʉt.
Jawʉt makafich Judas.
Japonbej pawʉl Barsabás.
Makafichbej Silas.
Japi kolenje chiekal sitaens Jesucristo pejwʉajan naexasitixot.
23 Japi xalaeyaxaelcarta,
japacartatat japi lelpox jʉm-aech:
“Takoew,
xanal apóstoles,
ancianos sʉapich,
lelx ampacarta xamalliajwa.
Xamal saludax,
naexasitampim Jesucristo pejwʉajan,
judíos-emilpim,
Antioquía paklowaxpijwam,
Siria tʉajnʉpijwambej,
Cilicia tʉajnʉpijwambej.
24 Xanal wʉltaenx asew judíos,
xanalxoti,
paꞌapox xamalxotde.
Japi xamalxot paꞌa wʉt,
naewʉajan asaxan.
Samata,
xamal japox naewʉajan wʉt,
chiekal matnoch nejchaxoela-emil,
naexasitam wʉt Jesucristo pejwʉajan.
Pe xanal japi toꞌa-enil xamal poxade.
25-26 Samata,
xanal natamejax wʉt,
kaeyax nejchaxoelx.
Do jawʉt,
xanalxot makafitx Judas,
Silas sʉapich,
japi xamal taeliajwa.
Japi kolenje fʉlaech wʉt xamal poxade,
fʉlaeyaxaelbej Bernabé,
Pablobej,
xamal taeliajwa.
Bernabé,
Pablo sʉapich,
japi wajkoew,
xanal xabich nejxasinkax japi.
Japi nanʉamt xabich chachoelxot,
wajpaklon Jesucristo pijaxtat nanʉamt xoti.
27 Puexa japi pat wʉt xamalxot,
Judas,
Silas sʉapich,
chiekal chanaekabʉanaxael xanal lelxpox xamalliajwa.
28 Xanal,
Espíritu Santo sʉapich,
kaenejchaxoelax.
Toꞌaxinil xamal isliajwam tampoelpoxan.
Fiatxlax asaxan isasamatam pachaema-elpoxan.
29 Samata,
¡nabej xaeꞌ pawi,
choef,
xʉaꞌataspi ídolosliajwa!
¡Choefjalan nabej feꞌbej!
¡Nabej xaeꞌbej pawi,
choef,
kaechariamakʉspoxtat tʉpi!
¡Asew wathoꞌ nabej bʉꞌmoejsbej!
Japoxan naexasisfʉlam wʉt,
ja-am wʉt,
chiekal duilaxaelam.
Ajil kaes asaxan xamal jʉmchiliajwan.
Dodoꞌ.
Ma amxot ampox toep” —aech carta,
japi xalaeyaxaelpox.
30 Do jawʉx,
Jerusalén paklowaxpijiw,
Jesucristo pejwʉajan naexasiti,
japi toꞌa Judas,
Silas sʉapich,
nakfʉlaeyaxaeli Bernabé,
Pablo sʉapich,
Antioquía paklowax poxade.
Japi pat wʉt japapaklowaxxot,
tameja japapaklowaxpijiw,
naexasiti Jesucristo pejwʉajan.
Do jawʉt,
carta chaxduti natamejaxtat.
31 Antioquía paklowaxpijiw xaljow wʉt carta,
xabich nejchachaemil,
chiekal chanaekabʉanas xoti japacartatat.
32 Judas,
Silas sʉapich,
japibej profetas.
Japi naewʉajan wʉt Antioquía paklowaxpijiw,
japapaklowaxpijiw xabich nejchachaemil Dios kaes xanaboejapoxliajwa.
Ja-aech wʉt,
kaes Dios naexasitbejpi.
33 Do jawʉx,
pin-iamatkoiyan toep wʉt,
Judas,
Silas sʉapich,
thilt,
jiw toꞌas poxade naweliajwa.
Japatʉajnʉxot nakolaliajwa wʉt,
Jesucristo pejwʉajan naexasiti kejachaspi.
Do jawʉt,
jʉmtispi:
“¡Dios xamal chiekal nej chale!”
—tispi.
34 [Jawʉt Silas namanasia xot,
jaxot namanpon.]
35 Pablo,
Bernabé sʉapich,
Antioquía paklowaxxot namafʉki-is.
Japi,
xabich asew jiw sʉapichbej,
chiekal chanaekabʉana Jesucristo pejwʉajan.
Naewʉajnafʉlbejpi japawʉajan.
Pablo, Bernabé sʉapich, pejme fʉlaeyaxaelpox naewʉajnaliajwapi jiw Jesucristo pejwʉajan
36 Do jawʉx,
pin-iamatkoiyan wʉt,
Pablo jʉm-aech Bernabéliajwa:
—Pejme fʉlaeyaxaes taeliajwas wajkoew,
naexasiti Jesucristo pejwʉajan.
Majt naewʉajnasxot Jesús pejwʉajan,
japapaklowaxanpijiw pejme taeyaxaes,
ma-aechi,
amwʉtjel duilafʉl wʉt —aech Pablo.
37 Do jawʉt,
Bernabé nejchaxoel bʉflaeliajwapon Juan Marcos.
38 Majt Juan Marcos bʉꞌfol wʉti,
japon asbʉan jʉmch nawiat,
Panfilia tʉajnʉxot wʉti.
Samata,
Pabloliajwa chiekal wepachaema-esal pejme bʉflaeliajwapon Juan Marcos.
39 Pablo,
Bernabé sʉapich,
kaenejchaxoelaxa-el wʉt bʉflaeliajwapi Juan Marcos,
do jawʉt,
Pablo,
Bernabé sʉapich,
nadija.
Jawʉt Bernabé bʉꞌfol Juan Marcos.
Do jawʉt,
Bernabé,
Juan Marcos sʉapich,
juli barkam Chipre tanaet poxaliajwade.
40 Do jawʉtbej,
Pablo makafit Silas chalaliajwas.
Asew japixot Dios kawʉajan kajachawaesliajwas Pablo,
Silas sʉapich,
jiw naewʉajan wʉt.
Do jawʉx,
japibej chijia.
41 Pablo,
Silas sʉapich,
jiw naewʉajan Jesucristo pejwʉajan naexasiti,
Siria tʉajnʉpijiw,
Cilicia tʉajnʉpijiwbej,
kaes pejme chiekal naexasisliajwapi Dios.