Peteĩ-teĩ regua pe ma Nhanderuete marã rami vy pa oikuaa uka 'rã gueko (Salmo 19.1-4). Ha'e rami vy judeu kuery pe ma Nhanderuete ome'ẽ raka'e Antigo Testamento, “Guexeve guarã ymave rupi ojapo va'ekue oĩa”. Ha'e rã Novo Testamento ma “Guexeve guarã ojapo pyau va'ekue oĩa”. Ha'e va'e ma Jesus Cristo rupi ojapo va'ekue.

Ymave rupi guexeve guarã ma po rami Nhanderuete ojapo raka'e judeu kuery reve. Aipoe'i: “Xeayvua ha'e ajapo uka va'ekue rupi ae 'rã pendekuai. Mba'eta ha'e va'e ayvu amongue ojapopa ri vy oikove 'rã hexe vy”, he'i (Levítico 18.5). “Ha'e ramo heta va'e kuery peteĩ rami ombovai: ‘Senhor ijayvua ha'e javi 'rã rojapo’, he'i okuapy” (Êxodo 19.8). Ha'e rami vy Nhanderuete ijayvua ojapopa aguã rami ikuai raka'e.

Antigo Testamento py ma oĩ Nhanderuete yva ha'e yvy ojapopaague, judeu kuery ojeupe guarã oiporavoague, Egito yvy gui ha'e kuery oguenoẽmbaague, lei ha'e kuery rekorã Moisés po rupi ome'ẽague, nonhe'ẽ rendui okuapyague, ijyvyrã Canaã yvy py oguerupaague, tuuete ramigua pe rive ikuai jepiague, ha'e kuery re huvixave kuery openaague, ha'e kuery ojejavyague káuxa amboae yvy katy ogueraapaa ague, ha'e gui oyvy va'ekue py ju amongue ojevyague. Ha'e kuery ikuaiague ha'e javi rupi Nhanderuete ojekuaa uka opa mba'e py heko porã va'e, opena porã va'e, nhomboaxy va'e, oipotaa oikuaa uka porã va'e, opa mba'e re ipo'aka va'e, joe oikuaa pota va'e ha'e jejavya re nhombopaga va'e. Ha'e kuery pe haxy ete raka'e Nhanderuete guexeve guarã ojapo va'ekue rupi ikuai aguã, teĩ Nhanderuete ma omboaxy kuerei.

iKuaray oẽa gui kuaray oikea mombyrya rami avi