“Ymave rupi Nhanderuete mbovykue rei e'ỹ, ha'e ha'ekue-ekue'i rami e'ỹ ijayvu raka'e nhaneramoĩ kuery pe profeta kuery rupi. Ha'e gui aỹ opa vygua ára ma Gua'y rupi ae ijayvu nhandevy. Ha'e va'e ma opa mba'e ikuai va'e jopyarã omoĩ, ipo rupi opa mba'e ojapo rire. Nguuete rexakãa rexa ukaa oiko, Nguu rami ete heko va'e vy” (Hebreus 1.1-3a).

Gua'y Jesus Cristo rupi Nhanderuete oikuaa uka nhandereraa jepe aguã. Mba'eta Nhanderuete guigua lei re oĩa jajapopa aguã nhanhea'ã teĩ ndajajapopai 'rã, “mba'eta nhande ha'e javive jajejavy vy ndajaupity kuaai Nhanderuete rexakãa” (Romanos 3.23). “Mba'eta lei rupi nhanhea'ã teri jave nda'evei va'ekue jajapopa aguã, nhandero'o re nhanekangy vy. Ha'e ramo Nhanderuete ae ojapo nhandevy, mba'eta Gua'y ombou raka'e to'o re jajejavy va'e regua rami teĩ, jajejavya oipe'a aguã. Ha'e rami py Nhanderuete oipe'a raka'e to'o re jejavya oĩ va'e po'aka, lei re ojapo uka pyre oĩ va'e jajapo nho aguã, to'o re ve'ỹ jaiko vy guive, ha'e rã Nhe'ẽ re anho” (Romanos 8.3-4). “Nhanderuete yvy re ikuai va'e oayvu vy ome'ẽ Gua'y peteĩ'i va'e, hexe ojerovia va'e okanhy e'ỹ aguã, ha'e rã tekove marã e'ỹ oupity aguã” (João 3.16). Jesus Cristo kuruxu re omano vy opaga raka'e jajejavyague re, teko porã rupi ju jaiko aguã.

Jesus Cristo regua ayvu pe ma “Ayvu porã” 'ea, ha'e javi regua pe omombe'u pyrã oeja. Jesus guemimbo'e kuery pe aipoe'i: “Tapeo opa rupi, yvy jave re ikuai va'e ha'e javive pe pemombe'u ayvu porã”, he'i va'ekue (Marcos 16.15). Ha'e ramo hemimbo'e kuery opa rupi ayvu porã omombe'uague rami avi nhandevy pe voi omombe'ua aỹ. “Mba'eta peteĩ'i oiko Nhanderuete. Ha'e rami ae avi peteĩ'i oiko Nhanderuete reve peteĩ rami nhanemoingoa. Ha'e va'e ma Cristo Jesus ava ojeapo va'ekue. Pavẽ reraa jepearã ojejuka uka raka'e” (1 Timóteo 2.5-6a).

Novo Testamento ma Jesus Cristo regua ayvu porã oĩa. Jypy ma irundy henda py hekokue ko yvy re oiko jave guare omombe'ua, ha'e gui ma hemimbo'e kuery mba'emo ojapo va'ekue oĩ, ha'e gui hemimbo'e kuery nhanembo'ea rupi ombopara va'ekue ju, ha'e gui opaa py ma oĩ Jesus Cristo raka'eve guarã oikuaa uka va'ekue. Nhande kuery pavẽ peguarã oeja raka'e, opa mba'e py javy'a aguã, ha'e Nhanderuete reve peteĩ rami nhandekuai ha'e hexakãa jaupity aguã.