P
padjil — Nna padjil, ineñ bi sa nna napai patadu ku a ja ma pa ineñ se ja fë saklifisu da Nashiolo a föböli pövu Israel. Ineñ bi sa ku pödë ngandji shi pa ineñ ja fë saklifisu dantu Jadji Nashiolo dantu Jerusalen. Nna padjil bi ja sa nna nguë a ja ma fo dantu nna nguë jadji Aaron. Se fë ku ineñ tudu bi ja sa nna minadjimina Levi. Lëë Aaron ku Levi.
Jasa jasa padjil se ja sa nna nguë ineñ shi ngandji mashi dantu nna padjil tudu. A ja ma ëli shimafan jasa jasa padjil dantu uan anu. Zha se a ja ma utu napai valadji pa ja shivi da jasa jasa padjil. Se jasa jasa padjil se ja sa ponodu nguë shi moso ku ja paadji lantela ba Jamian shi Santu mashi dantu Jadji Nashiolo, jamian shi a ja fë saklifisu dajantu tuludöguë pekadu dëli ku pekadu utu dji nguë.
Jasa jasa padjil ku nna padjil tudu ineñ shi ku bi sa ku jalga sai pimëlu, zhuntadu ku utu nna pöjödölö ngangandji dantu jadji nna padjil, ku a bi jönsë ineñ shimafan «nna padjil ineñ shi ngandji» dantu Testamentu Novu.
pantafala — Pantafala ja sa pöjödölö ku ja da lazhan uan nova ku Nashian ja da bi. Ëli ja faa ku nna pöjödölö fo pachi Nashiolo.
Dantu djia Antigu Testamentu, Nashian da uan sapa pantafala bi, shimafan Samuel, Isaias ku Jeremias. Se amea dëneñ se Nashian msa jö ineñ shi ske shiga djia ineñ shi ske bi bi. Uan sapa danu anta pa pali Djisukilitu, se ineñ da lazhan amea shi ëli ske bi. Ineñ faa uan sapa kuzhu tëjantu ku jö ineñ ëli ske bi fë ku jö ineñ shi ske bi bi shiga. A shime ineñ ten pantafala uan sapa jö ineñ shi ske shiga jabamentu djia, anta pa Djisukilitu tan vlame bi pa bi juzhga mundu.
Zhugan jamian dantu Testamentu Novu, ja faa ja «Pantafala», (uan zhampulu dantu Zhn 1:21). Nguë sai se sa pantafala shi a ja limian dantu Deu 18:15-18, uan pantafala patadu ku Nashian bi plomëtë fa ëli ske da bi.
Dantu Testamentu Novu, nna nguë ineñ shi ja faa fala ku pödë Spitu Santu a ten ja sama ineñ pantafala. Ineñ ja da lazhan nova nova ku Nashian se ja da ineñ lazhan dëtu fo ëli.
paraiso — (Luk 23:43; 2Kor 12:4; Apo 2:7). Palavulu paraiso sa ku sinchidu dantu fala nna griego «uan nguintali fumözhö». Mëtuvëdji namu sai a ja ska ma sama uan jamian fumözhö dantu Eden jamian shi Nashian pë Adan ku Iëva ta bi sa jomesadu mundu. Dantu Testamentu Novu, ja sa ku utu sinchidu «ösë», se sa jamian fumözhö shi ku nna nguë ineñ shi këlë Djisukilitu ske bai ta ineñ ja mölë.
Paskua — Lëë Fesa Paskua.
pekadu — Ta uan pöjödölö ja kabela, ja sa uan alë Nashiolo shi ja sa, jö sai ja sa pekadu. Ja sa uan ja ngandji ö uan ja kichi deenchi öiö nna pöjödölö, mandji se ja sa pekadu deenchi öiö Nashiolo (Rom 3:9-20; 6:23).
Pentekostes — Lëë Fesa Pentekostes.
Pilatu — Pilatu se bi sa gövöndölö roma shi ku bi sa ku pödë liba Judea ta Djisu bi ska shina nguë kuzhu djia ineñ sala. Ëli se bi lega nna jasa jasa nna judio ta ineñ bi pindji Pilatu pa da odji pa da Djisu pë kusu.