Q
Raab — (Ebr 11:31; Schgu 2:25). Tempu antigu ta pövu Israel bi ska fë vadu valadji pa ineñ lantela dantu tela shi ku Nashian bi plomëtë fa ëli ske da ineñ iai, se ineñ bi manda zhugan napai jöndjidu valadji pa ineñ ba supeta tela sala, valadji pa ineñ sëbë amea shi pa ineñ ngana ineñ. Uan naamain dölöluia ku a ja sama Raab ku bi ja ta tela sai se zhuda nna supetadölö, se ëli jöndë ineñ. Ëli fë jö sai pakë ëli ba këlë Nashiolo se ëli ten ba këlë fa se sa vintadji Nashiolo pa pövu Israel ma tela sai. Zha se, nna nguë Israel bi se ineñ ma tela sala. Ineñ mata nna nguë tela se tudu se Raab moso se gua. Ëli ku nna nguë jadji dëli se a sava ineñ fo mölë dajantu zhuda shi ëli fë da nna nguë Nashiolo. Ëli se sa pöjödölö shime ku a ja limian dantu (Mat 1:5) shimafan uan nna nguë tompu tompu Djisu.
Rabi — Nna judio bi ska sama nna napai sëbëdölö ku ngangandji shimafan «Rabi» ö «Rabino», ku ja sa sinchidu «meeth». Sa uan fala dondolo. «Raboni» ten ja sa ku sinchidu shime.
Rakel — (Mat 2:18). Rakel bi sa uan nna miela Jakob. Jakob bi ngongo ku ëli monchi muntë. Ëli se bi sa main Sandzhe ku Benjamin. Dantu Mat 2:18 namu dëli a ja usa shimafan ja msa nna main pövu nna judio. Lëë Jakob.
Rebeka — (Rom 9:10-13). Se bi sa miela Isaak, mina Abraam. Ëli se bi sa main nna mina dösu, Esau ku Jakob. Lëë Abraam, Esau ku Jakob.
Roma — Roma se bi sa jasa palea uan tela ku a ja sama Italia. Dantu tempu shi Djisu bi ska ta tela, se nna sodadji roma bi sa liba uan sapa pachi mundu sai. A shime ineñ ten bi sa liba Israel. Nna nguë Israel bi ja të pashian nna nguë roma, ineñ bi fo jölë ineñ fo tela dëneñ ja pa sa ja ineñ bi paadji. Alë Roma, ku sa ku namu ja sama Sesar, ëli se bi sa alë/jasa jasa palea shi ngandji mashi dantu mundu nguintëlu nguintëlu tempu sala.