N
Naaman — (Luk 4:27). Naaman bi ska ta tela Siria. Ëli bi sa jomandanchi nna sodadji. Ëli na bi sa judiof. Benga pa ëli bi sa uan pöjödölö ngandji, Naaman bi ska padësë ku danchi lepla. Ta ëli tëndë monova pantafala Eliseo, se ëli ba bë ëli, ba luga ëli pa ëli kula ëli lepla. Se Eliseo manda ëli ba lubela Jordan valadji pa ëli ba laba dantu aua lubela se ope seta. Se Naaman tëndë ëli se ëli vla kuladu ntëlelele.
nardo — (Mar 14:3; Zhn 12:3). Bi të uan mooso ku bi ska ma uan zhëitë ku ja saa gavu ku a ja sama nardo valadji pa ëli bolo ope Djisu. Nardo sa ja a ja fë ku aua uan ope döpa ku ja sama nardo.
nguë ma pagu tesu, nna — Tempu Djisu, nna nguë ineñ shi bi ja ma pagu tesu bi ska tabaia da nna nguë roma. Tuludöguë ineñ bi sa judio, mandji se ineñ bi ska zhuda nna nguë roma pa ja fë nna judio afoshi pa ja da pagu tesu da nna sodadji roma. Nna sodadji roma bi sa liba nna judio se ineñ bi sa gövöndölö liba dëneñ afoshi. Dajantu shi se nna judio bi ska të pashian nna nguë ma pagu tesu. Vlame uan sapa ope se nna nguë ma pagu tesu bi ska ma djiëlu mashi ku jö shi ku bi ta a ineñ ja ma, ja ma da tuludöguë dëneñ.
Ninive — (Mat 12:41; Luk 11:30, 32). Ninive se bi sa namu loso shi ku Nashian bi manda pantafala Jonas pa ëli ba pegua nova dëli. Nova Nashiolo bi sa fa ëli bi ske të nna nguë ninive të fea fea dajantu ja fëfëiu ineñ shi ineñ bi ska fë. Ta ineñ tëndë nova Jonas se ineñ sula se ineñ tan vla ku ope tashi ba jua Nashiolo. Dajantu shi se Nashiolo pada ineñ se na tan bi të ineñ të fea feaf. Lëë Jonas.
Noe — (Mat 24:37-39; Luk 3:36; 17:26-27; Ebr 11:7; 1Pud 3:20; 2Pud 2:5). Noe bi bibe uan sapa anu. Jomesa fo Adan (pimëlu napai ku Nashian mindji), Noe se bi sa deshi novu nna minadjimina. Dantu djia ineñ shi Noe bi bibe, nna pöjödölö bi ska fë uan sapa ja fëfëiu. Se dajantu jö sai se Nashian bi faa ëli, ëli bi ske manda uan fadaua bi valadji pa të ineñ të fea fea ku jö ineñ shi bi sa mundu tudu. Mandji se Noe bi sa uan masebu gavu, se ëli bi tëndë Nashiolo. Se amea se Nashian manda Noe pa ëli fë uan taba navian, se ëli da ëli lazhan amea mindjida shi ku ta pa ëli ma fë. Ëli faa ëli pa ëli ma miela dëli ku nna mina tëishi dëli ku nna miela dëneñ ku pa ineñ lantela dantu navian sai, ku klase limaia dösu dösu ku paatu, naamain ku napai. Zhugan klase limaia ëli bi ske ta pa ëli ma naamain seta ku napai seta. Se Noe kumpli ja tudu ntëlelele amea shi Nashian bi da ëli odji. Se i shi moso ku Noe ku nna nguë jadji dëli lantela, se Nashian manda uan fadaua ngandji. Aua se bi kubili ba toja van liba iki iki. Se nna nguë tudu mölë ja nguli aua, mandji se Noe ku nna nguë jadji dëli se sava.
Ta da uan anu se aua chama da se san tela tan vlame soja. Se Noe ku nna nguë jadji dëli ten së fo navian. Tadashi se Noe fë uan saklifisu da Nashiolo se ëli alaba ëli pakë ëli bi sava ineñ. Se Nashian bi plomëtë fa zhugan djia ëli na tan ske fë uan fadaua shimafan i salaf. Se fo ösë se së ku supichi uan gonvela. Se Nashian bi faa sa uan shinali plomesa fa ëli zhugan djia na tan ske da uan fadaua bi liba tela mashif.
nova gavu — Nova gavu (evanjelio) sa nova Nashiolo da zhenchi nna pöjödölö se a ja sama nova gavu. Nova se ja faa ö ja da lazhan fa Nashiolo da Mina dëli Djisukilitu ba mundu valadji pa bi sava nna pöjödölö fo jatigu shi ku ineñ bi mësë dajantu pekadu dëneñ ku pa bi fë vadu uan jamangandji valadji pa ineñ ba vla fë nna mina Nashiolo.